පරිසර හිතකාමී ගොඩනැගිලි නිෂ්පාදනයක්
වර්තමාන ලෝකය, වර්ධනය වන අධික ජන ඝනත්වය හේතුවෙන් ඉදිවන කොන්ක්‍රීට් වනාන්තර, වන සතුන්ගෙන් හා රූස්ස ගස් වලින් පරිපූර්ණ වූ ස්වභාවික වනාන්තර වලට ආදේශනය වෙමින් පවතී. අද වන විට, ඉදිකිරීම් ක්ෂේත්‍රය පරිසර දූෂණය කෙරෙහි බලපෑම් සිදු කරයි. විශේෂයෙන් ම ඉදිකිරීම් සඳහා භාවිතා කරන අමුද්‍රව්‍ය නිෂ්පාදන කර්මාන්ත, එම ක්ෂේත්‍රය යටතේ වායු දූෂණය වර්ධනය වීම සඳහා සෘජුව හෝ වක්‍රව බලපෑම් ඇතිකරයි. නමුත් ගෙවුනු දෙමස තුල පමණක්, වායු දූෂණය (විශේෂයෙන්ම හරිතාගාර වායූන්) සීඝ්‍ර ලෙස පහත වැටී ඇති බව දත්ත වලින් පෙනී යන කරුණකි. එයට මූලික හේතුව ලෙස COVID-19 වසංගතය පැතිරීම හැඳින්විය හැක.
කෙසේ වෙතත් මෙම වසංගත තත්ත්වය යථා තත්ත්වයට පත්වන දිනක, පරිසර දූෂණය කෙරෙහි බලපෑමක් ඇති නොකරන ගොඩනැගිලි අමුද්‍රව්‍ය භාවිතයට ගැනීම නුවණැති ක්‍රියාවක් ලෙස හැඳින්විය හැකිය. එමනිසා පරිසර හිතකාමී ඉදිකිරීම් අමුද්‍රව්‍ය භාවිතයට ගැනීමට ඉදිකිරීම් ක්ෂේත්‍රය සිය අවධානය යොමු කළ යුතුය. නිදසුනක් ලෙස ශාක පත්‍ර, බීජ වැනි ශාක ප්‍රරෝහ පද්ධතියෙන් ලබාගතහැකි කොටස් හා කර්මාන්ත ක්ෂේත්‍රයෙන් නිපදවෙන අතුරු ඵල අමුද්‍රව්‍ය ලෙස භාවිතයට ගැනීම හැඳින්විය හැකිය..
මෙම ලිපියෙන් මූලිකවම අවධානය යොමු කරනුයේ පරිසර හිතකාමී මේසන් බ්ලොක්ගල් නිෂ්පාදනය කරන ක්‍රමවේදයක් සම්බන්ධව සහ එමඟින් ලබාගත් නිගමන විද්‍යාමාන කිරීම අරමුණු කර ඇත. එය සිදුකර ගැනීමට පහත ක්‍රියාවලිය අනුගමනය කර ඇත.
- බ්ලොක්ගල් නිෂ්පාදනය කිරීමට, තිරසාර හා ආර්ථිකමය වාසි සහගත අමුද්‍රව්‍ය භාවිතය හා ඒවා විමර්ෂණය කිරීම.
- ඉහත සඳහන් කළ ආකාරයේ අමුද්‍රව්‍ය කිහිපයක් තෝරා ඒවායේ ප්‍රමාණාත්මක වෙනස්කම් සිදු කරමින් විවිධ මිශ්‍රණ සාදා ඒවායේ ඉංජිනේරුමය සාධක (පරීක්ෂණ හා ද්‍රව්‍ය සඳහා ඇමරිකානු සංගමය-ASTM නිර්දේශිත සම්මත පරාමිතීන්) විචලනය අන්වේෂණය කර හොඳම මිශ්‍රණය තෝරාගැනීම.
- අවසාන වශයෙන් තෝරාගත් හොඳම මිශ්‍රණය භාවිතා කොට කුහරමය බ්ලොක්ගලක් නිර්මාණය කර එහි ශක්තිය පරීක්ෂා කිරීම.
