1.3 : තොරතුරු වල වියුක්ත ආකෘතිය (The abstract model of Information)

ආදානය සහ ප්‍රතිදානය යනු (Input & Output)

ආදානය (Input) යනුවෙන් පරිගණක ක්ෂේත්‍රයේදී හැඳින්වනුයේ දත්ත සහ උපදෙස් පරිගණකයට ඇත්ළු කිරීමයි. මෙය ආකාර දෙකකින් සිදු විය හැකිය. එනම් අතින් දත්ත ඇතුලු කිරීම (Manual Method) සහ ස්වයංක්‍රීයව දත්ත ආදානයයි (Automatically). මේ සඳහා විශේෂයෙන් සැකසූ උපාංග ඇත. ඒවා ආදාන උපාංග (Input Devices) නම් වේ.

යතුරු පුවරුව (Keyboard)
මූසිකය (Mouse)
සුපරීක්ෂකය / ස්කෑනරය (Scanner)
වෙබ් කැමරාව (Web Camera)
සංඛ්‍යාංක කැමරාව (Digital Camera)
මයික්‍රෆෝනය (Microphone)
තීරු කේත කියවනය (Bar Code Reader)



ප්‍රතිදානය (Output) යනුවෙන් පරිගණක ක්ෂේත්‍රයේදී හැඳින්වෙනුයේ පරිගණකය මගින් සකස් කළ තොරතුරු පිටතට ලබා දීමයි. මෙසේ ප්‍රතිදානය කරනු ලබන තොරතුරු ආකාර දෙකකින් ලබා ගත හැකිය. එනම් මෘදු පිටපතක් (Soft Copy) ලෙස සහ දෘඩ පිටපතක් (Hard Copy) ලෙස වේ. මෘදු පිටපතක (Soft Copy) අන්තර්ගතය බලාගත හැක්කේ පරිගණක තිරයක් මගින් පමණි. මෘදු පිටපත මුද්‍රණ යන්ත්‍රයක් (Printer) මගින් මුද්‍රණය කළ පසු එය දෘඩ පිටපතක් (Hard Copy) ලෙස සැලකේ. මෙය මුද්‍රිත පිටපතකි. මේ සඳහා සකසන ලද උපකරණ හඳුන්වනු ලබන්නේ ප්‍රතිදාන උපාංග (Output Devices) ලෙසයි.

සංදර්ශකය / පරිගණක තිරය (Monitor / Computer Screen)
ශබ්ද විකාශන යන්ත්‍රය (Speaker)
මුද්‍රකය (Printer)
ප්‍රක්ෂේපන යන්ත්‍රය (Projector)

දත්ත සැකසීම (Data Processing) යනු

පරිගණකයට දත්ත ආදානය (Input) කරනු ලැබේ. එසේ ආදානය කරනු ලබන දත්ත (Data) එහි මතකයේ ගබඩා කළ ක්‍රමලේඛනයක් (Program) යටතේ සකසා අර්ථවත් තොරතුරු (Information) බවට පත් කෙරේ. මෙය දත්ත සැකසීම (Process) ලෙස හැඳින්වේ. අවසානයේ දී , පරිගණකයට ආදානය කළ දත්ත සැකසීමෙන් පසු තොරතුරු ලෙස ප්‍රතිදානය (Output) කරයි.

තොරතුරු වල වියුක්ත ආකෘතිය (The abstract model of Information)

ඉහත දක්වා ඇත්තේ තොරතුරු නිර්මාණය කිරීම සඳහා යොදාගන්නා වූ ක්‍රියාවලියේ වියුක්ත ආකෘතියයි (Abstract Model). එහිදී පද්ධතිය ආදාන අග්‍රයේ දී දත්ත ලබා ගන්නා අතර ප්‍රතිදාන ලෙස තොරතුරු සැපයීම සඳහා සැකසුම් ඒකකයේ දී අර්ථාන්විත ක්‍රියා පිළිවෙලක යෙදෙයි. මෙම අර්ථාන්විත ක්‍රියා පිළිවෙල පරිගණකයට සපයනු ලබන්නේ කිසියම් ක්‍රමලේඛනයක් (Program) එහි මතකයේ (Memory) තැන්පත් කිරීමෙනි.

