2.1: පරිගණක පරම්පරාවන් සහ භාවිත කළ තාක්ෂණික උපාංග

පරිගණක පරම්පරාවන් සහ භාවිත කළ තාක්ෂණික උපාංග

රික්තක නලය ( Vacuum Tube)

19 වන සියවසේ මුල් භාගයේ ඇමරිකාවේ ජීවත් වු ද ෆොරස්ට් නම් වූ විද්‍යාඥයා විසින් රික්තක නලය නිපදවන ලදී. මුල් කාලයේ දී රික්තක නල අතිශය ජනප්‍රිය උපාංගයක් විය.මුල් කාලයේ බිහි වූ පරිගණක රික්තක නල භාවීතා කර නිපදවීය. දැනට භාවිතයේ පවතින පරිගණක හා සසඳන කල රික්තක නල භාවිතයෙන් තනන ලද පරිගණක යන්ත්‍ර වල දුර්වලතා විශාල ප්‍රමාණයක් තිබිණි.

ට්‍රාන්සිස්ටරයේ උපත (Transistor)

1947 දී ට්‍රාන්සිස්ටරයේ උපත සමග පරිගණකයේ පළමු පරම්පරාව අවසාන විය (1940- 1956). ට්‍රාන්සිස්ටර යොදාගෙන තැනූ පරිගණක දෙවන පරම්පරාවේ පරිගණක නම් වේ. ට්‍රාන්සිස්ටර සොයා ගැනීමට පෙර පරිගණක නිපදවීමට භාවිත කළේ ඉලෙක්ට්‍රොනික වෑල්වය. මේවා ක්‍රියා කිරීමේදී අධික තාපයක් නිකුත් වූ බැවින් රත්වී පිලිස්සී යාම නිසා බොහෝ ගැටළු ඇතිවිය. ට්‍රාන්සිස්ටර පැමිණීමත් සමගම මෙම කරදරකාරී තත්වය බොහෝදුරට අඩුවිය.

ට්‍රාන්සිස්ටරය යනු අර්ධ සන්නායක උපාංගයක් වන අතර එය වර්ධකයක් ලෙස සහ ස්විචයක් ‍ලෙස භාවිතා කරනු ලැබේ. තවද පරිගණකවල, ජංගම දුරකථන වල සහ අනෙකුත් සියලුම විද්‍යුත් උපකරණ වල භාවිතා වන මූලික විද්‍යුත් පරිපථ උපාංගයක් ලෙසද මෙය සැලකිය හැකිය. ට්‍රාන්සිස්ටරයේ ඇති ඉක්මන් ක්‍රියාකාරිත්වයත්, නිරචද්‍යතාවයත් නිසා විවිධවූ කාර්යයන් සදභා මෙය යොදා ගනු ලබන අතර උදාහරණ ලෙස ධාරා වර්ධනය,වෝල්ටීයතා වෙනස්කිරීම්, සංඥා සැකසීම සහ දෝළක සැලකිය හැකිය. ට්‍රාන්සිස්ටර තනි ඇසුරුමක ආකාරයෙන් සහ සංගෘහිත පරිපථ වල අභ්‍යන්තර කොටසක් ලෙසද නිර්මාණය කර ඇත. සංගෘහිත පරිපථ වල අභ්‍යන්තරයේ මෙවැනි පරිපථ බිලියන ගණනක් පවතී. (Wkipedia)

තර්ක කුල (Logic Families)

පරිගණක විද්‍යාවේදී තර්ක කුල (Logic Families) ලෙස හඳුන්වනු ලබන්නේ ඉලෙක්ට්‍රොනික තාර්කික ද්වාර (Logic Gates) කිහිපයකින් සැදුම්ලත් පරිපථයක් (Circuit) හෝ පරිපථ සැකසුමකි (Circuit Design). පහත උදාහරණ සළකා බලන්න.

