දහඅට සන්නිය ශාන්තිකර්ම
සෙතක් ශාන්තියක් ලබා ගැනීමේ මූලික පරමාර්ථය පෙරදැරි කොට ගෙන ජන සමාජය තුළ ශාන්තිකර්ම පවත්වනු ලබන අතර සන්නියකුම ශාන්තිකර්මය ද එකී පරමාර්ථයන් මුදුන් පමුණුවා ගැනීමේ අපේක්ෂාව පෙර දැරි කොට ගෙන පවත්වන්නා වූ ශාන්තිකර්මයක් ලෙස ලොවට හදුන්වා දිය හැකි ය . එසේ ම සන්නියකුම හෙවත් දහඅට සන්නිය පහතරට නර්තන සම්ප්‍රදායේ යකුන් වෙනුවෙන් පවත්වනු ලබන ශාන්තිකර්ම අතර ප්‍රධාන ශාන්තිකර්මයක් ලෙස ද හැදින්විය හැකි ය . සමාජයේ පුද්ගලයන්ට සිදුවන දෝෂාන්ධකාරයන් දුරුකොට සෙතක් ලබා ගැනීමේ පරමාර්ථයෙන් පවත්වන මෙම ශාන්තිකර්මය තුළ ජනයාට නොයෙකුත් ලෙඩ රෝග ඇති කරන්නා වූ යක්ෂ කොට්ඨාසයක් පිළිබද කරුණු කියාපායි . එම යක්ෂ කොට්ඨාසය සන්නියකුන් ලෙස හදුන්වන අතර එකී සන්නි යකුන් විසින් පුද්ගලයන්ට ඇති කරන විවිඩ ලෙඩ රෝග රැසකි . ඒවා සන්නි රෝග ලෙස නම් කෙරෙන අතර එම රෝග දහඅට මෙසේ ය .
- බීත සන්නිය
- අමුක්කු සන්නිය
- ගුල්ම සන්නිය
- වෙඩි සන්නිය
- කොර සන්නිය
- කණ සන්නිය
- බිහිරි සන්නිය
- වාත සන්නිය
- ගොළු සන්නිය
- පිස්සු සන්නිය
- මුර්තු සන්නිය
- නාග සන්නිය
- දෙමළ සන්නිය
- භූත සන්නිය
- අභූත සන්නිය
- ගිනිජල් සන්නිය
- දේව සන්නිය
- කෝල සන්නිය
මෙකී සාන්නි යකුන් විසින් පුද්ගලයන්ට ඇති කරන්නා වූ විවිඩ ලෙඩ රෝග රැසක් ඇති අතර ඒවා සන්නි රෝග නම් වේ. ඒ එක් එක් සන්නි රෝග තුලින් ශරීරයේ විවිඩ ශාරීරික දුබලතා මෙන් ම විවිඩ රෝග ලක්ෂණ ද ප්‍රදර්ශනය කරන බවත් ඉතිහාසයේ දක්වා ඇත. ස්න්නියකුමේ එන ජල සන්නිය , වාත සන්නිය , බිහිරි සන්නිය , ගොළු සන්නිය, පිත් සන්නිය , කණ සන්නිය , කොර සන්නිය ආදී සන්නි නාමයන් වාත සන්නිය ඇති කිරීමට කළු යකා හේතු වන අතර වා , පිත් , සෙම් තුලින් මෙම රෝග ඇතිවන බව දේශීය වෛද්‍ය ක්‍රමයේ ද මතයයි. සන්නි සබයට පැමිණීමේ දී තමන් විසින් මිනිසුන්ට ලෙඩ රෝග පමුණුවන බව ප්‍රදර්ශනය කරන්නේ එකී ලෙඩ රෝග ලක්ෂණ මවාපාමිනි. ඒ අනුව ගොළු සන්නිය සබයට පැමිණීමේ දී ගොළුවෙකු ලෙස එහි අංග ලක්ෂණ විදහාපාන අතර, බිහිරි සන්නියේ දී බිහිරෙකුගේ ගති ලක්ෂණ නිරූපණය කරයි. කණ සන්නියේ දී අන්ධ පුද්ගලයකුගේ චරිත ස්වාභාවය නිරූපණය කරන්නේ ඉහත කී සන්නි යකුන් විසින් ඇති කරවන විවිඩ ලෙඩ රෝගවලට උදාහරණ දක්වමිනි. එපමණක් ද නොව මෙම සන්නි තුළ එකෙකුට හිස රුදාව ය, තවකෙකුට වමනය යෑම ය, මේ ආදී ලෙස සන්නි රෝග ලක්ෂණ විදහාපායි. මෙසේ විවිඩ වූ ලෙඩ රෝග සන්නි යකුන් විසින් පුද්ගලයන්ට ඇති කරවන බව සන්නියකුම ශාන්තිකර්මයෙන් ගැමි කලාකරුවා ලොවට ප්‍රත්‍යක්ෂ කරන්නේ අපුර්ව සහගත ය. මෙසේ ඇතිවන්නා වූ ලෙඩ රෝගකාරකාදිය ශාන්තිකර්මයක් පවත්වා ගනිමින් නිවාරණය කරගත හැකි බව ද ඔහු ලොවට පෙන්වා දී ඇත්තේ ජනී ජනයා පුදුම කරවමිනි. එහි දී ඔහු ඒ සදහා පිදේනි කැප කිරීම, ත්‍රිවිධ රත්නයේ හා දෙවි දෙවතාවුන්ගේ පිහිටාරක්ෂාව පැතීමේ ක්‍රමවේදය බාවිතා කර ඇති බව මෙම ශාන්තිකර්මයෙන් පෙනේ. ඒ ඒ යක්ෂයින් සදහා පිළියෙළ කරන ලද පිදේනි තටු ගෙන අතුරයා වෙතට ගොස් “ සියලු රෝග අද සිට නිවාරණයි, තීන්දුයි” ආදී වශයෙන් පවසමින් අතුරයාගේ අතින් පිදේනි තටු යක්ෂයාට පුදා යකුන් විදිය තුලට පලවා හැරීමේ ක්‍රමය තුලින් ආතුර මනසට රෝග නිවාරණය පිළිබද මනෝ චිකිත්සාවක් ද ලබා දෙයි. එපමණක් නොව මෙම ශාන්තිකර්මය කිරීමෙන් බුද්ධ, ධම්ම, සංඝයන ත්‍රිවිධ රත්නයේ සහ දෙවි දේවතාවුන්ගේ ආනුබාවයෙන් සියලු යකුන් දමනය වන බව ද ජනයාට පසක් කර නිමා කරනු ලබයි.
