සාමාන්‍ය පෙල විභාගය නිසැකවම ජයගන්නා ආකාරය
නංගියේ මල්ලියේ,
අ.පො.ස සාමාන්‍ය පෙල විභාගය දැන් ඔයාලගෙ අත ළගටම ඇවිත්. ගතවෙන හැම තත්පරේම ඔයාලා විභාගයට ලං වෙනවා. ඔයාලා මේ ලිපිය කියවන මොහොතෙදිත් ඔයාලා විභාගයට ටික ටික ලං වෙනවා. ඉතින් මම හිතුවා විභාගයට කලින් ඔයාලා කොහොමද සූදානම් වෙන්න ඕනේ, විභාගයට මුහුණ දෙන්න ඕනේ කොහොමද, විභාගෙන් පස්සේ ඔයාලා මොනවද කරන්න ඕනේ කියලා ඔයාලව පොඩ්ඩක් දැනුවත් කරන්න. ඇත්තටම සාර්ථකව විභාගයට මුහුණ දෙන්න පුලුවන් මම දැන් ඔයාලට කියන්න යන කරුණු හිතට අරගෙන මේ ඉතුරු මාස කිහිපයේ වැඩ ටික කලොත්. ඉතින් විශ්වාසයෙන් මෙම ලිපිය කියවන්න. ඔයාලා සාර්ථක වෙනවමයි.
මුලින්ම මම ඔයාලට කියලා දෙන්න යන්නේ විභාගයට කලින් ඔයාල මොනවාද කරන්න ඕනේ කියලා. දැන් ඉතින් ඔයාලා කියයි විභාගයට කලින් අපි කරන්න ඕනේ පාඩම් කරන එකනේ කියලා. ඇත්තටම ඔව්. ඔයාලා හරියට පාඩම් කලේ නැත්තම් ඔයාලට සාර්ථකව විභාගයට මුහුණ දෙන්න බෑ තමයි. එත් පාඩම් කරන එකට අමතරව ඔයාලා තව පොඩි පොඩි වැඩ වගයක් කලොත් අනිවාර්යෙන්ම ඔයාල මුහුණ දෙන මෙම විභාගයෙන් ඔයාල හිතුවටත් වඩා හොද ප්‍රතිඵලයක් ලබා ගන්න පුළුවන් වෙනවමයි. නංගියේ මල්ලියේ මම ඉස්සෙල්ලත් කිවුවානේ විභාගයට තව මාස හතරයි. ඉතින් ඔක්කොටම කලින් ඔයාලා මේ මාස හතරේ ක්‍රමවත් විදිහට කාලය කලමනාකරණය කර ගත්තොත් වැඩේ ගොඩ. මේ මාස හතරේ ඔයාලට තියෙන්න ඕන එකම අරමුණ විභාගය විතරමයි. අනිත් හැම දේකින්ම මේ මාස හතරේදී අයින් වෙන්නනම් වෙනවා. පුළුවන්නම් මම මෙ කියන විදිහට දවසේ වැඩ ටික කරන්න.
දැන් නිවාඩු කාලේ නිසා ඔයාලට උපරිම ප්‍රයෝජනයක් ගන්න පුලුවන් මේ මාසෙදි. අමතර පංති නැති හැම දවසකම මම මේ කියන විදිහට වැඩ ටික කරන්න පුළුවන්නම් ඇත්තටම ඔයා සාර්ථකයි. උදේ පාන්දර 4 ට අවදි වෙන්න. ඊට පස්සේ උණු උණු තේ එකක් බීලා, මුහුණ හෝදගෙන පාඩම් කරන තැනට අවිත් ඉදගන්න. ඊට පස්සේ ඔයා පාඩම් කරන පොත් ටික අරගන්න. මෙන්න මේකත් මතක තියාගන්න. ඔයාගේ මේසේ උඩ තියෙන්න ඕනේ ඔයා පාඩම් කරන විෂයට අදාල පොත් ටික විතරයි. අනිත් විෂයන් වල පොත් ටික ඔයාට පේන්න ගොඩගහගන්නනම් එපා.
