නිර්මාණාත්මක සන්නිවේදනය
සන්නිවේදය යනු සෘජු ප්‍රකාශනයක් ලෙස මෙන්ම වක්‍ර ප්‍රකාශනයක් ලෙස ද ඉදිරිපත් කළ හැකි දෙයකි. මෙහිදී සෘජුව ඉදිරිපත් කරනවාට වඩා වක්‍රව යමක් ඉදිරිපත් කිරිමෙන් ග්‍රහකයට වඩා වින්දනාත්මක සන්නිවේදනයක් සිදු කළ හැක. එය අප හදුන්වන්නේ නිර්මාණාත්මක සන්නිවේදනයක් ලෙසිනි. වින්දනය යනු ඕනෑම පුද්ගලයකු ඉතා කැමැත්තෙන් බාර ගන්නා ඉතා ප්‍රිය කරන දෙයකි.කුඩා දරුවකුට තිත්ත බෙහෙත් මව විසින් ලබා දේ නම් එය එක්වරම පානය කිරීමට කුඩා දරුවා මැලි කමක් දක්වයි. එවිට කුඩා දරුවන්ගේ බෙහෙත් පැණි රසයෙන් යුක්ත කිරීමට මවට හෝ බෙහෙත් නිෂ්පාදකයින්ට සිදුවේ. එම පැණි රසය දරුවාට ලබා දෙන්නේ වින්දනයකි.එම වින්දනය නිර්මාණශීලිව සන්නිවේදනය කිරීමේ ප්‍රමුඛ උපකරණයකි.
නිර්මාණශීලීව අදහස් ප්‍රකාශ කිරීම සන්නිවේදකයා සතු නිර්මාණශීලි බව වන අතර එය නිර්මාණශීලීව ග්‍රහණය කර ගැනීම නිර්මාණශීලි ග්‍රාහකයාගේ කටයුත්තයි. නිර්මාණාත්මක සන්නිවේදනය ක්‍රියාත්මක වනනේ මෙම අංශ දෙකම සම්පූර්ණ වූ පසුවය. නිර්මාණශීලීත්වය ඉතා ඉහළ තලයක තිබෙන සන්නිවේදකයෙක් ඉදිරිපත් කරන සංදේශයක් වුවද ග්‍රාහකයා එය නිර්මාණශීලීව වටහා නොගන්නේ නම් එහි නිර්මාණාත්මක සන්නිවේදනයක් නොමැත. මෙම සන්නිවේදන කාර්යය මෙන්ම ග්‍රාහක ද එක් එක් පුද්ගලයාගෙන් පුද්ගලයාට වෙනස් වේ.
සන්නිවේදකයින් නිර්මානශීලීත්වය විදහා පාන්නේ විවිධ දෘෂ්ඨි කෝණයන්ගෙනි. ඔවුන් තම නිර්මාණ සමාජගත කරන්නේ එම කෝණයන් පදනම් කරගෙනය. එය සියලුම සන්නිවේදකයින්ට පොදු වූවක් නොවේ. අප නිදසුනක් ආකාරයට පහැදිළි කලොත්, රූපවාහිනී නාලිකාවක නිවේදකයින් දෙදෙනෙක් සැසදීමේ දී එකම ඉදිරිපත් කිරීම වුවද සපුරා වෙනස් අයුරින් ඉදිරිපත් කරයි. එමෙන්ම ග්‍රාහකයා ද නිර්මාණශීලි වන්නේ ඒ ඒ පුද්ගලයාට අනුරූප වන අයුරිනි. සෑම ග්‍රාහකයෙක්ම එකම මට්ටමින් කිසිදු සංදේශයක් වටහා ගන්නේ නැත.
පුද්ගලයාගේ එදිනෙදා ජීවිතය තම පුද්ගලික ජීවිතය හා සමාජ ජීවිතය ලෙස අංග දෙකක් යටතේ හදුනාගත හැකිය. තම පුද්ගලික ජීවිතයේ අතිශය පුද්ගලික සන්නිවේදන කටයුතු පවා නිර්මාණාත්මකව ඉදිරිපත් කිරීම වඩා සාර්ථක ජීවිතයක් ලබා දෙන්නකි. උදාහරණ ලෙස සැමියා හා බිරිද අතර පවතින ඉතා සමීප සන්නිවේදන කටයුතු සෘජු අදහස් ප්‍රකාශ කිරීමකින් තොරව නිර්මාණාත්මකව ඉගි, හා වචන ආදීය මගින් ප්‍රකාශ කිරීම වඩා ආකර්ෂණීය වේ .එසේම ඕනෑම පුද්ගලයෙකුට තම පවුල් සමාජය සහ ඉන් එපිටට විහිදුනු මහා සාමජයේ බැදීම ද දක්නට ලැබේ.
සමාජයේ තේරුම් ගන්නේ සහ එම සමාජය සමග ගැටෙන්නනේ එම සමාජ බැදීම් වල ප්‍රබලතාව මතය.නිර්මාණාත්මක සන්නිවේදනය තුළින් එම සමාජ සබදතා ඉතා ප්‍රබල ලෙස වර්ධනය වේ. ජනශ්‍රැති හා ජන කලාවන් යනු ජනයා විසින් කාලයත් තිස්සේ භාවිතා කිරීමෙන් සහ නිර්මාණාත්මකව ඉදිරිපත් කිරීමෙන් සමාජය තළෙ ස්ථාපිත වූවකි. එම ජනශ්‍රැතිය හා ජන කලාවන් නිර්මාණාත්මක සන්නිවේදනයේ අග්‍ර ඵලයන් වේ. ලාංකීය ගැමියා තම එදිනෙදා කටයුතු වල වෙහෙස මහන්සිය නිවා ගැනීමට ජන කවියක්, ජන ගීයක් ,ජන කතාවක් , ජන නාටකයක් ආදි ලෙස නිර්මාණය කර ගත් හා අව්‍යාජ මෙන්ම ඉතා ඉහළ නිර්මාණශීලී ගුණයන්ගෙන් යුතු එම ජනශ්‍රැති සැබවින්ම නිර්මාණාත්මක සන්නිවේදනයේ අග්‍ර ඵලයන් වේ.
මිනිසා විසින් යම් යම් සමාජයක් විවරණය කරගන්නා අයුරු එම සමාජය දෙස පුද්ගලයා දරණ ආකල්ප ද එම නිර්මාණය තුළින් නිරූපණය වේ. සාම්ප්‍රදායික ජනශ්‍රැතිය හා ජන කලාවන් තුළ විවිධ සමාජ ගැටුම්, විවිධ සමාජ අකටයුතුකම්, විවිධ සමාජය විපරීතයන් දැඩි ලෙස හාස්‍යට ලක් කර තිබේ. සමාජයට හානි කරන හා සමාජය විසින් ප්‍රතික්ෂේප කරන විවිධ චරිත හාස්‍යය ලක් කරමින් විවිධ සාම්ප්‍රායික නිර්මාණාත්මක සන්නිවේදනයන් නිර්මාණය වී තිබේ . යම් සමාජ ගැටලුවක් ලෙස යම් වෘත්තියක පවතින සමාජ අසාධාරණයක් ලෙස නිර්මාණකරුවා ඉතා ගැඹුරු දැක්මක් ඉදිරිපත් කරයි.
