අ.පො.ස සා.පෙළ 2015 විභාග අත්වැල - ප්‍රශ්න මාලාව 25

36. දත්ත (Data) සහ තොරතුරු (Information) අතර වෙනස එක් වාක්‍යයකින් පැහැදිලි කරන්න.

දත්ත යනු අපට එදිනෙදා ජීවිතයේදී මූලික අර්ථයක් ලබා දෙන, කිසිදු ආකාරයක සකස් කිරීමකට භාජනය නොකළ කරුණු වන අතර තොරතුරු යනු දත්ත අවශ්‍ය ලෙස එනම් ලබන්නාට කිසියම් අර්ථයක් දෙන ආකාරයට සකස් කළ කරුණු වේ.

37. දත්ත වර්ගීකරණය කළ හැකි ආකාර 2 නම් කර ඒවාට උදාහරණ 2 බැගින් දෙන්න.

ප්‍රමාණාත්මක දත්ත (Quantitative data) සහ ගුණාත්මක දත්ත (Qualitative data)

ප්‍රමාණාත්මක දත්ත (Quantitative data) : සංඛ්‍යාත්මක ලෙස ඉදිරිපත් කළ හැකි දත්ත - උස, දුර, කාලය, උෂ්ණත්වය, පීඩනය, සංඛ්‍යාතය, වේගය, වර්ගඵලය. ගුණාත්මක දත්ත (Qualitative data) : සංඛ්‍යාත්මක ලෙස ඉදිරිපත් කළ නොහැකි දත්ත - හැඩය, පාට, ලස්සන, සුවඳ

38. තොරතුරු වල ගති ලක්ෂණ මොනවාද?

අර්ථවත්, විශ්මය දනවන සුළුය, පෙර දැනුම නවීකරණය කරයි,  අන්තර් සන්නිවේදන මාධ්‍යයකි, කාලීනයි, තීරණ ගැනීමට උපකාරී වේ,  අදාල කාර්යය සඳහා උචිත/ අදාල වේ,  ප්‍රමාණවත් වේ, නිවැරදි වේ,  තොරතුරු සැකසීම සඳහා දත්ත ලබා ගන්නා ප්‍රභවය (Source) විශ්වාසවන්ත විය යුතුයි,  නිවැරදි වේලාවට සැකසිය යුතුයි,  නිශ්චිත වටිනාකමක් ඇත.

39. දත්ත විශාල ප්‍රමාණයක් අතින් සැකසීමේ දී මුහුණපාන ගැටළු මොනවාද?

කාර්‍යක්ෂමතාවය අඩුය,  නිරවද්‍යතාවය අඩුය,  විශාල කාලයක් ගත වීම,  විශ්වාසනීයත්වය අඩුය,  ආදානය කළ අනුපිළිවෙලින්ම සටහන් කිරීමට සිදුවීම, අනවශ්‍ය දත්ත මැකීමට (ඉවත් කිරීම) අපහසුය,  දත්ත යාවත්කාලීන කිරීම අපහසුය,  තැන්පත් කිරීම සඳහා වැඩි ඉඩක් අවශ්‍ය වීම,  මිනිස් ශ්‍රමය විශාල ලෙස අවශ්‍ය වීම,  ස්වාභාවික ආපදා,  සතුන්ගෙන් වන හානි,  ගින්නෙන් සිදුවන හානි වැනි ආකාර මගින් විනාශ වීමේ ඉඩකඩ ද  වැඩි වීම.

40. දත්ත හා තොරතුරු රැස් කරගත හැකි ආකාර මොනවාද?

සම්මුඛ සාකාජ්චා මගින් (Interviews)
ප්‍රශ්නාවලි (Questionaries’) මගින්
විමසීම් (Inquiries) මගින්
පෝරම මගින් (forms)

41. පරිගණක පද්ධතියක මූලික සංරචක මොනවාද? නම් කර හඳුන්වන්න.

