1.1 - දත්ත සහ තොරතුරු - 1 කොටස

තොරතුරු සන්නිවේදන තාක්ෂණය (ICT – Information & Communication Technology) යනු

තොරතුරු සන්නිවේදන තාක්ෂණය සෑදී ඇත්තේ තොරතුරු, සන්නිවේදනය සහ තාක්ෂණය යන ක්ෂේත්‍රයන්ගේ එකතුවෙනි.

තොරතුරු (Information) යනු දත්ත අර්ථවත් ආකාරයට සැකසීමයි.
සන්නිවේදනය (Communication) යනු දෙදෙනෙක් හෝ දෙපිරිසක් අතර සිදුවන තොරතුරු හෝ පණිවිඩ හුවමාරුවයි. දුරකථන සංවාදය මේ සඳහා උදාහරණයක් වේ.
තාක්ෂණය (Technology) යනු විද්‍යාවේ දියුණුව තුළින් බිහිවී ඇති සියළුම දේය.


(Image Source : http://www.google.lk/imgres?imgurl=http://qph.is.quoracdn.net/)

එදිනෙදා ජීවිතයේ බොහෝ ක්‍රියාදාමයන් සඳහා තොරතුරු තාක්ෂණය සහ සන්නිවේදන තාක්ෂණයන්හි සංයුග්මනය (එකතු වීම) බොහෝ සෙයින් වැදගත් වේ.

උදාහරණ ලෙස උදෑසන ප්‍රවෘත්ති විකාශණය, ඈත රටක සිටින මිතුරෙකුට විද්‍යුත් තැපැල් පණිවුඩයක් යැවීම, අන්තර්ජාලය භාවිතයෙන් ශ්‍රව්‍ය / දෘශ්‍ය මාධ්‍ය දුරකථන ඇමතුම් නොමිලයේම ලබාගැනීම සඳහා ද ෆැක්ස් යන්ත්‍රයක් මගින් දෘඩ පිටපතක් අවශ්‍ය ස්ථානයකට සන්නිවේදනය කිරීම මේ අතර වැදගත් සිදුවීම් වේ.

දත්ත සහ තොරතුරු (Data & Information)

තොරතුරු සන්නිවේදන තාක්ෂණය තුළදී ඉතාම වැදගත් වන එකිනෙක වෙනස් වූ එමෙන්ම එකිනෙක සම්බන්ධ වූ සංකල්ප දෙකක් වශයෙන් දත්ත සහ තොරතුරු හැඳින්විය හැකිය.

දත්ත යනු (Data)

අපට එදිනෙදා ජීවිතයේදී මූලික අර්ථයක් ලබා දෙන, කිසිදු ආකාරයක සකස් කිරීමකට භාජනය නොකළ කරුණු දත්ත ලෙස හැඳින්වේ. තොරතුරු සකස් කිරීමට මූලික වශයෙන් යොදා ගන්නා අමුද්‍රව්‍ය දත්ත වේ.


(Image Source :http://www.google.lk/imgres?imgurl=http://static1.squarespace.com/ )

උදා: සමන් පාසල් ශිෂ්‍යයෙකි. මොහු හා සම්බන්ධ දත්ත පිළිබඳව සලකා බලමු.

නම, වයස, ලිපිනය, දුරකථන අංකය, ශ්‍රේණිය, ඇතුළත් වීමේ අංකය, පාසල යන්න සමන් හා සම්බන්ධ දත්ත වේ. සමන් පිළිබඳව කිසියම් තොරතුරක් ලබා ගැනීම සඳහා මෙම දත්ත නිසි ආකාරයට සැකසිය යුතු වේ. එනම් කිසියම් අර්ථයක් ලබා දෙන ආකාරයට එම දත්ත ඉදිරිපත් කළ යුතු වේ.

ශ්‍රී ලංකාවේ සෑම වසර 10 කට මවරක්ම පවත්වන ජන සංගණනය සළකා බලමු. සෑම නිවසකටම පැමිණෙන ජනලේඛන හා සංඛ්‍යාලේඛන දෙපාර්තමේන්තුවේ නියෝජිතයෙකු ගෘහ මුලිකයාගේ නම, නිවසේ සිටින සාමාජිකයින් ගණන , එම සාමාජිකයින්ගේ නම්, වයස, රැකියාවේ යෙදේ ද නොයෙදේ ද යන්න, ජාතික හැඳුනුම්පත් අංකය ,ස්ථිර පදිංචිය ආදිය තහවුරු කර සටහන් කර ගනී.සෑම නිවසකම සංගණන අංකයක් ග්‍රාමසේවක මහතා මගින් ලබා දී ඇත.


