සමාජ විද්‍යාව (සමාජ අභිප්‍රේරණ, සමාජ අපගාමීත්වය)
සමාජ අභිප්‍රේරණ සමාජ අපගාමීත්වයට හේතු වේ.
හැඳින්වීම.
සෑම චර්යාවක්ම අභිප්‍රේරණයයි.මේ නිසා ජීවියාගේ චර්යාවට බලපෑම් කරනු ලබන සෑම දෙයක්ම අභිප්‍රේරණය ලෙස සැලකිය හැකිය.අවශ්‍යතාව,උවමනාව සහ ආශාව වැනි සාමාන්‍ය ව්‍යවහාරයේ යෙදෙන වචන කීපයක් අභිප්‍රේරණය යන වචනය තේරුම් ගැනීම සඳහා භාවිතා කළ හැකිය.ඒ අනුව අභිප්‍රේරණය වර්ගීය සංකල්පයක් ලෙස හැඳින්විය හැකිය.කෙටියෙන් අභිප්‍රේරණ න්‍යාය මගින් චර්යාවේ ආරම්භය,එහි දිශාව හෝ පාලනය සහ එහි විරතිය හෙවත් නැවතීම සොයා බලනු ලැබේ.මේ සියළු කරුණු මගින් පැහැදිලි වනුයේ අභිප්‍රේරණය මගින් ජීවියාගේ ක්‍රියාකාරීත්වයේ සෑම කොටසක්ම සොයා බලන බවයි. එසේම පෙළඹීම බාහිර හා අභ්‍යන්තර වශයෙන්ද දෙවැදෑරුම්ය.බාහිර අරමුණු හා බැඳුණු තෘප්තිය, ප්‍රතිලාභ, කරණකොට ගත් නැමියාව බාහිර පෙළඹීමයි.මුදල් ඉපයීම, විභාග,සහතික, උසස් වීම් ,තෑගි,ප්‍රශංසා,නම්බුව අපේක්ෂිත පෙළඹීම් වේ.අභ්‍යන්තර පෙළඹීම් පුද්ගලයා තුළ ඇතිවෙන නෛසර්ගික මානසික ආවේග පදනම් කොටගෙන ඇතිවේ. කුතුහලය, රුචිකත්වය, දක්ෂකම, කැමැත්ත, ප්‍රතිපත්තිය, ජීවන දර්ශනය,ආගම,දේශපාලය,ජාතික හැඟීම්,ආදරය වැනි හැඟීම් මත පහළ වේ.බාහිර පෙළඹීම තාවකාලික වූවකි.අවශ්‍යතාව ඉටුවූ පසු පෙළඹීම් නිමාවේ.මේ අනුව මෙම සියළු පෙළඹීම් සමාජ ව්‍යුහය කෙරෙහි සෘජුව බලපානු ලබයි. එමෙන්ම හොඳ, නරක,කරුණාවන්ත, නපුරු,උපාසක,කලබලකාරී ආදී වශයෙන් පුද්ගලයන් විවිධ මානසික ස්වරූපයන් ගැනීමට ප්‍රබල කායික හේතු සාධකය වී ඇත්තේ මනසය.මේ අනුව මනස පුද්ගලයෙකුගේ යහපත් හෝ අයහපත් පෙළඹීම් කෙරෙහි බොහෝ සෙයින් බලපෑම් සිදුකරනු ලබයි.මේ අනුව මනුෂ්‍යාගේ යහපත් පෙළඹීම් සමාජයේ පැවැත්මට හානිදායක නොවූවත් ඇතැම් අයහපත් පෙළඹීම් සමාජයේ අපගාමීත්වයට සෘජුවම හේතු වේ.සමාජය තුළ ඇතිවන නවීකරණය, ගෝලීයකරණය,වාණිජකරණය,නාගරීකරණය ආදී විවිධ සංකල්පයන් ඔස්සේ මිනිසාගේ සිතුම් පැතුම්,විවිධ ආශාවන්,අවශ්‍යතාවයන් කලින් කලට වෙනස් වෙයි.මේ හේතුවෙන් මිනිසා විවිධ පෙළඹවීම් වලට යොමුවෙයි.වර්තමාන සමාජයේ මෙම තත්ත්වය සීඝ්‍රයෙන් උග්‍රවී ඇත. මෙම සියළු සමාජ වෙනස්වීම් හමුවේ දරිද්‍රතාවය,සාගින්න,දේශපාලන කැළඹීම්,යුද්ධ මෙන්ම විවිධ සමාජ අපරාධයන් නිර්මාණය විය.සමාජ අපරාධ මගින් නිරූපනය කරනුයේ සමාජ අර්බුධයේ ප්‍රකාශිත ආකාරයකි. අර්බුදයේ මෝරා යෑමට අනුරූපව සමාජ අපරාධයද වර්ධනය වේ.එහි උච්චතම අවස්ථාවේ ඝාතන සංස්කෘතියක් බිහි වේ.එසේත් නැතිනම් දැන හෝ නොදැන ඝාතන හඹා එන සාජයක් බවට පත්වේ.සියදිවි නසා ගැනීමේ සිට අකල් මරණ ගෙන එන වාහන අනතුරු මෙන්ම ගබ්සා,ස්ත්‍රී දූෂණ ,ළමා අපචාර,කප්පම් ගැනීම්,මංකොල්ල,පුද්ගලික ඝාතන,දේශපාලන ඝාතන,මත්ද්‍රව්‍ය ආදී වශයෙන් මෙම තත්ත්වය විවිධාකාරයෙන් පවතී.ඒවා දෛනික ජීවිතයේ අනිවාර්ය අංගයන් වෙමින් ශීඝ්‍රෙයන් පැතිර යමින් පවතී.මේ හරහා සමාජය තුළ අපරාධ,අපගාමී චර්යාවන් නිර්මාණය වේ.මනුෂ්‍යාව මේ සඳහා සමාජය විසින් පොළඹවයි.විශේෂයෙන්ම සමාජ සංස්කෘතිය විසින් නිර්මාණය කරනු ලබන ප්‍රතිමානයන් බිඳ දැමීම පෙන්වා දිය හැකිය.මේ අනුව සමාජ අර්බුදයන්,අවිවේකී බව යනාදී සංකල්පයන් ඔස්සේ නිර්මාණය වන පෙළඹීම් යටතේ මනුෂ්‍යයන් අපගාමී ක්‍රියා කිරීමට පෙළඹේ...