මෙම පර්යේෂණය සඳහා මා විසින් පහත අමුද්‍රව්‍ය හා කාර්මික අතුරුඵල තෝරාගන්නා ලදී.
ගල් සහ වැලි වෙනුවට හොඳින් සෝදා වියළාගත් දහයියා ද (කෘෂිකාර්මික රටක් නිසා බහුලව පවතී), සිමෙන්ති වෙනුවට හොඳින් බන්ධනය වීමට කැල්සියම් හයිඩ්‍රොක්සයිඩ් (සාම්ප්‍රදායිකව අළු හුණු - Hydrated Lime) සමඟ හයිඩ්‍රොලික් කැල්සියම් හයිඩ්‍රොක්සයිඩ් (විවිධ අපද්‍රව්‍ය වලින් සමන්විත අළු හුණු - Hydraulic Lime) හා කාර්මික අතුරුඵලයක් වන හමන අළු (Fly Ash) පිරවුම් ද්‍රව්‍යයක් ලෙස භාවිතා කර ඇත. (පුත්තලමේ ලක් විජය වැනි ගල් අගුරු බලාගාර වලින් අධික ප්‍රමාණයක් එකතුවේ.)
මෙම පර්යේෂණයේදී ඉංජිනේරුමය සාධක (ASTM සම්මත පරාමිතීන්) කිහිපයක් පිළිබඳව අවදානය යොමු කළෙමු. සම්පීඩන ශක්තිය (Compressive Strength), ආනමන ශක්තිය (Flexural Strength), නම්‍යතා මාපාංකය (Modulus of Elasticity), ජලය අවශෝෂණය වීමේ හැකියාව (Water Absorption), ඝනත්වය (Density) හා ඉලෙක්ට්‍රෝණ අණ්වීක්ෂ පරීක්ෂණය (Scanning Electron Microscope Test) වැනි සාධක අධ්‍යයනය කර ඇත.
ඉහත අමුද්‍රව්‍ය හා කාර්මික අතුරුඵල ප්‍රමාණාත්මකව විචලනය කරන ලදී. මෙම පර්යේෂණයේදී මා විසින් මිශ්‍රණ 6ක් පිළියෙළ කර ඇති අතර පළමු මිශ්‍රණ 3 සඳහා පමණක් සිමෙන්ති භාවිතා විය. එම මිශ්‍රණ 3 හි සිමෙන්ති ප්‍රමාණය ස්කන්ධය අනුව (w/w) අඩු කර, හමන අළු ප්‍රමාණය, දහයියා ප්‍රමාණය හා අළු හුණු ආකාර 2කේම ප්‍රමාණ වැඩි කරන ලදී. එවිට සිදුකරන ලද පරීක්ෂණ වලින් ලැබුණු නිරීක්ෂණ විශ්ලේෂණය කළ විට සම්පීඩන ශක්තිය, ආනමන ශක්තිය හා නම්‍යතා මාපාංකය කැපී පෙනෙන ලෙස වැඩි වී ඇති බව ද, ජලය අවශෝෂණය වීමේ හැකියාව හා ඝනත්වය අඩු වී ඇති බව නිරීක්ෂණය විය. ඉතිරි මිශ්‍රණ 3 සඳහා සිමෙන්ති භාවිතා නොවී ය. එම මිශ්‍රණ 3 හි හමන අළු ප්‍රමාණය, දහයියා ප්‍රමාණය හා අළු හුණු ආකාර 2කේම ප්‍රමාණ වැඩි කරන ලදී. එවිට සිදුකරන ලද පරීක්ෂණ වලින් ලැබුණු නිරීක්ෂණ විශ්ලේෂණය කළ විට සම්පීඩන ශක්තිය, ආනමන ශක්තිය, ඝනත්වය හා නම්‍යතා මාපාංකය කැපී පෙනෙන ලෙස අඩු වී ඇති බව ද, ජලය අවශෝෂණය වීමේ හැකියාව වැඩි වී ඇති බව නිරීක්ෂණය විය ලැබුණු දත්ත අන්වේෂණය කළ පසුව සිමෙන්ති නොමැති හොඳම මිශ්‍රණය තෝරාගත් අතර එම මිශ්‍රණයෙන් කුහරමය බ්ලොක්ගල්, අච්චුවක් ආධාරයෙන් සාදා එහි සම්පීඩන ශක්තිය පරීක්ෂා කරන ලදී. එවිට මෙගා පැස්කල් 0.6 කට ආසන්න අගයක් ලැබුණු අතර අමුද්‍රව්‍ය ප්‍රමාණාත්මකව තවදුරටත් විචලනය කිරීමෙන් මෙය සම්මත අගය දක්වා වැඩි කර ගත හැකිය.
