MS PowerPoint lesson 1

Microsoft PowerPoint (විද්යුත් සමර්පන මෘදුකාංග)

 

Microsoft PowerPoint කියලා කියන්නේ  අපට ගොඩක් ප්‍රයෝජනවත් ඇප්ලිකේෂන් එකක් මෙය ඔබට ලැබෙන්නේ microsoft office package එක යටතේයි.

 

 අ. පො. ස. සාමාන්‍ය පෙළ විභාගය සඳහා තොරතුරු හා සන්නිවේදන තාක්ෂණය ඉගෙන ගන්නා දරුවන්ට දහවන ශ්‍රේණිය විෂය නිර්දේශය යටතේ වගේම උසස් පෙළ සාමාන්‍ය තොරතුරු හා සන්නිවේදන තාක්ෂණ විෂය නිර්දේශය  සඳහාත් ඒ වගේම එදිනෙදා වැඩ කටයුතු කර ගැනීමේ දී සහ කාර්යාලීය කටයුතු වල දී අපිට මෙය ඉතාම ප්‍රයෝජනවත් වෙනවා.

 

 අපිට Microsoft PowerPoint භාවිතා කරලා (presentation) ප්‍රසන්ටේෂන් එකක් ඒ කියන්නේ සිංහලෙන් නම් විද්‍යුත් සමර්පණයක් නිර්මාණය කරගන්න පුළුවන්.

විද්‍යුත් සමර්පණයක් යනු කුමක්ද?

විද්‍යුත් සමර්පණයක් මගින් අපිට කරගන්න පුළුවන් කාර්යයන් කිහිපයක් තිබෙනවා.

ප්‍රධාන වශයෙන් මෙය භාවිතා කරන්නේ සම්මන්ත්‍රණයක්  පවත්වන  අවස්ථාවක අවශ්‍ය කරුණු ප්‍රේක්ෂකයන්ට ප්‍රදර්ශනය කිරීම සඳහායි. ඒ වගේම  ඉගෙනුම් ඉගැන්වීම් කාර්යය සඳහා විද්‍යුත් සමර්පණ බොහෝදුරට යොදාගන්න පුළුවන්. දුරස්ථ අධ්‍යාපනයේ දී ගුරුවරයාට අවශ්‍ය කරුණු ලියා දැක්වීම සඳහා blackboard වෙනුවට විද්‍යුත් සමර්පණයක් භාවිතය ඉතාම පහසුයි

 

 විද්‍යුත් මාධ්‍යයෙන් නිර්මාණය කරගන්නා සමර්පනයක් පරිගණකයක් ඔස්සේ වගේම විශාල පිරිසක් සඳහා ඉදිරිපත් කරන අවස්ථාවක (multimedia projector)  බහුරූපන ප්‍රක්ෂේපණ යන්ත්‍රය භාවිතා කර විශාල පිරිසකට නැරඹීමට සැලසිය හැකියි.

 

විද්‍යුත් සමර්පණ නිර්මාණය කිරීමේ දී සැලකිය යුතු කරුණු

 

විද්‍යුත් සමර්පණයක් නිර්මාණය කිරීමේදී එය වඩාත් ආකර්ෂණීය ලෙස නිර්මාණය කර ගැනීමේ උපක්‍රම යොදා ගැනීම ඉතාම වැදගත් නැතහොත් එය කියවන්නන්ට ඒකාකාරී වීම හෝ අපහසුතාවයට පත් වීම නිසා අසාර්ථක වන්න පුළුවන් 

 

 සමර්පණයක් නිර්මාණය කිරීමේදී සැලකිය යුතු වැදගත්ම කාරණය තමයි එය නරඹන පිරිස කවුද කියන එක. එම පිරිසට ගැළපෙන අයුරින් සමර්පණයක් නිර්මාණය කිරීමෙන් වඩාත් සාර්ථකව ඉදිරිපත් කිරීමේ හැකියාවක් ලැබෙනවා

 මෙම පිරිස  වයස අනුව, ස්ත්‍රී පුරුෂ භාවය අනුව, වෘත්තික භාවය සහ අධ්‍යාපන මට්ටම වැනි කරුණු අනුව වර්ග කර ඒ අයට ගැළපෙන පරිදි සමර්පණය නිර්මාණය කළ හැකියි.

 

මෙහිදී සමර්පණයට යොදාගන්න භාෂාව පිළිබඳව ද සැලකිලිමත් විය යුතුයි.

එමෙන්ම යොදා ගන්නා පාඨ සඳහා භාවිතා කරන අකුරු වර්ගය (font) පිළිබඳව ද සැලකිලිමත් විය යුතුය කුඩා ළමුන් සඳහා ගැලපෙන සමහර අකුරු වර්ග වෘත්තීය මට්ටමේ සමර්පණ සඳහා නොගැලපිය හැකියි.

එමෙන්ම අකුරුවල ප්‍රමාණය විශේෂයෙන් සැලකිලිමත් විය යුතු කාරණයකි.

ඒවා පැහැදිලිව කියවා ගත හැකි අකුරු වර්ගයක් විය යුතුයි.

අකුරුවල ප්‍රමාණය 32 හෝ ඊට වඩා විශාල අකුරු යොදා ගැනීම වඩාත් උචිතයි

 එමෙන්ම සමර්පණය සඳහා යොදා  ගන්නා පාඨ ඉතාම කෙටි සහ පැහැදිලිවිය යුතුයි.

මේ සඳහා විශාල පේලි ගනණක් යොදාගැනීමෙන් කියවන්නන් අපහසුතාවයට  පත්වනු  මෙන්ම එය කියවීමට අකමැති විය හැකියි.

මේ නිසා  අවශ්‍ය කාරණය උපරිම වශයෙන් පේලි දහයකට පමණ සීමා කළ හැකියි.

එමෙන්ම ඡේදයක් ලෙස ලිවීම වෙනුවට කරුණු වශයෙන් ඉදිරිපත් කිරීම වඩාත් උචිතයි.

තවත් වැදගත් කාරණයක් වන්නේ භාෂාව හැසිරවීමේ දී ව්‍යාකරණ මෙන්ම අක්ෂර වින්‍යාසය හැකිතාක් නිවැරදි වීමයි.

සමර්පනයක් සඳහා යොදා ගන්නා වර්ණ ගැලපීම ද ඉතාම වැදගත්. මන්ද මෙය විශාල පිරිසකට ඉදිරිපත් කරන විට පහසුවෙන් කියවිය හැකි වර්ණ යොදා ගත යුතුය. කළු පසුබිමෙහි වර්ණ යොදා ගැනීමෙන් ද වඩාත් ආකර්ෂණීය පෙනුමක් ලබාගත හැකියි. නමුත් තද රතු වැනි වර්ණ කියවන්නා අපහසුතාවයට පත් කරන බැවින් එවැනි වර්ණ වැඩිපුර භාවිතය සුදුසු වන්නේ නැහැ

සමර්පනයක ආකර්ෂණය වැඩි කරගැනීම සඳහාත් කරුණු වඩාත් පහසුවෙන් සහ ඉක්මනින්  තේරුම් ගැනීම සහ පැහැදිලි කිරීම සඳහාත් එයට පින්තූර, වගු,  ප්‍රස්තාර ආදිය යොදා ගත හැකිය.

එමෙන්ම  සමර්පණයක ආකර්ෂණය වැඩි කරගැනීම සඳහා එයට හඬ සහ චලන රූප යොදා ගැනීමද සිදුකළ හැකිිය.

 

ඊළඟ පාඩමෙන් විද්යුත් සමර්පනයක් නිර්මාණය කරන අයුරු සලකා බලමු.