1 පාඩම - කෙටි සටහන් - 1 කොටස ( පැරණි නිර්දේශය ) - සාමාන්‍යපෙළ තොරතුරු හා සන්නිවේදන තාක්ෂණය

1 පාඩම - කෙටි සටහන් - 1 කොටස ( පැරණි නිර්දේශය )

01. දත්ත: කිසිදු ආකාරයකට සකස් කිරීමකට ලක් නොකල කරුණු වේ.

 

02. දත්ත පැවතිය හැකි ආකාර:

  • ලිඛිත සටහන් (Text)
  • දෘශ්‍ය (Video)
  • ශ්‍රව්‍ය (Audio)
  • රූප (Images)

 

02. තොරතුරු : ලබන්නාට කිසියම් අර්ථයක් දෙන ආකාරයට ක්‍රමානුකූලව සකස් කරන ලද දත්තයි.

 

03. තොරතුරු වල විශේෂතා:

  • අදාල කාර්යයට උචිත වීම
  • ප්‍රමාණවත් වීම
  • නිවැරදි වීම
  • පැහැදිලිව තේරුම් ගැනීමට හැකි වීම
  • විශ්වාස වීම
  • කාලීන වීම
  • වටිනාකමකින් යුතු වීම

 

04.  පරිගණකයේ ඉතිහාසය (The History of the Computer)

ඇබකසය (Abacus) : මිනිසා තම ගණිත කටයුතු පහසු කර ගැනීම පිණිස ක්‍රි.පූ. 3000 දී පමණ චීන ජාතිකයින් භාවිතා කළ උපකරණයකි. පරිගණකයට මුල්ම අඩිතාලම තබන ලද්දේ ඇබකසය මගිනි.

ආකලන යන්ත්‍රය (Adding Machine / Pascaline) : 1642 දී බ්ලේස් පැස්කල් විසින් නිපද වූ ගණිත කර්ම පහසුවෙන් සිදු කළ හැකි යන්ත්‍රයකි. එකතු කිරීම සහ අඩු කිරීම පමණක් සිදුකළ හැකි විය.

Step Reckoner යන්ත්‍රය: 1674 දී ජර්මන් ජාතික ගණිතඥයෙකු වූ ගොඩ්ෆ්‍රිඩ් විල්හෙල්ම් විසින් Pascaline යන්ත්‍රය වැඩි දියුණු කර එකතු කිරීම, අඩුකිරීම පමණක් නොව ගුණ කිරීම සහ බෙදීම වැනි ගණිත කර්ම සිදු කළ හැකි මෙම යන්ත්‍රය නිපදවීය.

සිදුරු කාඩ්පත් සංකල්පය (Punch Cards Concept) : ප්‍රංශ ජාතික ජෝෂප් ජැකුවාඩ් විසින් සිදුරුපත් සංකල්පය ඉදිරිපත් කළහ.

Difference Engine: 1822 දී චාල්ස් බැබේජ් විසින් "ලොව ප්‍රථම යාන්ත්‍රික පරිගණකය" සඳහා අවශ්‍ය කරන ආකෘතියක් ඉදිරිපත් කළහ.

ඇනලිටිකල් යන්ත්‍රය (Analytical Engine) : චාල්ස් බැබේජ් විසින් 1833 දී නිර්මාණය කළ ඇනලිටිකල් යන්ත්‍රය සඳහා මූලික අඩිතාලම වැටුනේ සිදුරුපත් සංකල්පයයි. මෙහි විශේෂත්වය වනුයේ එහි දත්ත ආදානය (Input), සකස් කිරීම (Process), තැන්පත් කිරීම (Storage) සහ ප්‍රතිදානය (Output) යන කාර්යයන් සිදු කිරීම සඳහා අවශ්‍ය උපාංග එහි තිබීමයි. පරිගණකයේ පියා.

ලොව ප්‍රථම පරිගණක වැඩසටහන් ශිල්පිණිය (1st Computer Programmer) : චාල්ස් බැබේජ්ගේ මෙම ඇනලිටිකල් යන්ත්‍රය (Analytical machine) සඳහා ඇඩා ඔගස්ටා (Ada Augusta) මැතිණිය විසින් වැඩසටහන් (Programs) සකස් කරන ලදී

ඉලෙක්ට්‍රොනික වෑල්වය / රික්තක නලය (Vacuum Tube) : 1906 දී ෆොරස්ට් විසින් ඉලෙක්ට්‍රොනික වෑල්වය (රික්තක නලය ) සොයාගැනීම නූතන පරිගණක තාක්ෂණය සඳහා මුල්ගල තැබීමක් විය.