තොරතුරු වල වටිනාකම (Value)

තොරතුරු වල වටිනාකම එහි අදාළත්වය මත රඳා පවතියි. තොරතුරු නිර්මාණය කරන මොහොතේම හෝ ඒවා ලැබෙන මොහොතේම එයට වැඩි වටිනාකමක් ඇත. කාලය ශුන්‍ය ආසන්න වන අවස්ථාවේ දී තොරතුරු වල වටිනාකම උපරිම වේ. කාලය ගත වීමත් සමගම තොරතුරු වල වටිනාකම ක්‍රමයෙන් අඩුවී අවසානයේදී ඒවා දත්ත බවට නැවත පත්වේ.

තොරතුරු පිළිබඳ ස්වර්ණමය න්‍යාය (The Golden rule of Information)

තොරතුරු නිර්මාණය කරන මොහොතේම හෝ ඒවා ලැබෙන මොහොතේම එයට වැඩි වටිනාකමක් ඇත. කාලය ශුන්‍ය ආසන්න වන අවස්ථාවේ දී තොරතුරු වල වටිනාකම උපරිම වේ. කාලය ගත වීමත් සමගම තොරතුරු වල වටිනාකම ක්‍රමයෙන් අඩුවී අවසානයේදී ඒවා දත්ත බවට නැවත පත්වේ. මෙය තොරතුරු පිළිබඳව ස්වර්ණමය න්‍යාය (The Golden rule of Information) ලෙස හැඳින්වේ.

තොරතුරු හා සන්නිවේදන තාක්ෂණය (ICT) සඳහා පරිගණකයේ (Computer) දායකත්වය

මිනිසා තමන්ගේ එදිනෙදා කාර්යයන් පහසුවෙන්, කඩිනමින් සහ ඉතාමත්ම නිවැරදිව සිදුකර ගැනීමේ උපකරණයක් ලෙස පරිගණකය හඳුන්වා දිය හැකිය. මෙම සුවිශේෂී උපකරණය භාවිතයෙන් දත්ත තැන්පත්කිරීමට, දත්ත තොරතුරු බවට සැකසීමට, සකසන ලද තොරතුරු ගබඩා කිරීමටත්, අවශ්‍ය වූ විටක දී නැවත නැවතත් සංස්කරණ කටයුතු සිදුකිරීමටත්, සන්නිවේදන තාක්ෂණයද මුසු කරමින් සකසාගත් තොරතුරු අවශ්‍ය පුද්ගලයාට සන්නිවේදනය කිරීමේ හැකියාව පවතියි. එනම් තොරතුරු සන්නිවේදන තාක්ෂණයේ දී තොරතුරු සැකසීමට, ගබඩා කිරීම, භාවිතා කිරීම, සංචාලනය කිරීම, සන්නිවේදනය කිරීම සහ කළමනාකරණය කිරීම පරිගණකය භාවිතයෙන් සිදු කරගත හැකිවේ.

පරිගණකයක් යනු (Computer)

අප ලබා දෙන දත්ත (Data) සහ උපදෙස් (Instructions) වලට අනුව දත්ත සකස්කර (Process), තොරතුරු (Information) බවට පත්කරන විද්‍යුත් යාන්ත්‍රික උපකරණයකි. එනම් පරිගණකය යනු දත්ත තොරතුරු බවට පත්කරන ඉලෙක්ට්‍රොනික උපකරණයකි.

පරිගණකයේ සුවිශේෂීතා

1. වේගවත් බව (Speed)

පරිගණකය යනු ඉතාම වේගයෙන් ක්‍රියා කරන යන්ත්‍රයකි. විශාල කාලයක් ගතවන කාර්යය හෝ ගණනය කිරීම් පරිගණකය මගින් ඉතාම කෙටි කාලයකදී අවසන් කළ හැකිය.

