ලේසියෙන් ජයගන්න
වර්තමාන අධ්‍යාපන ක්‍රියාවලිය තුළ 5 වසර ශිෂ්‍යත්ව විභාගය, අධ්‍යයන පොදු සහතික පත්‍ර සාමාන්‍ය පෙළ විභාගය, අධ්‍යන පොදු සහතික පත්‍ර උසස් පෙළ යන කඩයිම් පසුකරන්නට දරුවන් හා දෙමාපියන් නොනවතින තරඟයක යෙදී සිටිති. අප කිසිවෙකුටවත් මෙම අධ්‍යාපන ක්‍රියාවලියෙන් මිදී පලා යා නොහැකි ය. අධ්‍යාපනය වෙනුවෙන් මෙම කඩයිම් සියල්ලම පසු කළ යුතුය.
රැකියාවක් සඳහා ඇති සුදුසුකම් අතර මෙම විභාග ජයග්‍රහණය මූලික තැනක් ගනී. අධ්‍යාපන ක්‍රියාවලියේ විභාග සඳහා ඔබ හුරුපුරුදු විය යුත්තේ කෙලෙසක ද යන්න පිළිබඳව මේ හරහා අවබෝධයක් ලබා දීමට උත්සාහ කරමි. අධ්‍යාපනය ලබන අවදියේ දී ඔබගේ වගකීම වන්නේ සාර්ථක ලෙස අධ්‍යාපන කටයුතුවල නිරත වීමය. ඒ සඳහා ඔබ විසින්ම පසුබිම සකස් කරගත යුතුය.
''ඔව්, මට පුළුවනි..'' යන්න ජීවිතයේ ආදර්ශ පාඨය කරගන්න.
මුලින්ම අධ්‍යාපනය තුළ විභාග ජයග්‍රහණය කිරීමට ඔබ ඉලක්කයක් ඇති කරගත යුතුය. එම ඉලක්කය කරා යාමට උනන්දුවක් ඇති කර ගත යුතුය. අලසකම දුරු කළ යුතු ය. ඔබට අලසකමක් ඇති වෙන සෑම විටම මෙන්ම ඔබ මානසිකව කඩා වැටෙන සැමවිටම "ඔව් මට පුළුවනි, මා මාගේ ඉලක්කය වෙත කෙසේ හෝ යමි.මගේ අනාගතය සාර්ථක කර ගනිමි" යනුවෙන් තමන්ටම ප්‍රතිඥා ලබාදෙන්න.
මෙම ඉලක්කය කුඩා කල සිටදීම ඇති කරගත යුතුය. කුඩා කල බොහෝ දරුවන්ගෙන් අනාගතයේ නිරත වීමට කැමති රැකියාව විමසූ විට බොහෝ දරුවන් පිළිතුර වශයෙන් තමන් වෛද්‍යවරයෙක් හෝ ඉංජිනේරුවරයෙක් හෝ නීතිඥයෙකු වීමට කැමති බව ප්‍රකාශ කරති. ඒ ආකාරයෙන් ඔබ අනාගතයේ දී නිරත වීමට කැමති රැකියාව පිළිබඳ නිතරම මෙනෙහි කරන්න.
"මම අනාගතයේදී වෛද්‍යවරයෙක් වෙමි "
"මම අනාගතයේ දී ඉංජිනේරුවරයෙක් වෙමි"
"මම අනාගතයේදී විද්‍යාඥයෙකු වෙමි"
"මම අනාගතයේ දී නීතිඥයකු වෙමි"
"මම අනාගතයේදී දක්ෂ ව්‍යාපාරිකයෙකු වෙමි''
මේ ආකාරයට පාඨයක් ඔබ පාඩම් කරන මේසය ඉදිරිපිට අලවාගන්න. නිරන්තරයෙන් එය කියවන්න. සෑම විටම එය ඇස ගැටීමට සලස්වන්න. එවිට එය ඔබගේ මනසේ තැන්පත් වනු ඇති. ඔබගේ ඉලක්කය කරා යාමට එය ඔබට උදව්වක් වනු ඇත.