සාමාන්‍යයෙන් උදේ පාන්දරම ඔයාලට නිදිමතයි කියලා මම දන්නවා. ඉතින් මමනම් කියන්නේ පුළුවන්නම් උදේ පාන්දරම ගණිතය විෂය පාඩම් කිරීමට යොදාගත්තානම් හොදයි. ඉතින් නංගියේ මල්ලියේ පාන්දර 4 ඉදන් උදේ 7 වෙනකන් පාඩම් කරන්න. දැන් පොඩ්ඩක් නැගිටලා පොඩි විවේකයක් අරගන්න. ආපහු උදේ 7.30 ට වැඩ පටන් ගන්න. ඊට පස්සේ උදේ 9 වෙනකන් වැඩ කරන්න. දැන් ආපහු විවේකයක් ගන්න පැය භාගයක. හැබැයි මේ පැය භාගය ඇතුලත ඔයා ඔයාගේ උදෑසන ආහාර වේල ලබාගන්නත් ඕනෙමයි.ඉතින් ආපහු වැඩ පටන් ගන්න දහවල් 12 වෙනකන්. ආපහු විවේකයක් ගන්න. පැය දෙකක විතර. දහවල් 12 කියන්නේ හොදටම රස්නය දැනෙන වෙලාවක්නේ. ඉතින් ටිකක් වැඩිපුර විවේකයක් ගන්න. මොකද මේ වෙලාවෙ වැඩ කරන එක ටිකක් අමාරුයි. එත් වැඩ කරන කෙනාට ඕවා ප්‍රශ්න නෙමෙයි කියන එකත් අමතක කරන්න එපා. ආපහු 2 ට විතර වැඩ පටන් ගන්න. එක දිගට වැඩ කරගෙන යන්න 5 විතර වෙනකන්. ආපහු විවේකයක් ගන්න. 6 ට විතර ආපහු වැඩපටන් අරන් 8 වෙනකන් එක හුස්මට පාඩම් කටයුතු ටික කරන්න. ආපහු විවේකයක් අරගන්න එක පැයක. ඊට පස්සේ රෑ 11වෙනකම් පාඩම් කරන්න.
11 වෙද්දි නිදාගන්න යන්න. ඔයාල ගණන් හදලා බැලුවොත් අත්තටම ඔයාලා පැය 16 කට කිට්ටු වෙන්න වැඩ කරලා තියෙනවා. මෙන්න මේ ටිකත් මතක තියාගන්න. මේ මාස 4 ඇතුලත ඔයාලා අනිවාර්යෙන්ම කරන්න ඕනේ ඔයා විභාගයට මුහුණ දෙන විෂයන් 9 ටම අදාල පසුගිය විභාග ප්‍රශ්න පත්‍ර. අවුරුදු 10කවත් අවම වශයෙන් කරන්නම ඕනේ. ඔයාලට ඕනේනම් හොයලා බලන්න විභාගයේදී සුපිරිතම ප්‍රතිඵල ගන්න හැමෝම අනිවාර්යෙන්ම පසුගිය විභාග ප්‍රශ්න පත්‍ර කරලම තමයි විභාගයට යන්නේ. හැබැයි මේ ප්‍රශ්න පත්‍ර කරන්න ඕනේ නියමිත වෙලාවට විතරයි. විභාගයට මුහුණ දෙන ආකාරයටම මේ ප්‍රශ්න පත්‍ර ලියන්නම ඕනේ. ලියලා ඉවර වෙලා ඔයාම ඒ ප්‍රශ්න පත්‍රවල උත්තර බලාගන්න. බලලා ඔයා වරද්දගෙන තියෙන ප්‍රශ්නවලට අදාල පාඩම් ටික ඔයා ආපහු බලාගන්නම ඕනේ. බලලා ඉවර වෙලා ආපහු ඔයාට වැරදුනු ප්‍රශ්න ටික කරන්න ගන්න. අහ්... තව දෙයක් පුළුවන්නම් මේ මාස හතරෙදි ටීවී එකෙන්, ජංගම දුරකතනයෙන්, පරිඝණකයෙන් ඈත් වෙලාඉන්න බලන්න නංගියේ මල්ලියේ. ඉතින් මම මේ කියපු දේවල් එක්ක මේ මාස 4 හි විභාගයට කැපවෙන්න. විශ්වාස කරන්න මේ මාස 4 හොදටම ඇති මේ වැඩේ කරන්න. ඔයා මේ විදිහට කැපවෙන්නම ඕනේ. මොකද ඔයා මේ විදිහට වැඩ කලත් නැතත් තවත් ලක්ෂ ගණනක් ඔයාගේ වයසේ ඉන්න අය ඔයාට හිතාගන්නවත් බැරි විදිහට පාඩම් වැඩ කරලා විභාගයෙන් ගොඩ යන නිසා.
හිතන්න ඔයාගේ සාමාන්‍ය පෙල විභාගය හෙටයි කියලා. අද දවල් 12 වෙද්දි ඔයා පාඩම් වැඩ ටික නතර කරන්න ඕනේ. අනිවාර්යෙන්ම එහෙම කරන්න. ඊට පස්සේ පුළුවන් තරම් සැහැල්ලුවෙන් ඉන්න. හවස් වරුවේ අම්මා තාත්තා එක්ක ඔයාලාගේ ආගමට අදාල ආගමික ස්ථාන වලට ගිහින් ආගමික වතාවත් වල යෙදෙන්න. මොකද නංගියේ මල්ලියේ අපිට ආශිර්වාදයක් නැතිව කිසිම වැඩක් සාර්ථක කරගන්න බැරි නිසා. අද හවස්වරුවෙම ගෙදර අයත් එක්ක සතුටින් ඉන්න. කිසිම ප්‍රශ්නයක් ඇති කරගන්න එපා. හවස් වරුවෙම ඔයා හොදට බලන්න ඔයා විභාගයට ගෙනියන සියලූම දේවල් ලැස්ති කරගත්තද කියලා. දෙතුන් පාරක්ම පරීක්ෂා කරල බලන්න. රෑ 9 වෙද්දි නිදාගන්න යන්න.
