තොරතුරුවල මූලික තැනුම් ඒකක සහ ගති ලක්ෂණ විමර්ශනය - දෙවන කොටස
දත්ත සහ තොරතුරු නිර්මාණය, බෙදාහැරීම සහ කළමනාකරණය සඳහා තාක්ෂණයේ අවශ්‍යතාව
ඕනෑම පද්ධතියක තොරතුරු සැකසීම හස්ත ක්‍රමය සහ ස්වයංක්‍රීය ක්‍රමය යන ක්‍රම දෙකෙන් එකකින් කළ හැක. ඒවා පිළිබඳ විස්තර මෙසේය.
හස්ත ක්‍රමය
දත්ත රස කිරීම, ගබඩා කිරීම, සැකසීම, තොරතුරු ලබා ගැනීම වැනි සියලු කාර්යන් මිනිස් ශ්‍රමය උපයෝගී කරගෙන කිරීම හස්ත (manual) ක්‍රමය ලෙස හැඳින්වේ. මේ සඳහා කඩදාසි, පෑන්, පැන්සල් වැනි දේ යොදා ගනු ලබයි. දරු උපතක විස්තර සටහන් කර උප්පැන්න සහතිකයක් සැකසීම නිදසුනකි. එහි ඇති සියලු දත්ත පෑන් සහ කඩදාසි භාවිතා කර එක්රැස් කරගත් ඒවාය. පසුව ඒවා ෆයිල් කවරවල රුවා රාක්ක මත ගබඩා කර තබනු ලබයි. නැතහොත් ලාච්චුවල බහා තබයි. හස්ත ක්‍රමයේදී තොරතුරු සැකසීමට යොදා ගන්නේ මිනිස් මොළයේ බලයයි. යන්ත්‍රය බලයක් නොවේ.
ස්වයංක්‍රීය ක්‍රමය
පරිගණක උපයෝගී කරගෙන දත්ත සැකසීම මෙනමින් හැඳින්වේ. මේ සඳහා පරිගණක දෘඩාංග, මෘදුකාංග, දත්ත සමුදායන් යනාදිය උපයෝගී කරගනී. මෙහිදී තොරතුරු සැකසීමේ කාර්ය කරන්නේ මිනිස් මොළයේ බලයෙන් නොව පරිගණකයේ බලයෙනි. එනම් තොරතුරු සැකසීම ස්වයංක්‍රීයය. බැංකු ගිණුම පිළිබද තොරතුරු සැකසීම පාස් පොතෙහි සටහන් කිරීම මෙවැනි ස්වයංක්‍රීය වැඩකි. හස්ත ක්‍රමය සමඟ ස්වයංක්‍රීය ක්‍රමයේ සැසඳීම මෙසේය. ස්වයංක්‍රීය ක්‍රමය වඩා වාසිදායක බව ඉන් පෙනේ.