1. Diode Logic / Diode Resistor Logic (DL / DRL)
2. Direct Coupled Transistor Logic (DCTL)
3. Resistor Transistor Logic (RTL)
4. Resistor Capacitor Transistor Logic (RCTL)
5. Diode Transistor Logic (DTL)
6. Emitter Coupled Logic (ECL)
7. Transistor Transistor Logic (TTL)
8. CMOS Logic (Complementary Metal Oxide Semiconductor)

අනුකලිත පරිපථ වල පැමිණීම (IC – Integrated Circuits)

1964 දී ට්‍රාන්සිස්ටර (Transistor) වල එකතුවෙන් සැදුම්ලත් අනුකලිත පරිපථ (IC – Integrated Circuits) වල පැමිණීමත් සමගම පරිගණක ප්‍රමාණයෙන් සහ මිලෙන් අඩුවූ අතර ඒවායේ වේගය වැඩිවිය. මෙවා තුන්වන පරම්පරාවේ පරිගණක නම් වේ. කල්යත්ම අනුකලිත පරිපථ දහස් ගණනකින් කෙරෙන කාර්යය ඉටු කිරීමට සමත් සිලිකන් චිප (Silicon Chips) නිපදවීමට ඉලෙක්ට්‍රොනික තාක්ෂණය දියුණු විය. මෙහි ප්‍රතිඵලයක් ලෙස පහත චිප (Chips) බිහිවිය.

LSI – Large Scale Integration
VLSI – Very Large Scale Integration

ක්ෂුද්‍ර සකසනයේ පැමිණීම (Micro Processor)

මෙම කාලවකවානුවේදී දහස් ගණන් අනුකලිත පරිපථ (IC), සිලිකන් චිපයක් (Silicon Chip) තුළ තැන්පත් කිරීමට තරම් තාක්ෂණය දියුණු වීමත් සමගම ක්ෂුද්‍ර සකසනය (Micro Processor) බිහිවිය. මේවා යොදාගෙන නිර්මාණය කළ පරිගණක වල වේගය හා කාර්‍යක්ෂමතාවය ඉතාම ඉහළ වූ අතර මිල හා ප්‍රමාණය ක්‍රමයෙන් අඩුවිය. හතරවන පරම්පරාවට අයිති මෙම පරිගණක භාවිතා කරන්නාට ඉතා සිත් ඇදගන්නා සුළු ආකර්ෂණීය වූ චිත්‍රක අතුරු මුහුණත් (GUI – Graphical User Interfaces) යොදා නිර්මාණය කළ ඒවා විය.

සකසන (Processors) නිෂ්පාදනය කරන ආයතන

Intel, AMD, Cyrix, Motorola, NEC 

පස්වන පරම්පරාව / පරිගණක තාක්ෂණයේ අනාගත දිශානති  / අභිමතාර්ථ (5^th Generation Computers)

බුද්ධිමත් මිනිසකුගේ ක්‍රියාකාරිත්වයට බොහෝ සෙයින් සමාන පරිගණකයක් නිපදවීම වර්තමාන විද්‍යාඥයින්ගේ අරමුණයි. පරිගණක විද්‍යාවේදී මෙම ක්ෂේත්‍රය කෘතීම බුද්ධිය නම් වේ.එකම අවස්ථාවේදී වෙනස් සිතිවිලි කිහිපයක් කෙරෙහි අවධානය යොමු කර තීරණ ගැනීම, කටහඬවල් වෙන වෙනම හඳුනා ගැනීම වැනි සංකීර්ණ ක්‍රියාදාමයන් මිනිසාට සිදු කළ හැකිය. රොබෝ තාක්ෂණය, ස්වයංක්‍රීය වාහන නිඅදවීම වැනි ක්‍රියාදාමයන් දැනටමත් කෘතීම බුද්ධිය (AI – Artificial Intelligence) මගින් සිදු කර ඇත.

අණුක පරිගණක (Molecular Computers / DNA) වැනි ජෛව පරිගණක තාක්ෂණයන් පිළිබඳ සංකල්ප දැනටමත් බිහිවෙමින් පවතින අතරම අනාගතයේදී ඒවා යතාර්ථයක් බවට පත්විය හැකිය.