උදේ අවදි වෙලා ලෑස්ති වෙලා අම්මගෙන් තාත්තගෙන් ආශිර්වාදයත් අරගෙන විභාග ශාලාවට යන්න. මතක තියාගන්න ඔයා අරගෙන යන බෑග් එකේ කිසිම පොතක් අරන් යන්න එපා. එහෙම කියන්නේ ඇයි කියලා පස්සේ කියන්නම්. විභාග ශාලාවට නියමිත වෙලාව එනකන් ඇතුල් වෙන්න දෙන්නේ නැහැනේ. ඉතින් ඔයා පාසල ඇතුලට ගිහින් තනියම ඉන්න. කාත් එක්කවත් කතා කරන්න අදහස් හුවමාරු කරගන්න යන්න එපා නංගියේ මල්ලියේ. ඇයි එහෙම කියන්නේ දන්නවද??? ඔයාගේ යාලුවෙක් ඇවිත් ඔයාට කිව්වොත් " අර පාඩමෙන් මේ පාඩමෙන් ප්‍රශ්නයක් එනවා" කියලා ඊට පස්සේ ඔයාගෙ හිත කියනවා ඒ පාඩම ආපහු බලන්න කියලා. ඊට පස්සේ ඔයාට හිතෙනවා ඔයා අරන් ආපු පොත දිග ඇරලා බලන්න. එක පිටුවක් බැලුවම අනිත් පිටුව බලන්න හිතෙනවමයි. මේ වැඩේ අනිවාර්යෙන්ම වෙනවමයි. ඊට පස්සේ ඔයා පාඩම් කරපු හැම දේම අමතක වෙනවා. ඔන්න ඕකයි කිසිම පොතක් අරන් යන්න එපා, පාසලට ගිගින් තනියම ඉන්න කියලා මම කිව්වේ නංගියේ මල්ලියේ.
හරි...... නියමිත වෙලාවට ඔයාලව විභාග ශාලාව ඇතුලට ගනියි. ඇතුලට ගියාට පස්සේ හොදට බල්ලන්න ඔයාගේ මේසය හෙලවෙනවාද, කැඩිලාද කියලා. එහෙමනම් ශාලාධිපතිට කියලා මේසය මාරු කරගන්න. ඊට පස්සේ ඉදගෙන ඔයාගේ හැදුනුම්පත අතට අරගෙන ඒකේ තියෙන ඔයාගේ ෆොටෝ එක දිහා බලාගෙන මෙහෙම හිතන්න. "මම මෙතනට එන්න ගොඩාක් කැප කිරීම් කලා, දිවා රෑ නොබලා වැඩ කලා, මගේ අම්මා තාත්තා වෙනුවෙන් මම මේ විභාගය සමත් වෙන්නම ඕනේ, මම මේ විභාගය ඉහලින්ම සමත් වෙනවමයි" ඉතින් නංගියේ මල්ලියේ අනිත් හැමදීම අමතක කරලා ප්‍රශ්න පත්‍රයට මුහුණ දෙන්නයි තියෙන්නේ. ඔයාලා අවංකව පාඩම් කලානම් ඉතාමත් හොදින් මුහුණ දෙන්න පුළුවන් වෙනවාමයි.
විභාගයේ සියලූම විෂයන්වලට මුහුණ දීලා ඉවර උනාට පස්සේ සතියක් විතර හොදට විවේක ගන්න. ලියලා ඉවර වුන විභාගය ගැන හිතන්න එපා මේ කාලයේදී. සතියක් විතර ගියාට පස්සේ හිතන්න ගන්න. ඔයාල දැන් මොකද කරන්නේ කියලා. උසස් පෙලට මොනවද කරන්නේ?? විද්‍යා ගණිත අංශයේනම් අමතර පංති ඉක්මනටම පටන් ගන්නවා. අනිත් විෂයන් වල අමතර පංතිනම් පටන් ගන්නේ ටිකකාලයක් ගියාට පස්සේ.මේ කාලය තුලදි අනිවාර්යෙන්ම පරිඝණක පාඨමාලාවක්, ඉංග්‍රීසි පාඨාවක් හදාරන්න අනිවාර්යෙන්ම.
ඉතින් නංගියේ මල්ලියේ මම නවතින්නයි හදන්නේ. මගේ හදවතින්ම ප්‍රාර්ථනා කරනවා ඔයාලට විභාගයෙන් ඔයාල හිතනවටත් වඩා වැඩි ප්‍රතිඵලයක් ලැඛෙන්න කියලා. ඔයාලා මගේ මේ ලිපිය කියවලා කුමක් හෝ යමක් ලබාගත්තානම් ඇත්තටම මගෙ සතුට ඒකයි. ඔයාලා මේ ලිපියට කැමතිනම් මට like එකකුත් දාගෙනම යන්න. එහෙනම් මම නවතින්නම් නංගියේ මල්ලියේ.
ඔයාලට ජයෙන් ජය!!!!
