4.1 - බලය
වස්තුවක් එසවීම, දොරක් ඇරීම හෝ වැසීම, බෝලයකට පහරදීම, මේසයක් තල්ලූ කිරීම වැනි අවස්ථා පිළිබඳ සලකා බලන්න (4.1 රූපය).
එවැනි අවස්ථාවල දී අප කරන්නේ එම අදාළ වස්තු ඇදීමකට හෝ තල්ලූ කිරීමකට භාජනය කිරීමකි. එසේ තල්ලූ කිරීමක් හෝ ඇදීමක් බලයක් ලෙස හැඳින්වේ. සරලව ම පැවසුවහොත් බලයක් යනු ඇදීමක් හෝ තල්ලූ කිරීමකි.
මේසයක් මත ඇති පොතක් තල්ලූ කිරීමෙන් එම පොත ඉතා පහසුවෙන් චලනය කළ හැකි ය. බෝලයකට පා පහරක් එල්ල කිරීමෙන් එම බෝලය වේගයෙන් ගමන් කිරීමට සැලැස්විය හැකි ය. නමුත් ඔබට බිත්තියක් තල්ලූ කර බිත්තිය චලනය කළ නොහැකි ය. තනි පුද්ගලයකුට බස් රථයක් හෝ ලොරියක් වැනි බර වාහනයක් තල්ලූ කිරීම මගින් චලනය කළ නොහැකි ය. මේ අනුව, සමහර අවස්ථාවල දී බලයක් යෙදීම මගින් නිසල වස්තුවක් චලනය කළ හැකි වුවත්, බල යොදන සමහර අවස්ථාවල දී කිසිම චලිතයක් සිදු නොවන බව ඔබට පෙනෙනු ඇත.
ඔබ සිටින දිශාවට වේගයෙන් එන බෝලයක් අල්ලා ගැනීමේ දී ඔබ කරන්නේ බලයක් යෙදීම මගින් බෝලය නිශ්චල කිරීම ය. එවැනි බෝලයකට පිත්තකින් පහර දුන්නහොත් එවිට ඔබ කරන්නේ බලයක් යෙදීම මගින් බෝලය චලනය වන දිශාව සහ එය ගමන් කරන වේගය වෙනස් කිරීමකි.
රබර් බෝලයක් බිම තබා පෑගීම මගින් එහි එබීමක් සිදු කළ හැකි ය. එම අවස්ථාවේ සිදුවන්නේ බලයක් යෙදීම මගින් වස්තුවක හැඩය වෙනස් කිරීමකි.
මේ අනුව බලයක් යෙදීම මගින්,
- නිශ්චල වස්තුවක් චලනය කළ හැකි ය.
- චලනය වන වස්තුවක් නිශ්චල කළ හැකි ය.
- චලනය වන වස්තුවක වේගය වෙනස් කළ හැකි ය.
- චලනය වන වස්තුවක දිශාව වෙනස් කළ හැකි ය.
- වස්තුවක හැඩය වෙනස් කළ හැකි ය.