ව්‍යාපාර විකාශය
ව්‍යාපාර පසුබිම
පිවිසුම: ව්‍යාපාර විකාශය
අතීතයේ මිනිසා සතුව ඉතා පුළුල් අවශ්‍යතාවයන් නොතිබුණි. ඒ නිසා ඔවුන් තමන්ට එදිනෙදා ජීවත් වීමට අවශ්‍ය කරන දෑ තමා විසින් තනිය ම නිපදවා ගනිමින් දිවි ගෙවීය. මෙලෙස තමාට අවශ්‍ය දෑ තමා විසින් ම නිපදවා ගැනීම “ස්වයං පෝෂිත ආර්ථිකය” ලෙස හැඳින්විය හැකිය.
නමුත් මිනිස් සමාජය ක්‍රමයෙන් දියුණුවත්ම තම අවශ්‍යතා හා වුවමනා පුළුල් වීමත් සමඟ තමන්ට අවශ්‍ය සියල්ලම තනිව නිපදවා ගැනීම අපහසු විය. මෙහිදී විවිධ පුද්ගලයන් තම හැකියාව හා දක්ෂතාව හඳුනාගනිමින් තමා සතු සම්පත් උපයෝගී කරගනිමින් තමන්ට වඩාත් හොඳින් නිපදවිය හැකි භාණ්ඩ වැඩි වශයෙන් නිෂ්පාදනය කර, එහි අතිරික්තය, අනෙක් පුද්ගලයන් එලෙස නිපද වූ නිෂ්පාදන සමඟ හුවමාරු කරගැනීමට පෙළඹීම තුළින් තම අවශ්‍යතා සපුරා ගැනීමට යොමු විය. මෙය “බාටර් ක්‍රමය” ලෙස හැඳින්වීය.
උදා:- එක් පුද්ගලයෙකු මසුන් ඇල්ලීමට දක්ෂ වූ අතර තවකෙකු එළවළු වගාවෙහි දක්ෂ විය. මසුන් මරන්නාට එළවළු අවශ්‍ය වූ විට දී එළවළු වෙළෙන්දාගෙන් එළවළු ලබා ගෙන ඔහුට ඒ වෙනුවෙන් මසුන් ලබා දී තම අවශ්‍යතා සපුරා ගෙන ඇත.
නමුත් බාටර් ක්‍රමය තුළ පැවති දුර්වලතා හා ගැටලු හේතුවෙන් එයින් ඔබ්බට යාමට මිනිසුන්ට සිදු විය.
බාටර් ක්‍රමය තුළ පැවති දුර්වලතා හා ගැටලු
- අවශ්‍යතාවයන්ගේ නොගැලපීම.
එනම්, ඉහත උදාහරණයට ම අනුව මසුන් මරන්නාට එළවළු අවශ්‍ය වුවද, එළවළු ගොවියාට අවශ්‍යවන්නේ සහල් විය හැකිය. එවිට තම අවශ්‍යතාවන් සපුරා ගැනීම්ට ඒහා සමාන (ගැලපෙන) අවශ්‍යතාවයක් පවතින පුද්ගලයෙකු සොයා යා යුතු විය.
- මැනීමේ පොදු මිනුම් දණ්ඩක් නොතිබීම.
එනම්, සමාන අවශ්‍යතා සහිත දෙදෙනෙකු මුන ගැසුනද, හුවමාරු කරගත යුතු ප්‍රමාණයන් තීරණය කිරීම ගැටළු සහගතය. මාළු කූරීන් කී දෙනෙකුට එළවළු මල්ලක් දිය යුතුද? යන ප්‍රශ්නය බිහි විය.
- දෙපාර්ශවය පොදු එකඟතාවයකට නොපැමිණීම.
අවශ්‍යතා සමාන පුද්ගලයන් දෙදෙනෙකු මුණ ගැසුනද, ඔවුන් දෙදෙනා ට තම අවශ්‍යතාවය සපුරා ගැනීමට පොදු තීරණයකට එළඹීම අසීරු විය හැකිය. උදාහරණයක් ලෙස ගතහොත් මසුන් වෙළෙන්දාට රාබු හා අල අවශ්‍යවුවද, එළවළු වෙළෙන්දා වට්ටක්කා සහ අල ලබා දීමට කැමති වේ. නැතහොත් මසුන් වෙළෙන්දා මාළු කූරීන් 5ක් දීමට කැමතිවුවද, එළවළු වෙළෙන්දාට මාළු කූරීන් 10ක් අවශ්‍ය බව පවසයි.
