විශ්‍රාමික විදුහල්පති ගුරු පියාණන්ගෙන් නවක ගුරු මහත්ම මහත්මීන් හට...

විශ්‍රාමික විදුහල්පති ගුරු පියාණන්ගෙන් නවක ගුරු මහත්ම මහත්මීන් හට වටිනා උපදෙස් ටිකක්

නිවාඩු

ආයතන සංග්‍රහයේ 12 වන පරිච්ජේදයේ 24 වන වගන්තියේ රජයේ සේවකයන්ට නිවාඩු ලබා ගැනීම පිළිබඳව සඳහන් වේ. නිවාඩු යනු අනුමත කරගත යුතු දෙයකි. අනියම් නිවාඩු දින 7 කට කලින් අනුමත කර ගත යුතුයි. ලබා ගන්නා නිවාඩු නියමිත ආකෘති පත්‍රයේ (පොදු 125) පිරවීම අනිවාර්යයි. පොදු 125 ආකෘති පත්‍රයේ සියළුම හිස්තැන් (කොටු 18) සම්පූර්ණ වී තිබිය යුතුවේ. අසනීපයක් නම් විදුලි පුවතක් (Tele - mail) එවිය හැකි අතර විදුලි පුවත එවීමෙන් පසු පාසලට පැමිණි දින පොදු 125 ඊට ඇමිණිය යුතුවේ.

නිවාඩු ගැනීමේ කාරණා පහත සඳහන් වේ.

1. තමා අසනීප වීම (අසනීපයේ ස්වභාවය සඳහන් කළ යුතුයි).
2. කලත්‍රයා අසනීප වීම.
3. දරුවන්ගේ අසනීප / මව / පියා / අවිවාහක සහෝදරියන්ගේ
4. පවුලේ අයගේ මරණයක දී
5. ඒ සම්බන්ධව ආගමික උත්සවයක්
6. නිලධාරියාගේ විවාහය
7. දරුවන්ගේ විවාහය
8. නිලධාරියාගේ නිවසේ අයකුට බෝවන රෝගයක් සෑදීම.
9. සිතාසි ලබා උසාවි යාම
10. වෙනත් පෞද්ගලික කටයුතු (හේතු )

හදිසි අනතුරක් සිදුවූ විට

1. වහාම රෝහල් ගත කළ යුතුයි.
2. රෝහලෙන් ලිපියක් ලබා ගත යුතුයි (ආකෘති පත්‍රයක් - නම, වේලාව)
3. සෞඛ්‍ය සේවා අධ්‍යක්ෂකට දැන්විය යුතුයි.
4. පොලිසියේ පැමිණිල්ලක් කළ යුතුයි.
5. ලොග් සටහනේ නිවැරදිව වේලාව සහ කාරණය සඳහන් කළ යුතුයි.
6. පොදු 5 ආකෘති පත්‍රය පිරවිය යුතුයි.
7. ගොනුව කලාප කාර්යාලයට යැවිය යුතුයි.

වැටුප් වර්ධක

වැටුප් වර්ධකයක් ලබා ගැනීම සඳහා පැමිණීම, වැඩ සහ හැසිරීම යන කාරණා සැලකිල්ලට ගනු ලැබේ. ආයතන සංග්‍රහයේ කාණ්ඩ 2 කි. පළමුවන කාණ්ඩයේ පරිච්ජේද 33 කි. 2 වන කාණ්ඩයේ පරිච්ජේද 2 කි (47 සහ 48 වශයෙන්). දෙවන කොටස හඳුන්වන්නේ විනය කොටස වශයෙනි. පළමු වන කාණ්ඩයේ ඇත්තේ රජයේ සේවකයා ක්‍රියා කළ යුතු ආකාරයයි. දෙවන කාණ්ඩයේ ක්‍රියා කිරීම් වල වැරදි වලට ලැබෙන දඬුවම් ගැන කියවේ. මෙම දඬුවම් හා වැරදි උපලේඛන 2 ක සඳහන් වේ. පළමු වන උපලේඛනයේ වැරදි 16 ක් සඳහන් වේ. දෙවන උපලේඛනයේ කරුණු 6 ක් සඳහන් වේ. ඒ කරුණු 6 මෙසේය.

1. නොසැලකිල්ල
2. අකාර්‍යක්ෂමතාවය
3. අදක්ෂතාවය
4. අවංකභාවය නැතිකම
5. අනිසි හැසිරීම
6. අවිනය

පැමිණීම

අත්සන් පොතේ මුලින් නොපැමිණීම ප්‍රමාදයක් සේ සැලකිය හැකිය. ගුරුවරයා පුරුද්දක් වශයෙන් ප්‍රමාද වී පැමිනෙන්නේ නම් එයද දුර්වල පැමිණීමක් ලෙස ගැනේ. පාසලේ තිබෙන ප්‍රධාන කාර්යයන් දෙක වූ දරුවන් බලා ගැනීම සහ ඉගැන්වීම යන කාරණා දෙක ඉස්මතු කිරීමට ප්‍රමාද වී පැමිණීමකින් බැරිය.

වැඩ (කාර්යය )

තම කාර්යයන් ඔප්පු කරන අවස්ථා කිහිපයකි.

1. කාර්යය සාධනය ලිවීම.
2. ඉගෙන්වීම.
3. ලකුණු ලබා දීම.
4. ලකුණු වැඩි කිරීමට කළ දේ.
5. ප්‍රතිඵල ලබා දීම.

හැසිරීම

ආයතන සංග්‍රහයේ දෙවන කාණ්ඩයේ සාමාන්‍ය හැසිරීම සහ විනය කොටසේ හැසිරීම ගැන සඳහන් වේ. අවිනය කියන වචනයේ සේවයට ( රාජකාරියට ) සම්බන්ධ වූවත් නැතත් නරක හැසිරීමක් ගම්‍ය කරයි. ඊට අමතරව ගුරුවරයාගේ චර්යාව පිළිබඳව නියෝග සහ චක්‍රලේඛ රැසකින් හැසිරීමේ ස්වභවය පෙන්වා දී තිබේ. චක්‍රලේඛ අංක 2012 / 37 නමින් ඉසුරුපායෙන් නිකුත් කොට ඇති ප්‍රධාන කරුණු 7 කින් යුක්ත ( පිටු 21 ) කින් යුක්ත හැසිරීම පිළිබඳව ආචාර ධර්ම පද්ධතිය සහ පොදු නීති මාලාව සඳහා තවත් චක්‍රලේඛයක් ඇත.


ර / රාහුල විද්‍යාලයේ පැවති නවක ගුරු මහත්ම මහත්මීන් දැනුවත් කිරීමේ සැසියක දී පටිගත කළ කරුණු මෙසේ ලිවීමට සිතුණි.

( රසික අත්තනායක - ර / ගෝණකුඹුර මහා විද්‍යාලයේ තොරතුරු සන්නිවේදන තාක්ෂණික ඒකකය භාර ආචාර්යය  | 0714486249 )