මතකය රදවා ගැනීමට නොහැකි වීම වියපත් වූවන්ට පමණක් සිමාවේ යැයි අප සිතුවත් එසේ වන්නේ නැත. බාල වියේදී වගේම තුරුණු වියේදී ද මතකය රදවා ගැනීමේ දුර්වලතා මතුවීමට පුළුවන්. අලුත් වාරයේ අලුත් පන්තියකට සුබ මොහොතින් පියනැගූ ඔබට ද මෙම ගැටලුව තිබෙනවා විය හැකිය. එම නිසා අලුත් අවුරුද්දේ පාඩම් වැඩ කටයුතු සාර්ථකව කර දෙමාපියන්ගේ අහිංසක ඇස් වලට සතුටු කදුළක් එක් කිරීමේ ඔබගේ අධිෂ්ඨානය සර්ව ප්‍රකාරයෙන් සාර්ථක කර ගැනීමටයි මේ අපගේ අත්වැල. විභාග සමත් වීමට පාඩම් කිරීම අතාවශ්‍ය කරුණකි. පාඩම් දීර්ඝකාලිනව පවත්වා ගැනීමට හොද මතකයක් පවතිය යුතු ය. යම් කරුණක් සාදාර්ණය කරගැනීම, මතකය තබාගැනීම එක් එක් දරුවාගේ ස්වාවය අනුව වෙනස් වෙයි. නමුත් මෙම විවිධත්වය තුළ ඇතැම් දරුවන්ට මතක තබා ගැනිමේ දුර්වලතාවය ප්‍රබල ලෙස පවතී. ඇතැම් දරුවන්ට පාඩම් කරන ස්වභාවය, අවට පරිසරය, එක් එක් පුද්ගලයින්ගේ බාහිර බලපෑම් නිසා පාඩම් වැඩ කටයුතු කිරීමට නොහැකි වෙයි.

ඒ නිසා මතකය දීර්ග කාලීනව රදවා ගැනීමට නිවැරදි ක්‍රමවේදයක් අනුගමනය කිරීම වැදගත් ය.යම් කරුණක් නැවත නැවත මෙනෙහි කිරීමෙන් එය දීර්ග කාලීනව මතකයක් වන බව මනෝ විද්‍යාත්මක මතයයි. ඒ නිසා යම් පාඩමක් පාඩම් කර අවසන් කළා නම් එම පාඩම කැටිකොට කෙටි සටහනක් ලෙස සකස් කොට තබා ගැනීම ඉතා වැදගත් ය. එම කෙටි සටහන විටින් විට පරිශීලනය කිරීම තුලින් සම්පුර්ණ පාඩමක් පිළිබද ඉතා හොද දැනුමක් ලබා ගතහැකි ය. ඒ වගේ ම ඔබ පාඩම් කිරීමට සැරසෙනවා නම් හොද නිරවුල් මනසක් පවත්වා ගැනීම අතාවශ්‍ය කරුණකි. ඔබ පාඩම් කරන ස්ථානය පවුලේ අනිත් සාමාජිකයන් ව හොදින් දර්ශනය නොවන තැනක් වීම වැදගත් ය. ඒ වගේ ම නිවස අසල සෙල්ලම් පිට්ටනියක් නම් එයට පිටුපා හෝ එය ද්ර්ශනය නොවෙන තැනක සිට පාඩම් කිරීම ඇරබීම මතකය රදවා ගැනීම පහසු කරවයි. ඒ වගේ ම පාඩම් කටයුතු කරන විට නිතර නිදිමතක් දැනේ නම් ඇද නොපෙනෙන ස්ථානයක සිට පාඩම් වැඩ ඇරබීම ඉතා සුදුසු වේ. පාඩම් කිරීමට සුදුසු රාත්‍රි කාලයේදී ද, නැතිනම් උදේ කාලයේදී ද, යන්න බොහෝ දෙනාට තිබෙන ගැටලුවකි. මෙම කාලය එක් එක් දරුවා අනුව වෙනස් වෙයි.

ඒ නිසා වඩාත් ම සුදුසු තමන් පුරුදු පුහුණු වුණු කාලයේ පාඩම් වැඩ කටයුතු ඇරඹීමයි.සාමාන්‍යයෙන් රාත්‍රි කාලයේ දී පාඩම් කර වැඩි වෙලාවක් නින්දට වැටුණු විට පාඩම් ක්‍රමානුකුල ව මොලයේ ගබඩා වන බව මනෝ විද්‍යාත්මක මතයයි. නමුත් උදෑසන පාඩම් කිරීම ද යෝග්‍ය වන්නේ නිරවුල් මනසකින් වගේම ප්‍රබෝදමත් ව පාඩම් වැඩ ඇරබිය හැකි නිසා ය. මේ නිසා තමන්ට පහසු යම් කල පරාසයක් තෝරා ගෙන එකී කලයේ පාඩම් කිරීමට පුරුදු පුහුණු වීමෙන් මතකය දීර්ඝකාලීන ව පවත්වා ගැනීමට හැකියාව ඇත. “ කොච්චර වෙලා පාඩම් කළත් හැමදාම පාඩම් කරලා තියෙන්නේ එකම පාඩමනේ....” බොහෝ දරුවන්ට පවතින ගැටලුව එයයි. ඒ නිසා ඔබ පාඩම් කිරීමට සැරසෙනවා නම් කොපමණ කාලයක් පාඩම් කරනව ද එකී කාලයේ දී පාඩම් කොපමණ ප්‍රමානයක් අවරණය කරනව ද? යන්න දළ වැටහීමක් පැවතිය යුතු ය. ඒ වගේම එක දිගට පාඩම් කිරීමට අපහසු නම් විනාඩි 45 පමණ පාඩම් කර විනාඩි කිහිපයක විවේකයක් ගැනීමෙන් විෂය කරුණු මතක තබා ගැනීම වඩා පහසු වෙයි. වඩා ප්‍රබෝදමත් ව සතුටින් සිටින අවස්ථාවල අසීරු පාඩම් වගේ ම අකමැති විෂයයන් පාඩම් කිරීමට යොදාගැනීම තුලින් පාඩම් කිරීම විනෝදාංශයක් තරමට ම අපට සමීප වෙයි.