1.4 : ආදාන, ප්‍රතිදාන සහ ස්ථානීය උපාංග වර්ගීකරණය - 1 කොටස

පරිගණක දෘඩාංග වර්ගීකරණය (Classification of Computer Hardware)

පරිගණක දෘඩාංග ලෙස ආදාන උපාංග (Input Devices), ප්‍රතිදාන උපාංග (Output Devices), මතක උපාංග (Memory Devices), පාලන හා සැකසුම් උපාංග (Control & Processing Devices) සහ සන්නිවේදන උපාංග (Communication Devices) ලෙස වර්ග කොට දැක්විය හැකිය.

ආදාන උපාංග (Input Devices) යනු

පරිගණකයට දත්ත සහ උපදෙස් ඇතුලු කිරීම සඳහා යොදා ගන්නා උපාංග ආදාන උපාංග නම් වේ. මූසිකය (Mouse), යතුරු පුවරුව (Keyboard), සුපරීක්ෂකය/ ස්කෑනරය (Scanner) , තීරු කේත කියවනය (Bar Code Reader), මයික්‍රෆෝනය (Microphone), සංඛ්‍යාංක කැමරාව (Digital Camera), වෙබ් කැමරාව (Web Camera), මාර්ග ගුලාව (Track Ball), ආලෝක පෑන (Light Pen), Joysticks, Pointing Stick, Touch Pad , Touch Screen, Digitizer (Graphic Tablet)

මූසිකය  / මවුසය (Mouse)

පරිගණකයට දත්ත (Data), උපදෙස් (Instructions) ලබා දීම සඳහා භාවිතා කරනු ලබන උපාංගයකි. මෙහි පිහිටීම දර්ශකයක් (Pointer) ලෙස සංදර්ශක තිරයේ (Desktop) දිස්වේ. මවුසය එහා මෙහා ගෙන යාමෙන් (Drag) අපට පරිගණකයේ ඇති වැඩසටහන් / උපදෙස් පහසුවෙන් ක්‍රියාත්මක කළ හැකිය. මෙහි වම් (Left) සහ දකුණු (Right) ලෙස බොත්තම් (Buttons) දෙකක් දැකිය හැකිවේ. වර්ථමානයේ විවිධ තාක්ෂණයන්ගෙන් සමන්විත මූසික වෙළඳපොළේ දැකගත හැකි අතර රැහැන් සහිත (Wired) හෝ රැහැන් රහිත (Wireless) ලෙස ආකාර දෙකකි. මූසිකය මධ්‍ය සැකසුම් ඒකකයට සවි කරනු ලබන්නේ PS/2 කෙවෙණි හෝ USB කෙවෙණි මගිනි. ස්ථානීය උපාංගයකි (Pointing Device).

යතුරු පුවරුව (Keyboard)

පරිගණකයට දත්ත (Data), උපදෙස් (Instructions) ලබා දීම සඳහා භාවිතා කරනු ලබන උපාංගයකි. මෙහි A සිට Z දක්වා a සිට z දක්වා ,0 සිට 9 දක්වා අනුලක්ෂණ (Characters) ඇති අතර ! @ # $ % ^ & * ( ) වැනි විශේෂ අනුලක්ෂණ (Special Characters) ද දැකිය හැකිවේ. මානව භාෂාවන්ගෙන් (Human Languages) සමන්විත අකුරු පරිගණකයට වටහා ගත හැකි භාෂාවන්ට (Machine Languages) පරිවර්ථනය කිරීම සඳහා යතුරුපුවරු විවිධ වූ කේත (Codes) ක්‍රම භාවිතා කරයි. මෙහි තිබෙන යතුරු තද කිරීම මගින් ඊට ආවේණික විදුලි සංඥාවක් (Electrical Signal) සකසනයට ලැබේ. සකසනය (Processor) එම සංඥාව ASCII (American Standard Code for Information Interchange) කේතකය බවට පරිවර්තනය කර පරිගණක පද්ධතියට අදාල ආදානය ලබා දේ. අද වෙළඳ පොළෙන් රැහැන් සහිත මෙන්ම රැහැන් රහිත යතුරු පුවරු මිලදී ගත හැකිය.

මයික්‍රෆෝනය (Microphone)

පරිගණකයට ශ්‍රව්‍ය / ශබ්ද වැනි දේ ආදානය කිරීම සඳහා මයික්‍රෆෝනය යොදා ගනියි. මව්පුවරුවේ ඇති Mic in  නම් වූ කෙවෙණිය මේ සඳහා යොදා ගනියි.

සංඛ්‍යාංක කැමරාව (Digital Camera)

පරිගණකයට දෘෂ්‍ය මාධ්‍ය ගොනු (Video Files) / සංඛ්‍යාංක රූපක (Digital Images / Photos) ආදානය කිරීම සඳහා සංඛ්‍යාංක කැමරාව භාවිතා කරයි. මෙම උපාංගය පරිගණකයට සම්බන්ධ කිරීම සඳහා USB  ( Universal Serial Bus) කෙවෙණි භාවිතා කරයි.  

ජායාරූප ගබඩා කිරීමේ තාක්ෂණය අනුව කැමරා වර්ග දෙකක් ඇත.

1. සේයා පටල කැමරා (Manual Type)
2. සංඛ්‍යාංක කැමරා (Digital Camera)

සංඛ්‍යාංක කැමරාවක මතකයේ තැන්පත් වී ඇති ජායාරූප පරිගණකයට ආදානය කල හැකි නිසා සංඛ්‍යාංක කැමරාවද ආදාන උපාංගයකි. සංඛ්‍යාංක කැමරා ද වර්ග දෙකකින් යුක්ත වේ. එනම්,

1. නිෂ්චල ජායාරූප (Images / Photos) සංඛ්‍යාංක කැමරා
2. චලන ජායාරූප (Videos) සංඛ්‍යාංක කැමරා

අද වෙළඳ පොළේ විවිධ මාදිලියේ සංඛ්‍යාංක කැමරා දැකිය හැකි අතර ජංගම දුරකථනය (Mobile Phone) තුළ ද සංඛ්‍යාංක කැමරා දැකිය හැකිය.

වෙබ් කැමරාව (Web camera)

වෙබ් කැමරා යනු චලන රූප සංඛ්‍යාංක ලෙස සජීවීව විකාශනය කිරීමට යොදා ගන්නා කැමරා වර්ගයකි. මේවා කරලියට පැමිණීමත් සමගම,

1. අන්තර්ජාල දුරකථන සම්බන්ධතාවයක දී පුද්ගලයින් සජීවීව දිස්වීම සඳහා (Internet Telephony)
2. වීඩියෝ සම්මන්ත්‍රණ පැවැත්වීමට (Video Conferencing)

ආදී ලෙස සන්නිවේදන තාක්ෂණයේ නව පිටුවක් පෙරලිනි. මෙම වෙබ් කැමරා වෙළඳ පොළෙන් මිලට ගෙන USB (Universal Serial Bus) කෙවෙනි හරහා බාහිරින් පරිගණකයට සම්බන්ධ කල හැකිවේ. එසේම වෙබ් කැමරා සවි කරන ලද නවීන උකුල් පරිගණක (Laptop Computers) ද වෙළඳ පොළේ දැකගත හැකිය.

තවත් කොටසක් බලාපොරොත්තු වන්න...