හයවන පරාක්‍රමබාහු රජුගේ බිරිඳ, පුතුන් සහ දියණියන් පිළිබඳ මත
හයවන පරාක්‍රමබාහු රජතුමා රාජ්‍යත්වයට පත් වූ දින වකවානු පිළිබඳව විවිධ ඓතිහාසික මූලාශ්‍ර වල විවිධ කරුණු ගෙනහැර දැක් වුවත් රාජාවලිය දක්වන පරිදි ක්‍රිස්තු වර්ෂ 1415 දී හයවන පරාක්‍රමබාහු රජු කෝට්ටේ රාජ්‍යත්වයට පත් විය. තව දුරටත් සඳහන් වන්නේ රජතුමා රයිගම සිට කෝට්ටේ රාජධානියට මාරු කරන ලද්දේ වැඩි ආරක්ෂාව සඳහා බවයි. මහාවංශයේ දෙවන භාගයෙහි දැක්වෙන පරිදි හයවන පරාක්‍රමබාහු රජතුමා විසින් කෝට්ටේ සිරිවර්ධන පුරයෙහි තුන්මහල් දළදා මන්දිරයක් කරවූ බව සඳහන් වේ. මේ බව සැළලිහිණි සන්දේශයෙන් ද සනාථ වේ.
හයවන පරාක්‍රමබාහු රජුට එක් බාල සොහොයුරෙක් සිටි අතර ඔහුට යුවරජ තනතුර හිමිවිය. මේ යුව රජු පිළිබඳව විස්තර දැක්වෙන්නේ පරවි සන්දේශයේනි. ඒ අනුව යුවරජු මායාදුනු නුවර වාසස්ථානයක් කරගත් බව පරවි සංදේශයෙන් පැහැදිලි වෙයි. මෙහි සඳහන් මායාදුනු නුවර සතර කෝරළය අම්බුලුගල විය හැකි බව විද්වතුන්ගේ අදහසයි.
හයවන පරාක්‍රමබාහු රජුගේ බිසව වූයේ කීරවැල්ලේ කුමරියක බව රාජාවලියේ සඳහන් වුවද ඇගේ නම එහි සඳහන් නොවේ. නමුත් රජුගේ මව සුනේත්‍රා දේවිය සහ දියණියක් වූ උලකුඩය දේවිය පිළිබඳව සමකාලීන සාහිත්‍ය ග්‍රන්ථවල සඳහන් වේ.
හයවන පරාක්‍රමබාහු රජුට පුතුන් සිටි බව සනාථ වන්නේ හංස සංදේශයේ එන පද්‍යකිනි.
"පසිඳු රජකුමරුවන් සහ සිරිත් යුත"
එහි රජකුමරුවන් යැයි දක්වා ඇති බැවින් පැහැදිලි වන්නේ රජකුමරුවන් එක් අයෙකුට වඩා සිටි බවයි. නමුත් තමාට පිරිමි දරුවන් නොසිටි බැවින් රජු දරුවන් තිදෙනෙක් පුත් තනතුරේ තබා ගත් බව සඳහන් වේ. මින් එක් අයෙකු වූයේ තොටගමුවේ ශ්‍රී රාහුල හිමියන්ය. හයවන පරාක්‍රමබාහු රජතුමා තමා ළදරු කල පටන් හදා වඩා ගත් බව තොටගමුවේ ශ්‍රී රාහුල හිමියන්ගේ පංචිකා ප්‍රදීපයෙහි සඳහන් වේ.
රජතුමා විසින් හදා ගත් අනෙක් දරුවන් දෙදෙනා වන්නේ සපුමල් කුමරු හා අම්බුලුගල කුමරුය. මොවුන් දෙදෙනා පිළිබඳව පෘතුගීසි ලේඛක කූටෝගේ වාර්තාවෙහි ද දැක්වේ. කූටෝගේ වාර්තා වලට අනුව සපුමල් කුමරුගේ හා අම්බුලුගල කුමරුගේ පියා වූයේ දඹදිව සිට පැමිණි පනික්කාර් නමැත්තෙකි. කූටෝ පවසන පරිදි පනික්කාර් කෙරෙහි පැහැදුණු පරාක්‍රමබාහු රජතුමා ඔහුට සිංහල කාන්තාවක් සරණ පාවා දුන් අතර ඔහුට උපන් දරුවන්ගේ නම් සපුමල් කුමරු නමිනද අනෙකා අම්බුළු කුමරා නමින්ද ප්‍රකට වූ බව සඳහන් වේ. හයවන පරාක්‍රමබාහු රජතුමා විසින් මොවුන් දෙදෙනා පුත් තනතුරෙහි තබා ඇති දැඩි කළ බව සඳහන් වේ.
සමකාලීන සාහිත්‍ය ග්‍රන්ථ දෙකක සඳහන් වන ආකාරයට හයවන පරාක්‍රමබාහු රජුට දූ කුමරියන් දෙදෙනෙකු සිටි බව දැක්වේ. චන්ද්‍රවතී නම් කුමරියක සිටි බව පරිවි සංදේශයෙන් පැහැදිලි වේ. තවද උලකුඩය නමින් දූ කුමරියක් සිටි බව කාව්‍යශේඛරය සහ සැළලිහිණි සංදේශය මගින් සනාථ වේ. නමුත් මහාචාර්ය සෙනරත් පරණවිතාන මහතා දක්වන්නේ චන්ද්‍රවතී යනුවෙන් හැඳින්වූ කුමරියද උලකුඩය දේවියම බවයි. මේ බව තවදුරටත් සනාථ වන්නේ පෘතුගීසි ලේඛක කූටෝද දක්වා ඇත්තේ හයවන පරාක්‍රමබාහු රජුට එක් දියණියක් සිටි බවයි.
තොටගමුවේ ශ්‍රී රාහුල හිමියන් විසින් පරවි සංදේශය ලියන ලද්දේ උලකුඩය දේවියට සුදුසු සැමියෙක් හා සිහසුන හෙබවීමට සුදුසු පුතෙකු ලබාදීමට දෙවිනුවර උපුල්වන් දෙවියන්ට කරන ආයාචනයක් වශයෙනි. උලකුඩය දේවියගේ සැමියා වූයේ නන්නූර්තුනයාර් මැතිය. තොටගමුවේ ශ්‍රී රාහුල හිමියන් සැළලිහිණි සංදේශය ලිව්වේ පුතකු ලබා දෙන ලෙස කැලණියේ විභීෂණ දෙවියන්ට කරන ලද ආයාචනයක් ලෙසටය. පෘතුගීසි ලේඛක කූටෝ සඳහන් කරන්නේ හයවන පරාක්‍රමබාහු රජුගේ දියණිය විවාහ වූයේ සොළී කුමරකු සමඟ බවයි. ශ්‍රේෂ්ඨ පාලකයෙක් වූ හයවන පරාක්‍රමබාහු රජතුමා පිළිබඳව සමකාලීන බොහෝ සාහිත්‍ය මූලාශ්‍ර වලින් හෙළිදරව් වේ.