මෙම බ්ලොක්ගල සාමාන්‍ය සිමෙන්ති බ්ලොක්ගලක් හා සසඳන විට පහත වාසි සහගත සාධක හඳුනාගත හැකි විය.
- දිගු කාලීන කල් පැවැත්ම
- සැහැල්ලු බර
- කාලයත් සමඟ කාබන්ඩයොක්සයිඩ් අවශෝෂණය කිරීමෙන් ශක්තිය වර්ධනය වීම.
- හොඳ පරිවාරක ගති ලක්ෂණ තිබීම.
- අඩු තාප සන්නායකතාවයක් තිබීම.
- වෙන් කොට තබාගැනීමේ බිත්ති (Partition walls) ඉදිකිරීමට භාවිතා කළ හැකි වීම ආදී කරුණු වාසි සහගත වේ.
වර්තමානයේදී බ්ලොක්ගල්, ගඩොල්, පෙර සවි කොන්ක්‍රීට් ආකෘතික කැට වැනි ගොඩනැගිලි ඉදිකිරීමට අවශ්‍ය අමුද්‍රව්‍ය සඳහා ශාකමය අමුද්‍රව්‍ය භාවිතය හා කාර්මික අතුරුඵල භාවිතය හා සම්බන්ධ වන පර්යේෂණ විශාල ප්‍රමාණයක් සිවිල් ඉංජිනේරු අංශය යටතේ සිදු වෙමින් පවතී. විශේෂයෙන්ම උණ බට, කබොක්, දහයියා, මැටි පස ආදී වෙනත් අමුද්‍රව්‍ය මේ සඳහා භාවිතා කළ හැක.
පරිසර හා වායු දූෂණය අවම කර, අරපිරිමැස්ම හා තිරසාර සංවර්ධනය වැඩි දියුණු කර දුර දිග ගමනක් යා හැකි වන පරිදි ඉදිකිරීම් කටයුතු සිදු කිරීම තුලින් ස්වභාවධර්මයට සිදුවන තර්ජන ඉදිකිරීම් අංශය මඟින් යම්තාක් දුරට පාලනය කළ හැක. ප්‍රසිද්ධ දේශකයෙකු විසින් සිදු කළ කියමනකින් මම මෙම ලිපිය අවසන් කළෙමි. "ශාකයක මලක් නොපිපේ නම්, කළ යුත්තේ මල සකස් කිරීම වෙනුවට ශාකය අවට පරිසරය සකස් කිරීමයි."
කීත් ජෙයරාජ්
B.Sc Eng (Hon's), GMICE, CIMA
සිවිල් ඉංජිනේරු
මූලාශ්‍ර ;
Jeyaraj, K. and Tharmarajah, G., 2019. Alternative Masonry Blocks using Rise Husk and Fly Ash. Transactions by The institution of Engineers, Sri Lanka., (01), pp.11-20.
තවත් පරිසර හිතකාමී ගොඩනැගිලි නිෂ්පාදනයක තොරතුරු රැගෙන ලබන සතියේ හමුවෙමු. සුභ දවසක් !
මෙම ලිපියට ඔබ කැමති නම් පහත LIKE BUTTON එක ඔබා සහය දක්වන්න.
බුද්ධික ගුණසේකර