අභිප්‍රේරණය යනු:
ජීවීන් සම්බන්ධයෙන් දැකිය හැකි පොදු ලක්ෂණයක් වන්නේ ඔවුන් සෑම විටම කිසියම් අයුරකට ක්‍රියාකාරීව සිටින බවයි.එම ක්‍රියාකාරීත්වයන් විවිධ අවස්ථාවල,එක එක ප්‍රමාණයෙන් දැකිය හැක.එසේම එම ක්‍රියාකාරීත්වයන්ගේ ස්වභාවයද වෙනස්ය.ඉතාම විවේකීව සිටින්නේ යැයි සිතන,නිදාගෙන සිටින අවස්ථාවේදීත් හරීරයේ ඇතැම් අංශ ක්‍රියාත්මක වෙයි.අවදිව සිටින විටද සමහර ක්‍රියාකාරීන්වලට අමතරව යම් යම් විශේෂ වූ ක්‍රියාකාරකම් කිරීමට පුද්ගලයෝ පෙළඹෙති.මේ අනුව මිනිස් චර්යාවේ දක්නට ඇති සංකීර්ණතා හා විවිධතා සලකා බලන කල්හි ඒ සියල්ල හුදෙක්ම ජීව විද්‍යාත්මක සාධක නිසා පමණක් සිදුවන්නේය යැයි තීරණය කිරීම අපහසුය.මේ අනුව පුද්ගලයින් ක්‍රියාකාරී කිරීමට බලපාන සාධක කවරේදැයි යන්න විග්‍රහ කිරීමේදී අභිප්‍රේරණ සංකල්පය(MOTIVATION) වැදගත් වේ.මෙම සංකල්පයෙහි සාමාන්‍ය අදහස නම් “ජීවියා පණ ගන්නවා,ශක්තිමත් කොට,ඉදිරියට යවන ගාමක බලවේගයක් හෙවත් ශක්තියයි.”මෙම බලවේගය කිසියම් කාර්ය්‍යක් කිරීමට මිනිසා ප්‍රබෝධ කරවන,මෙහෙයවන,එසේම එම කාර්යය යම් අවසාන නිෂ්ඨාවක් කරා ගෙන යාමට උනන්දු කරවන බලවේගයකි.මේ අනුව සරල වශයෙන් ගත්කළ කිසියම් චර්යාවකට පුද්ගලයා නැඹුරු කරවන ශක්තිය හෙවත් බලවේගය ප්‍රේරණ නම් වේ.එක් එක් මනෝවිද්‍යාඥයින් ප්‍රේරණ විවිධ ලෙස වර්ග කිරීම හා විග්‍රහ කිරීම සිදුකොට ඇත.ඒ අනුව ප්‍රේරණය ප්‍රධාන වශයෙන් දෙයාකාරයකි.
1.ප්‍රාථමික ප්‍රේරණ හෙවත් නූගත් ප්‍රේරණ.
2.ද්වීතීය ප්‍රේරණ හෙවත් උගත් ප්‍රේරණ.
ප්‍රාථමික ප්‍රේරණ යනු ඉගනීමකින් තොරව ස්වභාවිකවම පුද්ගලයා තුළින් ඇතිවන නැඹුරු වීම්ය.ප්‍රාථමික ප්‍රේරණ ද දෙයාකාරයකට විග්‍රහ කළ හැකිය.එනම් ශාරීරික ප්‍රේරණ හා මනෝවිද්‍යාත්මක වශයෙනි.මේ අනුව ශාරීරික ප්‍රේරණ යනු ශාරීරික බලපෑමකින් යුතුව සිදුවන නැඹුරුවීම්ය.නිදසුන් වශයෙන් කුසගින්න,වතුර පිපාසය,නින්ද යනාදිය දැක්විය හැකිය.මනෝවිද්‍යාත්මක ප්‍රේරණ යනු පුද්ගල මානසික මට්ටමෙන් පැන නගින නැඹුරුවීම්ය.නිදසුන් වශයෙන් ආදරය කිරීම,කෝපයට පත්වීම,ඊර්ෂ්‍යයා සහගත වීම.රංචු ලැදියාව ආදිය දැක්විය හැකිය.බඩගින්න වැනි ශාරීරික ප්‍රේරණ ඉටු නොවීමෙන් ශරීරයේ පැවැත්ම හා ජීවිතය පවත්වාගෙන යාම කෙරෙහි බලපායි.මනෝවිද්‍යාත්මක ප්‍රේරණ තෘප්තිමත් නොවීමෙන් ජීවිතය විකෘති වීම,අසාමාන්‍ය චර්යා හා මානසික ආබාධ වලට තුඩු දිය හැකිය.ඇතැම් වර්ගීකරණයන්ට අනුව ප්‍රේරණය යනු හරීරය තුළින් පැනනැගිය හැකි ස්වභාවික අවශ්‍යතාවයන්ය.එනම් කුසගින්න,පිපාසය ,නින්ද ආදී වශයෙනි.එහෙත් පුද්ගලයා බාහිර පරිසරය ඇසුරින් දියුණු කරගත් නැඹුරු වීම් චේතනා වශයෙන් සැළකෙයි.චේතනාවේ මූලික ලක්ෂණ දෙකක් පෙන්වා දිය හැකිය.එනම් කිසියම් චර්යාවක් සඳහා ශක්තිය ලබා දීම,ජීවියාගේ චර්යාව හැසිරවීම දිශානතික කිරීම හෙවත් මෙහෙයවනු ලැබීම වේ.මේ අනුව පුද්ගලයා කුසගිනි වූ විට ආහාර සොයා යාමට පෙළඹෙන්නේ යට කී ශක්තිය තුළින් මෙහෙය වනු ලැබීමෙන් ඇතිවන ක්‍රියාකාරීත්වය හෙවත් චර්යාව පදනම් කොට ගෙනය.මේ ආකාරයෙන් ජීවියා අරමුණක් කරා මෙහෙය වනු ලබන චර්යාව ශරීර අභ්‍යන්තරයෙන් පැනනැගිය ප්‍රතික්‍රියාවක් වශයෙන් සැළකිය හැකිය.
අභිප්‍රේරණය යන යෙදුම මනෝවිද්‍යාවේදී බොහෝ විට භාවිතා කරනු ලබන්නේ ඉහත කී සියළුම ප්‍රේරණ චේතනා එකතු කර පොදුවේ යෙදෙන යෙදුමක් වශයෙනි.ප්‍රේරණයක් හේතු කොටගෙන චර්යාවක් ඇතිවේ.චර්යා සාර්ථක වීමෙන් නිෂ්ඨා සාධනය වේ.පුද්ගලයාගේ ප්‍රේරණය ඉන් තෘප්තිමත් වේ.මෙලෙස අභිප්‍රේරණය යනු චක්‍රීය ක්‍රියාකාරීත්වයකි. පෙළඹීම වනාහි මනුෂ්‍ය හැසිරීමට බලපාන උත්තේජනයක ප්‍රබෝධයකි.නැතහොත් මනුෂ්‍යා මෙහෙය වීමකි.පෙළඹීම පිළිබඳ මනුෂ්‍ය හැසිරීම විග්‍රහ කිරීමට මනෝවිද්‍යාවේ විවිධ මතයන් හා න්‍යායන් ගොඩනැගි ඇත.
