1.4 - පරිගණක පද්ධතියක මූලික සංරචක තෝරා වර්ගීකරණය කිරීම. - 2 කොටස

21. මුද්‍රණ යන්ත්‍ර (Printers): පරිගණකය මගින් සකසන ලද ලේඛනයක් (Document) මුද්‍රණය කිරීම සඳහා මුද්‍රණ යන්ත්‍ර භාවිතා කරයි.

22. මුද්‍රණ යන්ත්‍ර වර්ගීකරනය : තිත් න්‍යාස මුද්‍රණ යන්ත්‍රය (ඝටන මුද්‍රණ) - Dot Matrix Printer, තීන්ත පිහිරි මුද්‍රණ යන්ත්‍රය (නොඝටන මුද්‍රණ ) – Ink Jet Printer, බුබුළු පිහිරි මුද්‍රණ යන්ත්‍රය (නොඝටන මුද්‍රණ ) – Bubble Jet Printer,  ලේසර් මුද්‍රණ යන්ත්‍රය (නොඝටන මුද්‍රණ ) – Laser Printer

23. මුද්‍රණ යන්ත්‍ර වලින් මුද්‍රිත පිටපත් ලබා ගැනීමේදී සැලකිලිමත් විය යුතු කරුණු : දෘඩ පිටපතේ ගුණාත්මක බව,  පිටපතක් සඳහා දැරිය යුතු වියදම,  පිටපතක් සඳහා ගතවන කාලය,  භාවිතයේදී නගන ශබ්දය

24. මතක උපකරණ (Memory devices) යනු: පරිගණක පද්ධතියක දත්ත, තොරතුරු සහ උපදෙස් කෙටි කාලීනව හෝ දීර්ඝ කාලීනව හෝ තැන්පත් කර තැබීම සඳහා යොදා ගන්නා උපාංගයි.

• සසම්භාවී පිවිසුම් මතකය (අභ්‍යන්තර)  - RAM (Random Access Memory)
• පඨන මාත්‍ර මතකය (අභ්‍යන්තර) – ROM (Read Only Memory)
• ආචයන උපාංග (බාහිර ) – Storage Devices

25.සසම්භාවී පිවිසුම් මතකය (අභ්‍යන්තර) – RAM: සැකසීමට භාජනය වීමට පෙර දත්ත හා උපදෙස් තාවකාලිකව රඳවා තබා ගනියි. විදුලිය නොමැති විට ක්ෂය වන මතකයකි. නෂ්‍ය මතකයකි (Volatile memory). කියවීමට හා ලිවීමට (Read / Write) හැකි මතක වේ.

26. පඨන මාත්‍ර මතකය (අභ්‍යන්තර) – ROM: පරිගණකය බල ගැන්වීමේදී අවශ්‍ය වන සුවිශේෂී උපදෙස් සමූහයක් එය නිපදවීමේදී ම ස්ථිර මතකයෙහි තැන්පත් කර ඇත. කියවීමට පමණක්(Read Only) හැකි මතකයකි. මෙහි ගබඩා කර ඇති උපදෙස් ස්ථිරාංග (Firm ware) නම් වේ.

27. ආචයන උපාංග (බාහිර) – Storage devices: දත්ත ස්ථීරවම ගබඩා කරන මාධ්‍ය වන අතර ඒවා ද්විතීයක ආචයන (Secondary storage) මාධ්‍ය නම් වේ. 

නම්‍ය තැටිය (Floppy Disk) : චුම්භක තාක්ෂණයෙන් (Magnetic technology) දත්ත ගබඩා වේ. භාවිතයේ නැත. ධාරිතාවය 1.44MB.

 සංගත තැටි (CD – Compact Disk) : ප්‍රකාශ තාක්ෂණය (Laser / Optical technology) භාවිතයෙන් දත්ත කියවීම / ලිවීම සිදුවේ. ආකාර දෙකකි. CD-R සහ CD – RW. ධාරිතාවය 700 MB.