දෘඩාංග (Hardware), මෘදුකාංග (Software), ස්ථිරාංග (Firm Ware), ජීවාංග (Live Ware)

42. වෙබ් කැමරාව (Web camera) භාවිතා වන අවස්ථා 2 ක් ලියන්න.

අන්තර්ජාල දුරකථන සම්බන්ධතාවයක දී පුද්ගලයින් සජීවීව දිස්වීම සඳහා (Internet Telephony)
වීඩියෝ සම්මන්ත්‍රණ පැවැත්වීමට (Video Conferencing)

43. ස්ථානීය උපාංග (Pointing devices) 5 ක් ලියා දක්වන්න.

මාර්ග ගුලාව (Track ball) : මුසිකයේ ක්‍රියාකාරිතවයට බොහෝ සෙයින් සමාන කර්සරය (Curser) එහා මෙහා ගෙනයාම සඳහා බෝලයක් සවිකර ඇත.පැරණි උකුල් පරිගණකවල (Laptop) බෙහෙවින් භාවිතා විය.
ආලෝක පෑන (Light Pen): පෑනක ස්වරූපය ඇති ආලෝක සංවේදී උපකරණයකි. තිරය මත අඳින රූප / සංඛේත පරිගණකයට ආදානය කළ හැකිය.
Joysticks: පරිගණක ක්‍රීඩා (Computer Gaming) කිරීම වැනි විනෝදාත්මක කටයුතු වලදී භාවිතා කරයි.
ස්පර්ශ සංවේදී තිරය (Touch Screen / Touch Pad): ලේසර් කිරණ ධාරාවක් (Laser Beam) නිකුත්වන තිරය මත ඇඟිල්ලට එය වැදීමෙන් එය හඳුනා ගනියි. මෙම උපාංගය ස්ථර වශයෙන් පවතින අතර මෙය මත ඇඟිලි තුඩ තබා එහා මෙහා ගෙනයාමෙන් අදාල ස්ථානය පෙන්වන දත්තය / වැඩසටහන ක්‍රියාත්මක වේ.
Digitizer (Graphic Tablet): යම් රූපයක් හෝ යමක් මෙම පැතලි තිරය මත විශේෂිත වූ පෑනෙන් ඇඳීමෙන් එය පරිගණකය තුළට ආදානය කල හැකිවේ. විවිධ නිර්මාණ කාර්යයන්හි දී නිර්මාණ ශිල්පීන් භාවිතා කරයි.

44. ප්‍රකාශ අක්ෂර හඳුනා ගැනීමේ (OCR – Optical Character Recognition) තාක්ෂණය යනු කුමක්ද? මෙම තාක්ෂණය භාවිතා කරනු ලබන සුපරීක්ෂක යන්ත්‍ර වල ඇති විශේෂත්වය කුමක්ද?

රූපක (Images) ලෙස ඇති මෘදු පිටපත් වල Times New Roman, Arial වැනි ඉංග්‍රීසි අක්ෂර රූපමය ආකාරයෙන් නොව වෙන් වෙන් ලෙස හඳුනා ගැනීමයි. මෙසේ හඳුනා ගැනීමෙන් ලැබෙන වාසිය වන්නේ වදන් සැකසුම් මෘදුකාංගයක් මගින් එම ලේඛන සංස්කරණය කිරීමේ පහසුකමයි.

ප්‍රකාශ අනුලක්ෂණ හඳුනා ගැනීමේ තාක්ෂණය සහිත සුපරීක්ෂක යන්ත්‍ර මගින් ස්කෑන් කරන්නවූ රූපකයක ඇති අකුරු වෙන වෙනම හඳුනා ගැනීමේ හැකියාව පවතී. වදන් සැකසුම් මෘදුකාංගයක් මගින් ඉතාමත්ම පහසුවෙන් සංස්කරණය කල හැකිවේ.

තවත් කොටසක් බලාපොරොත්තු වන්න.