“යම් අවශ්‍යතාවයක් නිසා පැන නැගී එය සපුරාලනු සඳහා යම් ක්‍රියාකාරීත්වයකට තුඩු දෙන,මනෝ කායික නොහොත් අභ්‍යන්තර ක්‍රියාවලිය පෙළඹීම වේ.පෙළඹීම යන පදයට සමාන අර්ථ ගෙන දෙන තවත් පද කිහිපයකි.එනම් අභිප්‍රේරණ,ප්‍රේරණ,රංජන,අවශ්‍යතා,චේතනා යනාදිය වේ”
(මහාචාර්ය කේ.ලොවල්)
“කිසියම් ක්‍රියාවකට පෙරටුව යමින් එම ක්‍රියාව තීරණය කරන ආශාව,එහි චාලක බලවේගය නැතහොත් ප්‍රබෝධකය පෙළඹීම වශයෙන් සැළකෙයි. ”
(සලී )
“පුද්ගල ක්‍රියාකාරීත්වයට හේතු වන ප්‍රධාන කාරණය පෙළඹීමයි.”
(මියර්)
මේ අනුව පෙළඹවීම යන්න පුද්ගලයාගේ ජීවිත කාලය පුරාම රඳා පවතින වෙනස් වෙමින් ක්‍රියාත්මක වන,පුද්ගලයා චර්යාවට යොමු කරවන මානසික බලවේගයක් ලෙස හැඳින්විය හැකිය.මේ පෙළඹීම පුද්ගලයා කෙරෙහි යහපත් මෙන්ම අයහපත් ආකාරයටද බලපායි.යහපතට පෙළඹෙන පුද්ගලයා සමාජයේ සාර්ථකත්වයට පැමිණෙන අතර අයහපතට යොමුවන පුද්ගලයා සමාජයේ ප්‍රතික්ෂේප කිරීම් වලට ලක්වේ.මේ අනුව පෙළඹීම හෙවත් අභිප්‍රේරණය යනු සෑම පුද්ගලයෙකුටම බලපාන මූලධර්මයකි.
අපගාමීත්වය යනු:
අපගමනය හෙවත් අපගාමීත්වය යනු සමාජයේ නිෂේධනාත්මක ප්‍රතිචාරයන් ලබාදෙන ආකාරයේ හැසිරීමකි.වෙනත් ආකාරයකින් කිවහොත් සමාජ හා සංස්කෘතික අපේක්ෂාවන් අනුව පවතින සම්මතයන් පුද්ගලයෙකු විසින් කඩ කිරීම වෙයි.අපගාමීත්වය කාලය හා ස්ථානය අනුව වෙනස් වේ.අපගමනය යනුවෙන් හඳුන්වන්නේ සංස්කෘතිකමය වශයෙන් ගොඩනැගුණු නීති පද්ධතියක් කැඩිමයි.එහෙත් සංස්කෘතිය සමාජයෙන් සමාජයට,රටින් රටට,කාලයෙන් කාලයට වෙනස් වෙයි.ඒ අනුව සංස්කෘතිය එක් පරම්පරාවක සිට තවත් පරම්පරාවකට ගමන් කිරීමේදි ඇතැම් විට සංස්කෘතිකාංග බිඳී යා හැක.එමෙන්ම නව සංස්කෘතිකාංග එකතු වෙයි.මේ හේතුවෙන් සංස්කෘතිය කාලයෙන් කාලයට වෙනස්වන හෙයින් අපගාමී ක්‍රියාවන්ද මේ අනුව වෙනසකට ලක්වේ.නිදසුන් වශයෙන් දහනමවන සියවසේ දැකිය හැකි බොහොමයක් සංස්කෘතික චාරිත්‍ර වාරිත්‍ර වර්තමාන සමාජයෙන් ගිලිහී යාම පෙන්වාදිය හැකිය.එමෙන්ම එක් සමාජයක් අපක්ෂපාතී යැයි විනිශ්චය කරන දේ තවත් සමාජයක අපගමනය ලෙස නොසලකයි.මේ අනුව සරල වශයෙන් අපගමනය යනුවෙන් හඳුන්වාදිය හැක්කේ සංස්කෘතිය හරහා නිර්මාණය වූ සමාජ සම්මතයන් උල්ලංඝණය කිරීමයි.
එමෙන්ම අපගාමීත්වය හා අපරාධ අතර වෙනසක් දක්නට ලැබෙයි.එනම් අපගාමීත්වය ලෙස සළකනු ලැබූයේ සංස්කෘත්ක ප්‍රතිමාන උල්ලංඝනය කිරීමකි.එහෙත් අපරාධයක් යනුවෙන් හඳුන්වනු ලැබූයේ රාජ්‍ය විසින් පනවන ලද නීතියන් කඩකිරීමයි.අපචාර දෙවියන් පිළිබඳ විශ්වාසය,දේව භක්තිය මත ගොඩනැගෙන අතර අපරාධ පොලීසි,උසාවි වැනි ආයතන මගින් පාලනය කරනු ලබයි.ප්‍රතිමාන යනු පොදුවේ සම්මතයක් ලෙස පිළිගත් යම් යහපත් ක්‍රියාවන් ප්‍රතිමාන ලෙස සලකයි.ඕනෑම සංස්කෘතියක හොඳ නරක,සිරිත් විරිත් ආදිය වෙයි.නීතිරීති කඩකරපුවාම අපගාමීත්වයට පත්වේ.අපගාමී තත්ත්වයට නීතිමය රාමුවක් නැත.එහෙත් පොදුවේ සමාජයට යහපතක් සිදුවන හෙයින් සංස්කෘතිය විසින් පාලනය කරනු ලබයි.එයට හේතුව සමාජයේ ආචාරධර්ම පොදු මතයකට හැසිරවීමට අවශ්‍ය හේතුවෙනි.ප්‍රතිමාන නිර්මාණය වනුයේ සමාජයේ හෝ ආයතනයේ යහපත උදෙසාය.මේ අනුව සංස්කෘතිය විසින් සමාජය යහපත් තැනක් බවට පත්කර ගැනීමට උත්සාහ කරනු ලබයි.මෙම ප්‍රතිමාන විනාශ කරන පුද්ගලයන්ට නීතිමය වශයෙන් ලිඛිතමය දඬුවම් සඳහන් නොවෙයි.එහෙත් සමාජය විසින් දඬුවම් ලබාදෙයි.එනම් අපගාමී ක්‍රියාවන් සිදුකරන පුද්ගලයා සමාජයෙන් ප්‍රතික්ෂේප කිරීම,කොන්කිරීම යනාදිය වෙයි.මෙය අවිධිමත් වෙයි.සංස්කෘතිය හරහා සිදුවන්නකි.සංස්කෘතිය යනු පොදු එකඟතාවයකි.සමස්තයේ කැමැත්ත වෙයි.මේ අනුව සංස්කෘතික වශයෙන් නිර්මාණය වී ඇති ප්‍රතිමානයන් බිඳ හෙලීම අපගාමීත්වය වේ.