- ගබඩා කර තබා ගැනීමේ අපහසුව.
එදා අතීතයේ අදමෙන් ශීතාගාර වැනි පහසුකම් නොතිබිණී. ඒනිසා මිනිසුන් තම අවශ්‍යතා සපුරා ගැනීමට ගැලපෙන පුද්ගලයන් සොයා ගන්නා විට තම නිෂ්පාදන කල් ඉකුත්වී, නරක් වී හෝ සතුන් කා දැමීම වැනි කුමක් හෝ උපද්‍රවයකට ලක්ව පවතී (උදා:- මස්, මාළු, කිරි වැනි දෑ).
- ප්‍රවාහන ගැටලු
සුදුසු අවශ්‍යතාවයක් සහිත කෙනෙකු මුණ ගැසුනද, ප්‍රමාණයන් එකඟ වුවද, ඒවා අදාළ ස්ථානයන් වෙත රැගෙන යාමේ ප්‍රශ්නයක් පැවතිණි. වර්තමානයේ මෙන් එදා මාර්ග හෝ වාහන නොතිබිණි කර මත විශාල බර ගෙනයාම කළ නොහැක. උදා:- ධාන්‍ය මළු 50කට, ගවයන් 10 දෙනෙකු හුවමාරු කර ගැනීම.
ඉහත ආකාරයේ ගැටළු පැන නැගීම නිසා මිනිසා විසින් වටිනාකම මැනීම සඳහා පොදු මිනුම් දණ්ඩක් ලෙස “මුදල් භාවිතයට” යොමු විය. මෙහිදී මුල් අවස්ථාවේ දී ලෝහ කැබලි, ගල් කැබලි වැනි අවිධිමත් මුදල් ඒකක භාවිතයට ගත්තද, පසු කාලීනව විධිමත් මුදල් ඒකක භාවිතයට මිනිසුන් යොමු විය. උදා:- කහවණු, කසාපණ, තඹ කාසි.
මුදල් භාවිතයත් සමඟ වෙළඳපළ ඉලක්ක කරගනිමින් වක්‍ර නිෂ්පාදනයට මිනිසා පිවිසිය.
(වක්‍ර නිෂ්පාදනය යනු, වෙළඳපළ ඉලක්ක කරගනිමින් කරනු ලබන නිෂ්පාදනයයි. ඍජු නිෂ්පාදනය යනු, තමා උදෙසා කරනු ලැබූ ස්වයං නිෂ්පාදනයයි.)
වෙළඳපළ ක්‍රම ක්‍රමයෙන් ව්‍යාප්තියත් සමඟ එය අන්තර්ජාතික වෙළඳපළ දක්වා ප්‍රවාහනය, ගබඩා පහසුකම් වැනි උපකාරක සේවා වල දියුණුවත් සමඟ වර්ධනය විය. මේ වන විට ඉලෙක්ට්‍රොනික වාණිජ්‍යය දක්වා විකාශනය ව් ඇත. ඉලෙක්ට්‍රොනික වාණිජ්‍යය තුළදී, භෞතික මුදල් භාවිතයක් නොමැති අතර විද්‍යුත් මුදල් භාවිතා කරයි. විශ්ව ගම්මාන සංකල්පය තුළදී මෙය වඩාත් වැදගත් වේ.
විශ්ව ගම්මානයක් යනු, නවීන තාක්ෂණයේ හා ප්‍රවාහන පහසුකම් වල දියුණුවත් සමඟ මුළු ලෝකයම එකම ගම්මානයක් ලෙස සීමා මායිම් නොමැතිව ක්‍රියා කිරීමයි.
සාරාංශය: ව්‍යාපාර විකාශය
ස්වයං පෝෂිත ආර්ථිකය
බාටර් ක්‍රමය
වෙළඳපළ/මුදල් භාවිතය
අන්තර්ජාතික වෙළඳපළ
ඉලෙක්ට්‍රොනික වාණිජ්‍යය
සටහන
චමරී කාන්චනමාලා
(BSc.Special(BIT)RUSL,aat(Quallified))