|
හස්ත ක්‍රමය |
ස්වයංක්‍රීය ක්‍රමය |
|
නිවැරදි බව අඩුය. |
නිවැරදි බව වැඩිය. |
|
වේගය අඩුය. |
වේගය වැඩිය. |
|
මිනිස් ශ්‍රම යෙදවුම් වැඩිය. |
මිනිස් ශ්‍රමය අඩුය. |
|
විශ්වාසී බව අඩුය. |
විශ්වාසී බව වැඩිය. |
|
දත්ත සහ තොරතුරු ගබඩා කිරීමට වැඩි ඉඩක් අවශ්‍ය වේ. |
දත්ත සහ තොරතුරු ගබඩා කිරීමට වය වෙන්නේ අඩු ඉඩකි. |
|
තොරතුරුවල ගුණාත්මක බව අඩුය. |
තොරතුරුවල ගුණාත්මක බව වැඩිය. |
|
තොරතුරුවල නිමාව අඩුය. |
තොරතුරු ඉහළ නිමාවකින් යුක්තය. |
|
අවශ්‍ය තොරතුරු නැවත ලබා ගැනීම අපහසුය. |
ඉක්මනින් අවශ්‍ය කරන තොරතුරු සොයා ගත හැක. |
|
මහන්සිය මෙන්ම වියදම ද වැඩිය. |
මහන්සිය මෙන්ම වියදම අඩුය. |
එදිනෙදා ජීවිතයේදී තොරතුරුවල වැදගත්කම
තාක්ෂණික සහ සමාජීය දියුණුවත් සමඟ අපගේ අවශ්‍යතා ද වැඩිවී මෙන්ම සංකීර්ණ වී ද තිබේ. අතීතයේදී මිනිසා කටයුතු කරන ලද්දේ තම ප්‍රදේශයේ වෙසෙන අනෙක් ජනතාව සමඟ පමණි. එහෙත් දැන් අපි පුළුල් සමාජයක් සමඟ කටයුතු කරන්නෙමු. අන්තර්ජාලය හරහා රට රටවල් අතරද ගනුදෙනු කරන්නන් වෙමු. මේ වැඩවලදී නොයෙක් තොරතුරු අවශ්‍ය වේ. එනිසා දැන් තීරණ ගැනීම වඩාත් සාර්ථක කර ගන්නට අවශ්‍ය තොරතුරු ඉක්මනින් සහ නිවැරදිව ලබාගත යුතුව තිබේ. මෙසේ නිතර අවශ්‍ය වෙන තොරතුරු මාදිලි මෙසේය.
- රැකියාවල වෘත්තීය කටයුතුවලට අදාළ තීරණ ගන්නට අවශ්‍ය තොරතුරු
- අසනීපවලට ප්‍රතිකාර ගන්නට අවශ්‍ය වෛද්‍යවරු සහ රෝහල් පිළිබඳ තොරතුරු
- භාණ්ඩ මිලට ගන්නට අවශ්‍ය වෙළෙඳ පොළ තොරතුරු
- ඉගෙන ගැනීම සඳහා අවශ්‍ය අධ්‍යාපනික තොරතුරු
- ගමනා ගමනය සඳහා ගුවන් සහ දුම්රිය ටිකට්පත් වෙන්කර ගැනීම, වාහන තදබදය දන ගැනීම වැනි තොරතුරු
- කාලගුණික තොරතුරු
- විනෝදාත්මක කටයුතු සඳහා චිත්‍රපට, නාට්‍ය ආදිය ප්‍රදර්ශන අදාළ තොරතුරු
- පුරාවිද්‍යාත්මක කටයුතු සඳහා පුරාවස්තු සහ සෙල් ලිපි වැනි දේ පිළිබඳ තොරතුරු
මෙම තොරතුරු ලබා ගන්නට නවීන මිනිසාට තොරතුරු තාක්ෂනය විශාල වශයෙන් පහසුකම් සලසා දේ. ඊට නිදසුන් කීපයක් මෙසේය.
- රැකියාවල වෘත්තීය කටයුතුවලට අදාළ තීරණ ගන්නට වීඩියෝ සංවාද පැවැත්වීම, ඊමේල් වැනි සේවා ඔස්සේ තොරතුරු හුවමාරු කිරීම කළ හැක.
- අන්තර්ජාලය හරහා වෙළෙඳ පොළ තොරතුරු ලබා ගෙන ඒවා ඔස්සේ මාර්ගස්ථ ව (online) භාණ්ඩ මිලදී ගැනීම් කළ හැක.
- බැංකු, රක්ෂණ සහ ලීසිං වැනි සේවාවන්වලට අදාළ තොරතුරු අන්තර්ජාලය හෝ දුරකථන මගින් ලබාගෙන එම සේවා කරගත හැක.