සමාජ අභිප්‍රේරණ සමාජ අපගාමීත්වයට හේතුවෙයි.
පෙළඹිම යනු පුද්ගලයා කිසියම් ක්‍රියාකාරකම් සඳහා යොදාගනු ලබන ශක්තියයි.නැතහොත් ප්‍රේරණය හෙවත් නැමියාවයි.මනෝ විද්‍යාවට අනුව මෙය පුද්ගල හැසිරීම් ස්වභාවයකි.කිසියම් පුද්ගල අවශ්‍යතාවයන් පිරිමසා ගැනීම සඳහා ශරීරයට අභ්‍යන්තරයෙන් හටගන්නා මනෝ කායික ක්‍රියාකාරීත්වයන් වශයෙන් පෙළඹීම අර්ථකථනය කළ හැකිය.එකී ක්‍රියාකාරීත්වය අවසානයේ එම ශක්තිය සැපයූ අවශ්‍යතාවය ඉටුවීමක් හෝ එහි අවශ්‍යතාවය හීන වීමක් සිදුවේ.ෆෆදනික ජීවිතයේදී පුද්ගලයා නොයෙකුත් දේ කිරීමට හෝ නොකිරීමට නැමියාවක් දක්වයි.එදිනෙදා කෑමබීම,ඇඳුම් පැළඳුම්,වැඩකටයුතු,ගමන් බිමන් ආදියේ කැමති ඒවාට නැවෙයි.අකමැති නම් නොනැමෙයි.එළවළු,කුළුබඩු,මාළුපිණි ගෙන ඒමට සති පොළට ගිය විට අකමැති ඒවා නොගෙන කැමති ඒවා රැගෙන එයි.එසේම සමහර සුරාවට සූදුවට,දුම්පානය,බුලත්විට කෑමට,නැමියක් දක්වයි.මේවා මිනිසාගේ සාමාන්‍ය පෙළඹීම් වශයෙන් දැක්විය හැකිය.එහෙත් සමහරු කුලියට මිනීමරති.බඩේ බෝම්බ බැඳ ජනතාව අතර පුපුරාගෙන විශාල පිරිසක් සමග තමන්ද දිවිනසාගනී.නොයෙක් සන්නද්ධ විප්ලවය මගින් ආණ්ඩුව අල්ලා ගැනීමට පෙළඹෙයි.තව කෙනෙක් රටින් කොටසක් අල්ලා ගැනීමට පෙළඹෙයි.තව කෙනෙක් රටින් කොටසක් කඩාගෙන වෙනම රාජ්‍යයක් පිහිටුවීමට තැත් කරයි.මේවා සාමාන්‍ය නොව අසාමාන්‍ය හෙවත් සුවිශේෂී පෙළඹීන්ය.මෙලෙස මානව පෙළඹීම ගෙදර කළයෙන් වතුර ටිකක් අරගෙන බීම වැනි සාමාන්‍ය තත්ත්වයේ සිට සියදිවි හානිකර ගැනීම දක්වා අතිශයින්ම සුවිශේෂී විය හැකිය.එසේම පෙළඹීම බාහිර හා අභ්‍යන්තර වශයෙන්ද දෙවැදෑරුම්ය.බාහිර අරමුණු හා බැඳුණු තෘප්තිය,ප්‍රතිලාභ,කරණකොට ගත් නැමියාව බාහිර පෙළඹීමයි.මුදල් ඉපයීම,විභාග,සහතික,උසස් වීම් ,තෑගි,ප්‍රශංසා,නම්බුව අපේක්ෂිත පෙළඹීම් වේ.අභ්‍යන්තර පෙළඹීම් පුද්ගලයා තුළ ඇතිවෙන නෛසර්ගික මානසික ආවේග පදනම් කොටගෙන ඇතිවේ. කුතුහලය, රුචිකත්වය, දක්ෂකම, කැමැත්ත, ප්‍රතිපත්තිය, ජීවන දර්ශනය,ආගම,දේශපාලය,ජාතික හැඟීම්,ආදරය වැනි හැඟීම් මත පහළ වේ.බාහිර පෙළඹීම තාවකාලික වූවකි.අවශ්‍යතාව ඉටුවූ පසු පෙළඹීම් නිමාවේ.මේ අනුව මෙම සියළු පෙළඹීම් සමාජ ව්‍යුහය කෙරෙහි සෘජුව බලපානු ලබයි.මෙම පෙළඹීම් සඳහා මනසේ ක්‍රියාකාරීත්වය වැදගත්වන බව මනෝවිද්‍යාඥයන් ඉදිරිපත්කොට ඇත.සිතුවිලි,හැඟීම්,ආශා කිරීම්,වේදනා,ඇලීම් හා ගැටීම් ආදී සියළු මානසික කාර්ත්‍යවයන්ද,ශරීරය පවත්වා ගැනීමට අවශ්‍ය නාඩි වැටීම,හුස්ම ඉහළ පහළ ගැනීම,ආහාර දිරවීම,රුධිර සංසරණය ආදී සියල්ල පාලනය කරනු ලබන්නේ මනස හරහාය.එමෙන්ම හොඳ,නරක,කරුණාවන්ත,නපුරු,උපාසක,කලබලකාරී ආදී වශයෙන් පුද්ගලයන් විවිධ මානසික ස්වරූපයන් ගැනීමට ප්‍රබල කායික හේතු සාධකය වී ඇත්තේ මනසය.මේ අනුව මනස පුද්ගලයෙකුගේ යහපත් හෝ අයහපත් පෙළඹීම් කෙරෙහි බොහෝ සෙයින් බලපෑම් සිදුකරනු ලබයි.මේ අනුව මනුෂ්‍යාගේ යහපත් පෙළඹීම් සමාජයේ පැවැත්මට හානිදායක නොවූවත් ඇතැම් අයහපත් පෙළඹීම් සමාජයේ අපගාමීත්වයට සෘජුවම හේතු වේ.සමාජය තුළ ඇතිවන නවීකරණය,ගෝලීයකරණය,වාණිජකරණය,නාගරීකරණය ආදී විවිධ සංකල්පයන් ඔස්සේ මිනිසාගේ සිතුම් පැතුම්,විවිධ ආශාවන්,අවශ්‍යතාවයන් කලින් කලට වෙනස් වෙයි.මේ හේතුවෙන් මිනිසා විවිධ පෙළඹවීම් වලට යොමුවෙයි.වර්තමාන සමාජයේ මෙම තත්ත්වය සීඝ්‍රයෙන් උග්‍රවී ඇත. අතීතයේ සමාජය සරලය. සංකීර්ණ නැත. නාගරීකරණය වූ පරිසරයක් නොව ග්‍රාමීය පරිසරයක් දක්නට ලැබුණි.