(Image Source : https://www.google.lk/search?q=data+and+information&biw)

ශ්‍රී ලංකාවේ සෑම නිවසකින්ම පෝරම (Forms) අනුසාරයෙන් එකතු කරගනු ලබන දත්ත , සුවිශේෂ ක්‍රියාවලියකින් පසු ,ජනලේඛන හා සංඛ්‍යාලේඛන දෙපාර්තමෙන්තුව විසින් ඒවා වගුගත කර නිසි ආකාරයට තැන්පත් කරනු ලබයි.


(Source : http://www.statistics.gov.lk/PopHouSat/PDF/Population/p9p1%20Growth.pdf)

දත්ත පැවතිය හැකි ආකාර

1. ලිඛිත සටහන් (Text)  - සංඛ්‍යා (0…9) , අක්ෂර (a…z, A…Z, අ.ආ.ඇ.ඈ…), විරාම ලකුණු (:, :, ‘), විශේෂ සංකේත (#,$,@...)
2. දෘශ්‍ය (Video)
3. ශ්‍රව්‍ය (Audio)
4. රූපක (Images)

දත්ත වල ගති ලක්ෂණ

            1. සැකසීමකට භාජනය කර නොමැත.
            2. අර්ථවත් නොවේ (දත්ත දැනට පවතින ආකාරයෙන් භාවිතා කරන්නාගේ අරමුණ සම්පුර්ණ කරගත    නොහැක.).
            3. එකිනෙකට සම්බන්ධ නොවූ කොටස් ආකාරයෙන් පවතී.
            4. තීරණ ගැනීම සඳහා ප්‍රමාණවත් නොවේ.
            5. සංවිධානාත්මක ආකාරයට නොමැත (තොරතුරක් ලබා ගැනීමට තවදුරත් දත්ත සවිධානය කල යුතුයි).

දත්ත වල ස්වභාවය

දත්ත ගබඩා කර (Store) ඒවා අවශ්‍ය විටකදී නැවත නැවත ලබා ගත හැකිය (Retrieve).යම් කිසි මාධ්‍යයක් ඔස්සේ සන්නිවේදනය කළ හැකිය. සැකසීමකට (Process) භාජනය කළ හැකිය.

දත්ත වර්ගීකරණය (Classification of Data)

දත්ත ප්‍රමාණාත්මක (Quantitative) හා ගුණාත්මක (Qualitative) ලෙස වර්ගීකරණය කරනු ලැබේ.

ප්‍රමාණාත්මක දත්ත (Quantitative Data)

සංඛ්‍යාත්මක ලෙස ඉදිරිපත් කළ හැකි දත්ත ප්‍රමාණාත්මක දත්ත ලෙස හැඳින්වේ. මේවා අංක ගණිතමය ක්‍රියාවලියකට භාජනය කළ හැකිවේ. සංඛ්‍යාත්මක අනුපිළිවෙලකට (ආරෝහණ - Ascending Order සහ අවරෝහණ - Descending Order) සැකසිය හැකිය. සංඛ්‍යා විද්‍යාත්මකව සැකසිය හැකිය.

 

(Image Source : http://www.google.lk/imgres?imgurl=http://ca7science.wikispaces.com/file/view/Quantitaitve_Data2.jpg)

ගුණාත්මක දත්ත (Qualitative Data)

සංඛ්‍යාත්මක ලෙස ඉදිරිපත් කළ නොහැකි දත්තයි.

            හැඩය
            පාට
            ශබ්දය මේ සඳහා උදාහරණ වේ.


(Image Source : https://www.google.lk/search?q=data+and+information&biw)
 

ගුණාත්මක දත්ත සහ ප්‍රමාණාත්මක දත්ත (Qualitative Data vs. Quantitative Data)

(Image Source : https://www.google.lk/search?biw=1366&bih=623&tbm=isch&q=quantitative+data+and+qualitative+data)

තවත් කොටසක් බලාපොරොත්තු වන්න....