- වෛද්‍යවරු හමුවීමට වේලාව වෙන් කර ගැනීම, වෛද්‍ය පරීක්ෂණ කර ගැනීමට වේලාව වෙන් කා ගැනීම වැනි වැඩ කර ගන්නට මෙන්ම අන්තර්ජාලය සහ දුරකථන භාවිතා කළ හැක.
ඉලෙක්ට්‍රොනික තාක්ෂණයේ ප්‍රයෝජන
පරිගණක තාක්ෂණයේ දියුණුවත් සමඟ වෙනත් බොහෝ ක්ෂේත්‍ර පරිගණක තාක්ෂණයත් සමඟ අනුබද්ධව විශාල දියුණුවක් ලබා ගති. එසේම ඉලෙක්ට්‍රොනික මෙන්ම වෙනත් තාක්ෂණ ද දියුණුවීමට පරිගණක තාක්ෂණ ඉවහල් වී ඇත. ඉන් කීපයක් ගැන විස්තර මෙසේය.
කලින් ඇනලොග් ආකාරයෙන් තිබුණු දුරකථන, ඔරලෝසු, කැමරා, රූපවාහිනී යන්ත්‍ර වැනි බොහෝ උපකරණ ඩිජිටල් තාක්ෂණයට අනුව නිපදවා කර ඇත.
3G සහ 4G යනාදී තාක්ෂණ යොදා ගෙන බ්‍රෝඩ්බෑන්ඩ් ක්‍රමයට අන්තර්ජාල පහසුකම් ලබා දෙයි. කලින් තිබුනේ කේබල් සම්බන්ධතා හරහා අන්තර්ජාල සම්බන්ධතා ලබා දෙන ක්‍රමය බව දනිමු.
- ජීපීඑස් තාක්ෂනය, අන්තර්ජාල සම්බන්ධතාව ලබා ගැනීම වැනි වැඩවලට චන්ද්‍රිකා තාක්ෂනය යොදා ගැනේ. මේ සමඟ කලින් විශේෂ විද්‍යාත්මක උපකරණයක් වූ චන්ද්‍රිකාව ද සාමාන්‍ය සන්නිවේදන උපකරණයක් බවට පත්වී තිබේ.
- ආරක්ෂක කැමරා පද්ධති වැනි ආරක්ෂක උපකරණ දැන් ගෙදර දොර සාමාන්‍ය උපකරණයි. මේවා දැන් තිබෙන තත්වයට දියුණු වී තිබෙන්නේ ද පරිගණක තාක්ෂණය නිසාය.
- දැන් තිබෙන මෝටර් රථවල ක්‍රියාකාරීත්වය පරිගණක මඟින් පාලනය කෙරේ. එම මෝටර් රථවල කාර්මික දෝෂ සෙවීමට ද පරිගණක යොදා ගැනේ. මේ නිසා මෝටර් රථවල ක්‍රියාකාරීත්වය උසස් වී තිබෙනවා පමණක් නොව ඒවායේ දෝෂ සොයා ගැනීමට ද පහසු වී තිබේ.
- වෛද්‍ය පරීක්ෂණ කටයුතුවල පටන් සැත්කම් කිරීම දක්වා යොදා ගන්නා විවිධ වෛද්‍ය තාක්ෂණික උපකරණ පරිගණක යන්ත්‍ර භාවිතා කෙරෙන ඒවාය. එසේම රුධිරයේ සීනි මට්ටම පරික්ෂා කිරීම වැනි වැඩ කරගත හැකි පරිගණකගත උපාංග නිවෙස්වලදී සාමාන්‍ය මහජනයාට භාවිතා කළ හැකි තරම් සරලව දැන් නිපදවා තිබේ.
- ඒටීඑම් යන්ත්‍ර හරහා ගනුදෙනු කිරීම මෙන්ම ක්‍රෙඩිට් කාඩ් හරහා ගනුදෙනු කිරීමේ පහසුව ද ලැබී තිබෙන්නේ පරිගණක තාක්ෂණයේ දියුණුවත් සමඟය.