“පුරාණ ගම් බොහෝ සෙයින්ම වෙන් වෙන්ව පිහිටියේය.අවශ්‍ය දෙයින් ආඩ්‍ය විය.”
එහෙයින් ඔවුන්ගේ සිතුම් පැතුම් සරලය.අවශ්‍යතා සරල හෙයින් ඔවුන් විසින් ගමෙන්ම ඔවුන්ගේ අවශ්‍යතාවයන් සපුරා ගන්නා ලදී.ආහාර යනාදිය සපයා ගනු ලැබූයේ ඔවුන්ගේ වටපිටාවෙන්මය.එනේම ප්‍රධාන ජීවනෝපායවූයේ කෘෂිකර්මාන්තයයි.කෘෂිකාර්මික ජීවිතයක් වටා ගෙතුණු ඔවුන් සාමූහිකව එකිනෙකාට උදව් කරමින් ජීවත් වූහ.දරිද්‍රතාවය වැනි සංකල්පයන් මෙකල තිබුණද එම සංකල්පයන් ප්‍රධාන වශයෙන් කැපී නොපෙනුණි.එහෙත් මෙම සරලකම සම්පූර්ණයෙන්ම විවිධ සාධකයන් ඔස්සේ වෙනස් විය.ප්‍රධාන සාධකය ලෙස 1977 නිර්මාණය වූ විවෘත ආර්ථිකය පෙන්වාදිය හැකිය.විවෘත ආර්ථික ක්‍රමය හඳුන්වා දීමත් සමගම ලෝක වෙළඳ පොළ දේශීය වෙළඳපොළට විවෘත විය.එහිදී මෙරට සමාජ සංස්කෘතිය සම්පූර්ණයෙන්ම වෙනස් විය.සාම්ප්‍රධායික සමාජය බිඳ වැටීම සඳහා සෘජුවම බලපාන ලදී.විවෘත ආර්ථිකය හේතුවෙන් ග්‍රාමීය සමාජය ආශ්‍රිතව ධනේෂ්වර අර්ථ ක්‍රමයක් නිර්මාණය විය.එමෙන්ම මෙරට වෙළඳපොළ ජාත්‍යන්තර වෙළඳපොළට විවෘත වීම හරහා සමාජය ගෝලීයකරණයට ලක්විය.එමෙන්ම මෙරට විශාල වශයෙන් වෙළඳ කලාපයන් නිර්මාණය විය.එනම් කටුනායක,කොග්ගල,බියගම ආදී අපනයන සැකසුම් කලාපයන් පෙන්වාදිය හැකිය.මේ අනුව ග්‍රාමීය ප්‍රදේශයන් වල ධනේෂ්වර අර්ථ ක්‍රමය ව්‍යාප්ත වීමත් සමග ග්‍රාමීය ප්‍රදේශවල තරුණ ,තරුණියන් වෙළඳ කලාප ආශ්‍රිත රැකියාවල නියලීමට උත්සුක විය.මේ අනුව ඔවුන් ගමෙන් නගරයට සේන්දු විය.වෙළඳ කලාපයන් ආශ්‍රිතව වෙනම සංස්කෘතියක් නිර්මාණය විය.ඒ අනුව ඇඳුම් පැළඳුම්,මොස්තර,වාහන,දිවිනසාගැනීම් ආදී විවිධ සිතුවිලි ගමතුළ ව්‍යාප්ත විය.එමෙන්ම ගුවන් විදුලිය,රූපවාහිනිය වැනි නවීන අංගෝපාංග ගම තුළට එකතුවිය.සමාජය තුළ කනබොන විදිය,අඳින පළඳින විදිය ආහාරපාන යනාදී සියළු අංගයන් නවීකරණය විය.එමෙන්ම මෙරට විදේශ ශ්‍රම සංචරණය ඇතිවිය.එනම් විදේශ ගෘහ සේවයයි.මෙමගින් සමාජ සංස්කෘතික ව්‍යුහය සම්පූර්ණයෙන්ම වෙනස්විය.මේ අනුව ක්‍රමක් ක්‍රමයෙන් සමාජ ව්‍යුහය වෙනස් වූ අතර ඒ හරහා මිනිසාගේ අවශ්‍යතාවයන් ආශාවන් දැඩිවූ අතර මිනිසා සමාජයේ වැරදි දේවල් කිරීම සඳහා පෙළඹුණි.
