කතරගම වන්දනාවේ යාම

 කතරගම වන්දනාවේ යාම

කොලඹ ඉඳන් කතරගමට යා හැකි ප්‍රධාන මාර්ග 2ක් තියෙනවා.

රත්නපුර හරහා

230km ක් පමණ වූ මේ මාර්ගයේ යන්නේ නම්, හොරණ හෝ අවිස්සාවේල්ල හරහා රත්නපුරයට පැමිණිය යුතු වෙනවා. එතැනින් පැල්මඩුල්ලට පැමිණි විට කතරගමට තවත් 150km ක දුරක් තියෙනවා. එතැනින් කහවත්ත, ගොඩකවෙල, පල්ලෙබැද්ද, කොළඹගේආර , තිබොල්කැටිය ආදී නගර පසු කරමින් උඩවලවට පැමිණිය යුතුයි. එතැන්සිට තණමල්විල හන්දිය දක්වා ඇත්තේ තරමක් ප‍ටු, ඍජු, නමුත් හොඳින් පිලිසකර කල මාර්ගයක්. මාර්ගයේ දිග 30km ක්. තණමල්විල හන්දියෙන් දකුණට හැරී වීරවිල මාර්ගයේ ඔබ ලුණුගම්වෙහෙරට ලඟාවිය යුතුයි. එතැන් සිට තවත් 20km ක දුරින් කතරගම නගරය පිහිටා තියෙනවා.

මාතර හරහා 

284km ක් පමණ වූ මේ මාර්ගයේ යන්නේ නම්, 161km ක් පමණ දුර ගෙවා ගාල්ල හරහා මාතරට පැමිණිය යුතුයි. අධිවේගී මාර්ගය නිසා ඊට වැඩිවේලාවක් යන්නේ නෑ. මාතර සිට තවත් 123km පමණ දුරකින් කතරගම නගරය පිහිටා තියෙනවා.ඒ මඟ යන අතරමගදී ඔබට මාර්ගය දෙපස විදුලි වැටෙන් එහා සිට ආහාර යදින අලින් දැක ගැනීමට පුලුවන්.

 සිතුල්පව්ව විහාරය

 එය පිහිටල තියෙන්නෙ කතරගම සිට 18km දුරින්. නමුත් අපි ගියේ තිස්සමහාරාමය හරහා. තිස්සමහාරාමයේ සිට සිතුල්පව්වට 35km ක් තියෙනවා. ඒක ඉතාමත් දුෂ්කර ගමනක්. යන්නට තියෙන්නේ තාර නොදැමූ ගුරු පාරකින්. රුහුණු ජාතික වනෝද්‍යානය මධ්‍යයේ පිහිටි ඓතිහාසික සිතුල්පව්ව රජමහා විහාරය අවුරුදු 2200ක් පැරණියි. කාවන්තිස්ස රජතුමා විසින් කරවන ලද මෙහි මහ රහතන්වහන්සේලා 12000ක් වැඩ සිටි බව සඳහන් වෙනවා. මේ ස්ථානයේ දාන ශාලා, ධර්ම ශාලා , උපෝසථ ශාලා, ගිමන්හල්, සක්මන් මළු, පැන් පොකුණු ආදී කෞතුක වස්තූන් බොහෝ ප්‍රමාණයක් තියෙනවා.කතරගම දේවාල භූමියට නුදුරින් ඇති කිරි වෙහෙරත් කතරගම එන බැතිමතුන් අනිවාර්යයෙන් යන තැනක්. අධික අව් රශ්මියක් පවතින නිසා මෙය වැඳපුදා ගැනීමට සුදුසුම වන්නේ උදෑසන හෝ රාත්‍රී කාලයේදීයි.මෙකී භූමිය බුදුරජානන් වහන්සේගේ පාද ස්පර්ෂය ලද ස්ථානයක් ලෙස සැලකෙන අතර, කේෂධාතූ නිදන් කර කිරිවෙහෙර ඉදිකර ඇති බවත්, එහි පවත්නා බෝධිය අනුරාධපුර ජයශ්‍රීමහ බෝධීන් වහන්සේ රෝපනය කරන අවස්ථාවේ හටගත් අෂ්ඨඵල බෝධි අංකුරවලින් එක් අංකුර බෝධියක් බවත් ජනප්‍රවාදයේ සදහන් වෙනවා.

ඉන්පසු අපි ගියේ සෙල්ලකතරගම. සෙල්ලකතරගමට කතරගම නගරයේ සිට වැඩිදුරක් නෑ. මහසෙන් රජු විසින් කරවන ලදැයි සැලකෙන මහසෙන් මහා සෑය පිහිටල තියෙන්නෙත් මේ කතරගම භූමියේමය.