උදා: අ.පො.ස සාමාන්‍ය පෙළ සහ උස පෙළ විභාග පිළිතුරු පත්‍ර පරීක්ෂා කිරීමේ සිට ප්‍රතිඵල නිකුත් කිරීම දක්වා පරිගණක යන්ත්‍ර භාවිතයෙන් ඉතාම නිවැරදිව හා ඉක්මනින් ප්‍රතිඵල නිකුත් කිරීමට හැකිවීම, ජ්න්ද ප්‍රතිඵල එක් දිනකින් නිකුත් කිරීමට හැකිවීම, රියඳුරු බලපත් සහ පුද්ගලික හැඳුනුම් පත් එක් දිනකින් ලබා ගත හැකිවීම විවිධ කාර්යයන් සඳහා පරිගණකය භාවිතයෙන් අවස්ථාව සැලසී ඇත.

2. නිරවද්‍යතාවය (Accuracy)

පරිගණකය ඉතා ඉහළ නිරවද්‍යතාවයකින් යුතුව ක්‍රියාත්මක වන උපකරණයකි. පරිගණකයෙන් දත්ත සකස් කිරීමේදී යම්කිසි දෝෂයක් සිදුවුවහොත් එය දත්ත ඇතුළු කරන්නා / පරිශීලකයා ගේ නොසැලකිල්ල හෝ අත් වැරදීමක් මත සිදුවන්නකි.

3. කර්යක්ෂමතාවය (Efficiency)

පරිගණකය විද්‍යුත් යන්ත්‍රයක් බැවින් සුදුසු වටපිටාවක ස්ථාපිත කර ඇති පරිගණකයක් කිසිදු විවේකයකින් තොරව නොකඩවා එකම වේගයෙන් / කාර්යයක්ෂමතාවයෙන් ක්‍රියා කළ හැකිය. මිනිසාට දැනෙන විඩාකාරී බව, ආතතිය වැනි රෝගී තත්ත්වයන් පරිගණකයට ඇති නොවේ.

4. බහුකාර්ය බව (Versatility)

මිනිසාට මෙන් නොව බොහෝ කාර්යය වල එකම වේලාවේදී යෙදීමේ හැකියාව පරිගණකය සතුය. එමෙන්ම එක් කාර්යයක් අවසන් වූ විගසම ඊට හාත්පසින්ම වෙනස් වෙනත් කාර්යයක නිරතවීමේ හැකියාව පරිගණකය සතු වේ.

5. තැන්පත් කිරීමේ සහ නැවත ලබා ගැනීමේ හැකියාව (Storing & Retrieving)

දත්ත සහ තොරතුරු අවශ්‍ය පමණ කාලයක් පරිගණකය තුළ තැන්පත් කර තබා ගැනීමද අවශ්‍ය විටක දී ලබා ගැනීමේ හැකියාව ද පවතියි.

6. බුද්ධිමත් නොවීම (Not Intelligent)

බුද්ධිමත් පරිගණක මේ වන විටත් නිපදවා නොමැති අතර මිනිසා මෙන් බුද්ධිය මෙහෙයවා තීරණ ගැනීමේ හැකියාවක් පරිගණක සතු නොවේ.

7. හැඟීම් හා දැනීම් නොමැති බව (No Feelings)

පරිගණකය යනු යන්ත්‍රයකි. මිනිසාට මෙන් තනිකම, පාළුව, කාන්සිය, වෙහෙස වැනි හැඟීම් දැනීම් පරිගණකයට ඇති නොවේ. මේ හේතුවෙන් අපට අවශ්‍ය කාර්යය පරිගණකය මගින් සිදු කළ හැකිවේ.

 

ආශ්‍රිත ග්‍රන්ථ : 12 - තොරතුරු සන්නිවේදන තාක්ෂණය ගුරු මාර්ග උපදේශණ සංග්‍රහය (G.C.E A/L)