මෙම සියළු සමාජ වෙනස්වීම් හමුවේ දරිද්‍රතාවය,සාගින්න,දේශපාලන කැළඹීම්,යුද්ධ මෙන්ම විවිධ සමාජ අපරාධයන් නිර්මාණය විය.සමාජ අපරාධ මගින් නිරූපනය කරනුයේ සමාජ අර්බුධයේ ප්‍රකාශිත ආකාරයකි.සමාජයක් යනු මිනිසුන්ද ඇතුළත් නිෂ්පාදන බලවේගයන්ගේ සහ ඔවුන් අතර පවත්නා නිෂ්පාදන සම්බන්ධතාවල ඒකත්වයකි.එබැවින් මිනිසා යනු තවත් එක් සත්වයෙක් නොවේ.සමාජ නිෂ්පාදන ක්‍රියාවලිය ඉදිරියට ගෙනයන නිෂ්පාදන බලවේගයන්ගේ තීරණාත්මක හා මූලික අංගයයි.මානව වර්ගයා තම අනවරත ශ්‍රම ක්‍රියාදාමයේදී දිගු කලක් තිස්සේ ලත් අත්දැකීම් සම්භාරය නූතන පරම්පරාව වෙත සම්ප්‍රේෂණය කරයි.මිනිස් සමාජයේ සංවර්ධනය හෙවත් ඉදිරි ගමන තීරණය වන්නේ මෙම ක්‍රියාවලීන් ඔස්සේය.මේ නිසා හුදකලා මිනිසුන් පවතින්නේ නැත.එමෙන්ම මින්සුන්ගෙන් තොර සමාජයන්ද නොපවතී.සමාජ ප්‍රගමනයේ මූලික බලවේගය වන මිනිසාගේ පැවැත්ම අනතුරට ලක් කිරීම හෝ ඔහු වනසා දැමීම සමාජ අපරාධයක් වෙයි.එය සසමාජ ප්‍රගමනයට බාධාවක් වෙයි.ලාංකේය පසුගාමී ධනේෂ්වර ක්‍රමය තුළ සමාජ අපරාධ අති බහුල වෙමින් පවතී.වර්තමානයේ ධනපති ක්‍රමය පවතින්නේ කල් ඉකුත් වූ තත්ත්වයේය.එනම් යල් පැනගිය සමාජ ක්‍රමයක් ලෙසින්ය.එයින් ජනිත අර්බුදය අනිවාර්යකි.අර්බුදයේ මෝරා යෑමට අනුරූපව සමාජ අපරාධයද වර්ධනය වේ.එහි උච්චතම අවස්ථාවේ ඝාතන සංස්කෘතියක් බිහි වේ.එසේත් නැතිනම් දැන හෝ නොදැන ඝාතන හඹා එන සාජයක් බවට පත්වේ.සියදිවි නසා ගැනීමේ සිට අකල් මරණ ගෙන එන වාහන අනතුරු මෙන්ම ගබ්සා,ස්ත්‍රී දූෂණ ,ළමා අපචාර,කප්පම් ගැනීම්,මංකොල්ල,පුද්ගලික ඝාතන,දේශපාලන ඝාතන,මත්ද්‍රව්‍ය ආදී වශයෙන් මෙම තත්ත්වය විවිධාකාරයෙන් පවතී.ඒවා දෛනික ජීවිතයේ අනිවාර්ය අංගයන් වෙමින් ශීඝ්‍රෙයන් පැතිර යමින් පවතී.මේ අනුව මිනිසා අපරාධ රැල්ලට ගොදුරු වෙමින් තිරිසන් සත්වයෙකු බවට පත්විය යුතුය.නැතිනම් මෙයට එරෙහිව මිනිසත්කම රැකගත යුතුය.ඉතින් සමාජ අපරාධ බිහිවන්නේ කෙසේද? එයට හේතුව ආගමික එකක්ද?සමාජ හේතුවක්ද?ඒවා පරාජය කළ නොහැකිද?හැකිනම් පරාජය කරන්නේ කෙසේද?ආදී වශයෙන් වන ප්‍රශ්න ගණනාවක් සමාජය තුළ තිබේ.වර්තමාන ශ්‍රී ලංකාව තුළ පුන පුනා වර්ධනය වෙමින් පවතින ඝාතන සංස්කෘතියක් ඇත.කප්පම්,මත්ද්‍රව්‍ය,දේපළ හිමිකම් පිළිබඳ ගැටුම් ආදී ආර්ථික කරුණු හා ස්ත්‍රී දූෂණ,ළමා අපචාර වැනි සමාජ සිද්ධි මෙන්ම දේශපාලනය මත ඇතිකරගන්නා පෞද්ගලික හෝ පෞද්ගලික නොවන හේතු මතද ඝාතන සිදුවේ.නිදර්ශන කිහිපයක් සළකතොත් සංගීත සංදර්ශනයක නටමින් සිටියදී නොදැනුවත්ව ශරීරයේ හැපීම පිහි ඇනුමකින් හෝ වෙඩි තැබීමකින් කෙළවර වීම සාමාන්‍ය දෙයක් බවට පත්ව ඇත.ළමයෙකු ඉගනීමට දක්ෂ වීම,විභාග වලින් සමත් වීම,එමෙන්ම ණය වී ආරම්භ කරන සුළු ව්‍යාපාරයක් දියුණු වෙමින් පවතී යැයි මතුපිටින් දැකීම වැනි අවස්ථාවලදී ඊර්ෂියාව මත මරාදැමීම සිදුවේ.මරණයක් සිදුවූ නිවසකදී මියගිය අයට ගෞරවකිරීම පසෙකලා පරණ කෝන්තර පිරිමසා ගැනීමේ දඩ බිමක් බවට එය පත්කර ගැනී සාමාන්‍ය දෙයකි.සොරකමකදී,මංකොල්ල කෑමකදී,ස්ත්‍රී දූෂණයකදී අපරාධකරුවන් හඳුනා ගනීවීය යන සැකයෙන් ඇසින් දුටුවන් මරා දැමීම බහුලය.මෙයට අමතරව ප්‍රේම සම්බන්ධතා,අනියම් සම්බන්ධතා ආදිය හේතුවෙන් බොහෝ අපරාධයන් සිදුවේ.
මේ අනුව මෙම සියළු අපරාධයන්ට හේතු වන්නේ මනුෂ්‍යා තුළ ඇතිවන පෙළඹීම බව මනෝවිද්‍යාඥයින් ,සමාජ මානව විද්‍යාඥයින් ආදී බොහෝ දෙනා ඉදිරිපත් කොට ඇත.අපරාධ සමාජ විද්‍යාඤයකු වන රොබට් .කේ.මර්ටන් විසින් අපරාධයන් ඇති වීමට ප්‍රධානතම හේතුව ලෙස සමාජයෙන් ඇතිවන විවිධ අත්දැකීම්,බලපෑම් හමුවේ නිර්මාණය වන පීඩනය බව පෙන්වා දෙයි.පීඩනය පිට කිරීම සඳහා අපරාධයන්ට යොමු වන බව ඔහු විසින් ඉදිරිපක් කරයි.එමෙන්ම තවදුරටත් ඔහු ඉදිරිපත් කරන ව්‍යුහාත්මක පීඩන න්‍යාය හරහා සමාජ ව්‍යුහය මගින් ඇති කරන බලපෑම අපරාධයන්ට යොමු වීම සඳහා බලපෑම් ඉදිරිපත් කරන බව පෙන්වා දෙයි.