 සංඛ්‍යාංක බහුවිධ තැටි (DVD – Digital Versatile Disk) : ප්‍රකාශ තාක්ෂණය භාවිතයෙන් දත්ත කියවීම / ලිවීම සිදුවේ. ආකාර දෙකකි. DVD-R සහ DVD – RW. ධාරිතාවය 4.7 GB.

 දෘඩ තැටි (Hard Disk) : චුම්භක තාක්ෂණයෙන් (Magnetic technology) දත්ත ගබඩා වේ. පරිගණකයේ අභ්‍යන්තරයේ දත්ත ස්ථීරව තැන්පත් කිරීම සඳහා භාවිතා කරයි. ධාරිතාවය 80GB, 500GB,1TB,2TB

 සැනෙලි මතක ධාවක (Pen Drive / USB Drive) : මේවායේ පහසුවෙන් දත්ත ලිවීම / කියවීම, රැගෙනයාම සහ ගබඩා කිරීම පහසුය. විද්‍යුත් තාක්ෂණයෙන් (Flash / Electronic) දත්ත ලිවීම සහ කියවීම සිදු කරයි. ධාරිතාවය 2GB, 32GB, 64GB

 චුම්භකිත පටි (Magnetic Tapes) : ආයතනවල , බැංකුවල, ජනසන්නිවේදන ආයතනවල විශේෂයෙන් උපස්ථ ආචයන උපාංගයක් (Backup Storage Device ) ලෙස භාවිතා කරයි. චුම්භක තාක්ෂණයෙන් (Magnetic technology) දත්ත ගබඩා වේ. ධාරිතාවය ඉතාම ඉහළයි (1TB, 2TB).

28. සන්නිවේදන උපාංග (Communication devices) යනු: පරිගණක තාක්ෂණය සහ සන්නිවේදන තාක්ෂණය සංයුක්ත කරගෙන තැනූ උපාංග වන අතර පරිගණක ජාලයක් ඔස්සේ දත්ත සම්ප්‍රේෂණයට දායක වේ.

 ජාලකරන අතුරු මුහුණත් කාඩ්පත් (NIC – Network Interface Cards), මොඩම් යන්ත්‍ර (MODEM), ජාලකරණ ස්විච (Switch), රවුටර (Router), ජාලකරණ නාභිය (HUB), Bridge

29. මොඩම් උපකරණය (MODEM): සංඥා දෙවර්ගයකි. එනම් සංඛ්‍යාංක / අංකිත සංඥා (Digital signals) සහ ප්‍රතිසම සංඥා (Analog signals) වේ.  පරිගණක දෙකක ඇති දත්ත දිගු දුර සම්ප්‍රේෂණය සඳහා මොඩම් යන්ත්‍රයක් අවශ්‍ය වන්නේ පරිගණක ක්‍රියා කරනුයේ සංඛ්‍යාංක දත්ත සමග පමණි. නමුත් දුරකථන සන්නිවේදන ජාල ක්‍රියා කරනුයේ ප්‍රතිසම සංඥා පමණි. දත්ත සන්නිවේදනයේ දී සංඛ්‍යාංක සංඥා ප්‍රතිසම සංඥා බවටත් ( මූර්ජනය - Modulation ) ප්‍රතිසම සංඥා, සංඛ්‍යාංක සංඥා බවට (ප්‍රතිමූර්ජනය - Demodulation) පරිවර්තනය විය යුතුවේ. මෙම පරිවර්තනය සිදු වන්නේ මොඩමය මගිනි.

30. පාලන හා සැකසුම් උපාංග (Control & Processing devices): පරිගණකයේ විශාලතම හා ප්‍රධානතම කාර්ය භාරයන් දෙකක් වන ගණනය කිරීම් සහ පාලන කටයුතු ඉටු කර දෙනු ලබන්නේ මධ්‍ය සැකසුම් ඒකකය (CPU – Central Processing Unit) මගිනි.