අධිෂ්ඨානය ඇත්නම් මිනිසාට කළ නොහැකි කිසිවක් නැත.
සාර්ථක ලෙස අධ්‍යාපනය හැදෑරීමට නොහැකි වුවහොත් ඔවුන්ට මුළු ජීවිතයම අප්‍රසන්න එකක් වනු ඇත. තමන්ගේ අඩු සුදුසුකම් රැකියාවක් සඳහා ප්‍රමාණවත් නොවුණු විට මුළු ජීවිතේම කණගාටුවීමට සිදුවේ. එම නිසා උසස් ප්‍රතිඵල අපේක්ෂාවෙන් ඔබ අධ්‍යාපනයේ නියැලෙන්න. මේ සඳහා ඔබට ඔබ කෙරෙහි විශ්වාසයක් ඇතිකර ගතයුතු වේ. ඔබට බොහෝ දේ කළ හැකිය.
අහසේ ගමන් කරන ගුවන් යාන, මුහුදු පත්ලේ ගමන් කරන සබ්මැරීන , දුම්රිය, පරිගණක, රොකට්ටු, චන්ද්‍රිකා, දුරකතන, මෝටර් රථ, රූපවාහිනි යනාදී විශ්මිත නිර්මාණයන් නිර්මාණය කර ඇත්තේ මිනිසා ය. ඒ සියලු නිර්මාණයන් බිහි වූයේ මිනිසා සතුව තිබූ නොපසුබට උත්සාහය නිසයි. එවන් දෑ කරන මිනිස් පවුලේ සාමාජිකයෙකු වන ඔබට අධ්‍යාපනය එතරම් අපහසු දෙයක් නොවේ.
කිසිවක් හෙටට කල් නොදමන්න.
අද කළ යුතු දේ හෙටට කල් දමන්නා කම්මැලියෙකි. ලෝකය තුළ ඔබට අවශ්‍ය කරන ඕනෑම දෙයක් ලබා ගැනීමට නම් අප්‍රතිහත ධෛර්යයෙන් සහ අලසකමින් තොරව එම අරමුණ කරා යා යුතු ය. කිසිවිටෙකත් වැඩකටයුතු වැඩ කටයුතු හෙටට කල් නොදමන්න.
''සෑම මිනිසෙක්ම තමාගේ අනාගත මාලිගාවේ ගෘහ නිර්මාණ ශිල්පියා'' යැයි කියමනක් තිබේ.
විභාගයට මුහුණ දිය යුත්තේ ඔබ ය. ඒ සඳහා පාඩම් කළ යුත්තේ ද ඔබ ය. එම නිසා නිරතුරුම ඔබව විශ්වාස කරන්න. ආත්ම විශ්වාසය වර්ධනය කර ගන්න. ඔබ වපුරන ආකාරයට අස්වැන්න ලැබෙනු ඇත.
ජයග්‍රාහි ගමන අරඹන්න.
තමන්ගෙ කටයුතු නොයෙකුත් බලවේගයන්ට පවරා නිහඬව නොසිටින්න. වාසනාව විසින් ඔබව ජයග්‍රහණය කරා ගෙන යන තුරු නොසිට ඔබ ඔබගේ දෛවය ලියා ගැනීමට උත්සාහ කරන්න. ක්‍රියාත්මක නොවුනොත් කිසිම කෙනෙකුට ස්වභාව ධර්මයෙන් පවා කිසිදු උපකාරයක් නොලැබේ.
මිනිසා ක්‍රියාත්මක වන්නේ සිතුවිලි වලිනි. හොඳ සිතිවිලිවලින් හොඳ අරමුණු කරා යාම අපහසු කාර්යයක් නොවේ. ඉහත ආකාරයේ ධනාත්මක ආකල්ප පවත්වා ගැනීමෙන් පසුව එය ඔබේ ගමනට ආශිර්වාදයක් කරගෙන ඔබගේ නොනවතින ගමන අරඹන්න.