අපගාමීත්වය යනුවෙන් හඳුන්වන්නේ සමාජය විසින් ආප්ක්ෂා කරනු ලබන නීති හා ධර්මතා කඩකිරීයි.එනම් සංස්කෘතියට විරුද්ධව කටයුතු කිරීමයි.සංස්කෘතිය විසින් ගොඩනගා ඇති නිලීන නීතිරීති පද්ධතීන් බිඳ දැමීමයි.එහෙත් අපගාමී ක්‍රියාවන් සිදු කිරීමට මිනිසාව පොළඹනු ලබන්නේද සමාජ ව්‍යුහය මගින්ය.නිදසුනක් ලෙස ගතහොත් ඇමරිකාව විසින් ඉදිරිපත් කරන ලද මතයන් වන ඇමරිකානු සිහිනය හරහා මනුෂ්‍යාට ඉදිරිපත් කරනුයේ මිනිසා වාණිජමය,ආර්ථිකමය වශයෙන් දියුණු විය යුතු බවයි.එහෙත් දරිද්‍රතාවයෙන් පෙළෙන්නන්ට මෙය සිහිනයක්ම විය.එමෙන්ම අඩු අධ්‍යාපනයක් සහිත පුද්ගලයන්ටද මෙය අපහසු කාර්ය්‍යක් විය.උසස් අධ්‍යාපනයකින් යුතු දරිද්‍රතාවයෙන් තොර මිනිසුන්ට සමාජ ව්‍යුහයට අනුව වැදගත්,ගෞවරණීය රැකියාවක් කරමින් යහපත් සමාජ ජීවිතයක් ගතකළ හැකිය. එහෙත් අඩු අධ්‍යාපනයකින් හෙබි පුද්ගලයකුට යහපත් රැකියාවක් සිදුකළ නොහැකිය.සමාජ සම්මතයට අනුව පහත් යැයි නම්දරන රැකියාවක් ඔවුන් වෙනුවෙන් විවෘත වී ඇත.එහෙත් ඇමරිකානු සිහිනය යටතේ මිනිසුන්ට ඉදිරිපත් කරනුයේ මුදල් හම්බ කිරීමටය.එහෙත් අඩු අධ්‍යාපනයෙන් දරිද්‍රතාවයෙන් පෙළෙන පුද්ගලයන්ට යහපත් ලෙස මුදල් හම්බ කිරීමට නොහැකිය.ඔවුන් එලෙස මුදල් උපයා ගැනීමේදී ඔවුන්ට සංස්කෘතිය හරස් වෙයි.ඒ අනුව ඔවුන් තුළින් සමාජ අපගාමීත්වයන් සිදුවේ.එකින් එක නිදසුන් පැහැදිලි කළහොත්:
සමාජය තුළ ගණිකාවකට හිමිව ඇත්තේ පහත්ම ස්ථානයකි.එහෙත් ගණිකා වෘත්තිය යනු මුදල් උපයා ගැනීමේ තවත් එක් රැකියාවකි.අනෙකුත් උසස් රැකියාවන් මෙන්ම මෙම රැකියා මගින් සිදුකරනුයේද මුදල් උපයා ගැනීමයි.එහෙත් සංස්කෘතික නීති රීති හමුවේ ගණිකා වෘත්තිය ප්‍රතික්ෂේප කරනු ලබයි.සියළු මනුෂ්‍යයන් මෙය පිළිකුල් කරනු ලබයි. අනාචාරයේ හැසිරීම වරදක් ලෙසින් සංස්කෘතිය විසින් පෙන්වා දුන්නද එම කාන්තාවගෙන් එම තත්ත්වයට වැටීමට හේතු සමාජය විසින් නොවිමසයි.බොහෝ විට ගණිකාවන් පිටුපස දුක්ඛිත ජීවන ඉරණමක් පවතී.ප්‍රධාන වශයෙන් අඩු අධ්‍යාපන තත්ත්වය පෙන්වා දිය හැකිය.බොහෝ ගණිකාවන් නිර්මාණය වීමට හේතුව බවට පත්ව ඇත්තේ ප්‍රේමවන්තයන් හරහා රැවටීමට ලක්වූ තරුණියන් හෙයිනි.ආදරය නැමති මුලාවට පත්වී තම ජීවිතය විනාශ කරගත් බොහෝ තරුණියන්,තම අධ්‍යාපනයද කඩාකප්පල් කරගෙන,සමාජයෙන්ද ගැරහුම් ලැබ,අවසානයේ ජීවත් වීමේ අවශ්‍යතාවය මත පදනම්ව රැකියාවක් ලෙස ගණිකා වෘත්තිය තෝරා ගනි.ඇයගේ එකම අවශ්‍යතාවය වනුයේ තම දරුවාව ජීවත් කරවීමයි.එදා වේල සපයා ගැනීමයි.ඇතැම් විට වෙනදු රැකියා අවස්ථාවන් ඇයට හිමි නොවීම නිසා ගණිකා වෘත්තිය තෝරා ගත්තා විය හැකිය.එහෙත් සංස්කෘතිය විසින් මෙය ප්‍රතික්ෂේප කරනු ලබයි.ඇයගේ අසරණ කම හේතුවෙන් මෙම තත්ත්වයට පත්වූවද එම රැකියාව මුළු මහත් සමාජයම ප්‍රත්ක්ෂේප කරනු ලබයි.ජීවත් වීම උදෙසා ගණිකා වෘත්තිය කිරීමට පෙළඹූවද සංස්කෘතිය විසින් එය ප්‍රතික්ෂේප කිරීම නිසා එය අපගාමී ක්‍රියාවක් වෙයි.එමෙන්ම මෙම පෙළඹීම අපගාමීත්වයට හේතු වෙයි.
තවත් නිදසුනක් ලෙස සොරකම පෙන්වා දිය හැකිය. සොරකමට හුරු වූ පුද්ගලයන් බොහෝ විට දරිද්‍රතාවයෙන් පෙළෙන්නන් වෙයි.සමාජය තුළ නිරිමාණය වි ඇති ධනාත්මක ආර්ථික සංකල්පයන් හමුවේ දිළිඳු කමෙන් පෙළෙන්නන් සොරකම් කිරීමට පෙළඹෙයි.එයට ප්‍රධානතම හේතුව නම් සමාජය නිර්මාණය වී ඇති ආකාරයයි.සමාජය තුළ ධනවත් පුද්ගලයාට හිමිව ඇති මානුෂීය තත්ත්වය දුප්පත් මිනිසාට හිමි නොවෙයි.හම අතින්ම ඔහු ප්‍රතික්ෂේප වෙයි.රැකියාවක් කිරීමට තරම් අධ්‍යාපනයක් නැති ඔවුන් සොරකම් කිරීමට පෙළඹෙයි.අපට වර්තමාන සමාජයේ සොරකම් කිරීමට ගොස් නීතියේ රැහැනට හසුවූ මිනිසුන් ඕනෑතරම් දැකගත හැකිය.ඔවුන් බොහෝ විට පවසන්නේ “දරුවන් බඩගින්නේ,වේල් දෙකතුනකින් කෑවේ නෑ”යනාදී වශයෙනි.මේ අනුව මෙම දරිද්‍රතාවය හමුවේ ඇතිවන පෙළඹවීම සොරකම වැනි අපරාධයක් කිරීමට පෙළඹී ඇත.