Mark 1 යන්ත්‍රය: 1937 දී හාර්වර්ඩ් විශ්ව විද්‍යාලයේ හෝවර්ඩ් එයිකන් චාල්ස් බැබේජ්ගේ සංකල්පය වැඩි දියුණු කිරීමට දැඩි ලෙස උත්සහා ගන්නා ලදී. 1939 දී "ස්වයංක්‍රීය අනුක්‍රම පාලක ගණක යන්ත්‍රය" (Automatic Sequence Controlled Calculator) යන්ත්‍රය නිපදවීමට හැකි විය. මෙය පසුකාලීනව Mark 1 යන්ත්‍රය ලෙස නම් කරන ලදී.

පළමු පොදු කාර්යය ඉලෙක්ට්‍රොනික අංකිත පරිගණකය (The 1st General purpose digital computer) – ENIAC : 1946 දී නිපදවූ එනියැක් (ENIAC – Electronic Numerical Integrator and Calculator) යන්ත්‍රය පළමු පොදු කාර්යය ඉලෙක්ට්‍රොනික අංකිත පරිගණකය නම් වේ.

ගබඩා කළ ක්‍රමලේඛන යොදාගත් මුල්ම අංකිත පරිගණකය (The 1st digital computer which used stored programs) – EDVAC : 1949 දී නිපදවන ලද එඩ්වැක් (EDVAC – Electronic Discrete Variable Automatic Computer) යන්ත්‍රය, ගබඩා කළ  ක්‍රමලේඛන යොදාගත් මුල්ම අංකිත පරිගණකයයි.

ට්‍රාන්සිස්ටරය (Transistor) : අර්ධ සන්නායක උපාංගයක් වන අතර එය වර්ධකයක් ලෙස සහ ස්විචයක් ‍ලෙස භාවිතා කරනු ලැබේ. තවද පරිගණකවල, ජංගම දුරකථන වල සහ අනෙකුත් සියලුම විද්‍යුත් උපකරණ වල භාවිතා වන මූලික විද්‍යුත් පරිපථ උපාංගයක් ලෙසද මෙය සැලකිය හැකිය. ට්‍රාන්සිස්ටරයේ ඇති ඉක්මන් ක්‍රියාකාරිත්වයත්, නිරචද්‍යතාවයත් නිසා විවිධවූ කාර්යයන් සදභා මෙය යොදා ගනු ලබන අතර උදාහරණ ලෙස ධාරා වර්ධනය,වෝල්ටීයතා වෙනස්කිරීම්, සංඥා සැකසීම සහ දෝළක සැලකිය හැකිය.

අනුකලිත පරිපථ (IC – Integrated Circuits) : 1964 දී ට්‍රාන්සිස්ටර (Transistor) වල එකතුවෙන් සැදුම්ලත් අනුකලිත පරිපථ (IC – Integrated Circuits) වල පැමිණීමත් සමගම පරිගණක ප්‍රමාණයෙන් සහ මිලෙන් අඩුවූ අතර ඒවායේ වේගය වැඩිවිය. . කල්යත්ම අනුකලිත පරිපථ දහස් ගණනකින් කෙරෙන කාර්යය ඉටු කිරීමට සමත් සිලිකන් චිප (Silicon Chips) නිපදවීමට ඉලෙක්ට්‍රොනික තාක්ෂණය දියුණු විය.

LSI – Large Scale Integration
VLSI – Very Large Scale Integration

ක්ෂුද්‍ර සකසනය (Microprocessor) : දහස් ගණන් අනුකලිත පරිපථ (IC), සිලිකන් චිපයක් (Silicon Chip) තුළ තැන්පත් කිරීමට තරම් තාක්ෂණය දියුණු වීමත් සමගම ක්ෂුද්‍ර සකසනය (Micro Processor) බිහිවිය. මේවා යොදාගෙන නිර්මාණය කළ පරිගණක වල වේගය හා කාර්‍යක්ෂමතාවය ඉතාම ඉහළ වූ අතර මිල හා ප්‍රමාණය ක්‍රමයෙන් අඩුවිය.

05.  සකසන (Processors) නිෂ්පාදනය කරන ආයතන :

  • Intel
  • AMD
  • Cyrix
  • Motorola
  • NEC



තවත් කොටසක් බලාපොරොත්තු වන්න.