එමෙන්ම දරිද්‍රතාවය මගින් නිරිමාණය වන තවත් එක් අපරාධයක් ලෙස මත්ද්‍රව්‍යට ගොදුරු වීම පෙන්වා දිය හැකිය .හ්‍රී ලංකාව වැනි රටක් ගතහොත් බොහෝ සෙයින් මත්ද්‍රව්‍ය යනාදියට වැඩිපිරිසක් ඇබ්බැහි වන්නේ අධික දිළිඳු කමෙන් පෙළෙන මුඩුක්කු ගෙවල් ආශ්‍රිත ප්‍රදේශයන්වලය.එමෙන්ම මෙම ප්‍රදේශයන් තුළ ගණිකා වෘත්තියේ යෙදෙන පිරිස්ද වැඩිවෙයි.මේ මුඩුක්කු ගෙවල් ආශ්‍රිත ජීවත් වන කුඩා ළමුන් පවා මත්ද්‍රව්‍ය භාවිතයට පෙළඹී ඇත.ඔවුන්ව නිසි මගට ගැනීමට වැඩිහිටියන් කවුරුත් නැත.මන්ද යත් වැඩිහිටියන්ද මෙ වැරදි කිරීමහට ඇබ්බැහි වී සිටින නිසාවෙනි.එමෙන්ම සමාජයද මෙම පුද්ගලයන් ප්‍රතික්ෂේප කිරීම හේතුවෙන් තවදුරටත් මෙම වැරදි කරගෙන යාමට ඔවුන් පෙළඹෙයි.මත්ද්‍රව්‍ය භාවිතා කරන්නන් කල්ලි වශයෙන් එකතු වීමත් සමග ඔවුන් අතරින් තවතවත් අපරාධයන් සිදු වේ.මත්ද්‍රව්‍ය ලබා ගැනීම සදහා අවශ්‍ය මුදල් උපයා ගැනීමට සොරකමට යොමු වෙයි.එමෙන්ම කුලුයට මිනීමැරුමට යොමු වෙයි.මනස විකෘති වීම නිසා ළමා අපචාරයන්,ස්ත්‍රී දූෂණයන් වැනි සාහසික අපරාධයන් කිරීමට පෙළඹෙයි. මේ අනුන සමාජ ව්‍යුහය විසින් මිනිසුන්ගේ පීඩනයන් සිදුකරනු ලබයි.බොහෝ සමාජවල සාර්ථකත්වය අගය කරනු ලැබුවද සංස්කෘතිය විසින් ඒ සාර්ථකත්වය කරා යන ගමන අහුරා ඇත.එහි ප්‍රතිඵලය ලෙස දුප්පත්කම,නූගත්කම යනාදී සාධකයන් පෙන්වා දිය හැකිය.මෙවැනි විවිධ සමාජ ප්‍රශ්නයන් හරහා මනුෂ්‍යා විවිධ වැරදි කිරීම් සඳහා පෙළඹයි.මෙම පෙළඹීම් මගින් සමාජ අපගාමීත්වයක් කරා යයි.මේ හේතුවෙන් පෙළඹීම් හෙවත් අභිප්‍රේරණය,මනුෂ්‍ය සමාජය යහපත්ව පවත්වා ගැනීමට හේතුවෙයි.එමෙන්ම අයහපත් පෙළඹීම් සමාජ අපගාමීත්වයක් ඇති කිරීමට හේතු වෙයි.
සාරාංශය
මනෝ විශ්ලේෂණවාදීහු අභිප්‍රේරණය පිලිබඳ විශේෂ මතයක් දරති.මොවුහු අභිප්‍රේරණය වන ආකාරය පැහැදිලි කරනුයේ අවිඥානක මනස හා අවරෝධණ ක්‍රියාවලිය යන ප්‍රපඤචදෙක මතය.විඥානයට ඉටුකර ගැනීමට අපහසු හෝ දරාගත නොහැකි පීඩාදායක හෝ අසතුටුදායක දේ විඥානයෙන් ඉවත් කිරීම අවරෝධනයෙන් සිදුවේ.මොස් අවරෝදනය කරන ලද ආශාවන් හා සිතුවිලි ඉටුකරගත නොහැකි වු අභිප්‍රායන් යනාදිය අවිඥානයේ තැන්පත්ව තිබී එහි ප්‍රතිඵලයක් වශයෙන් විවිධ ක්‍රියාවන් වලට පෙළඹීමක් ඇතිවේ.මේ හරහා පුද්ගලයා තුළ පෙළඹීම් හෙවත් අභිප්‍රේරණයන් ඇතිවේ.මේ අනුව ඇතිවන පෙළඹීම යහපත් හෝ අයහපත් වෙයි.යහපත් පෙළඹීමක් සමාජයේ අහිතකර නොවූවත් අයහපත් පෙළඹීම තුළින් සමාජයේ අපචාර ක්‍රියා නිර්මාණය වේ.සමාජයක් තුළ යම් අපරාධයක් සිදුවන්නේ යම්කිසි ක්‍රියාවක ප්‍රතිඵලයක් වශයෙනි.ක්‍රියාවක් නිර්මාණය වන්නේ යම්කිසි මනුෂ්‍යයකුගේ අවශ්‍යතාවයන් මතය.එම අවශ්‍යතාවය එම මනුෂ්‍යාගේ මනස අනුව නිර්මාණය වීම හා එය ඉටුකිරීම සඳහා කායික පෙළඹීමක් සිදු කරයි.මේ අනුව ඕනෑම ක්‍රියාවක් සිදුකිරීමට පෙළඹීමක් අවශ්‍ය වේ.ඒ අනුව මනුෂ්‍යයකු යම් ක්‍රියාවක් සිදුකරන්නේ නම් ඒ සඳහා පෙළඹීම මූලික වේ.මේ අනුව පුද්ගලයා අයහපත් දෙයක් සිදුකරයි නම් ඒ සඳහාද පෙළඹීම මූලික වේ.සමාජ අපගාමී ක්‍රියාවන් යනු ප්‍රතිමාන වශයෙන් සමාජ සංස්කෘතිය තුළ නිර්මාණය වු අලිඛිත නීතිරීති කඩකිරීමයි.මේ අනුව මෙලෙස නීතිරීති කඩ කිරීමටද යම්කිසි අභිප්‍රේරණයක් අවශ්‍ය වේ.එහෙයින් සමාජයේ අපරාධයන් ,අපගාමී චර්යාවන් නිර්මාණය වීමට අභිප්‍රේරණය මූලික වශයෙන් බලපායි.
ආශ්‍රිත ග්‍රන්ථ නාමාවලිය.
අධ්‍යාපන මනෝ විද්‍යාව හා ගුරුවරයා.
අධ්‍යාපනයේ මනෝ විද්‍යාත්මක පදනම.
ආචාර්ය උපාලි ගුණසේකර,ජීවිතය හා මනස.
දයා එදිරිසිංහ,මනෝවිද්‍යාව න්‍යාය සහ භාවිතය.
අචාර්ය රාජා ගුණවර්ධන,අධ්‍යාපන මනෝවිද්‍යා සංග්‍රහය.
