සබරගමු වන්නම් වල ඉතිහාසය
සබරගමු වන්නම් වල ඉතිහාසය
පහතරට සිංදු වන්නම් සේම සබරගමු වන්නම් පිළිබඳව ද තොරතුරු අනාවරණය කරගත හැකි ඓතිහාසික මූලාශ්‍ර විරලය. සබරගමු නර්තනයට අයත් වන්නම් සංඛ්‍යාව පිළිබඳව විවිධ මතිමතාන්තර ඉදිරිපත් වී ඇත. සබරගමු වන්නම් ඉතිහාසය සබරගමු නර්තනයේ නිජබිම වූ සබරගමු මහ සමන් දේවාලය ඉදිකළ වකවානුව තරම් පැරණි යැයි ඇතමුන් දරණ මතයයි. සබරගමු නර්තන කළාව සමන් දේවාලය ඇසුරු කරගෙන ව්‍යාප්ත වූ බව ප්‍රකාශ වේ. එවකට සමන් දේවාලයේ පෙරහැර සඳහා සබරගමු නර්තනය පමණක් යොදාගෙන තිබූ බව මුඛ පරම්පරා කථා අනුව හෙළිදරව් වේ. දේවාලයේ දැනට සේවය කරන කපු මහත්වරුන් හා තේවා භාරව කටයුතු කරන පුද්ගලයන් ද මේ පිළිබඳ තොරතුරු දක්වයි.
දඹදෙණි යුගයෙන් පසු කාලයේ දී මෙම සබරගමු වන්නම් රචනා වන්නට ඇතැයි අනුමාන කළ හැකිය. මහනුවර යුගයේ දී රචානා කරන්නට ඇතැයි අනුමාන කරන ‘වාදාන්කුස රත්නමාලය’ නම් වූ කාව්‍ය ග්‍රන්ථයේ අද්‍යතන ව්‍යවහරයේ පවතින සමහර සබරගමු වන්නම් ඇතුළත් වී ඇත. කිරිඇල්ලේ ඥානවිමල හිමියන්ගේ ග්‍රන්ථයෙහි එච්.පී. මහවලතැන්න රටේ මහතාගේ සබරගමු වන්නම් 32 දක්වා ඇත. එමෙන්ම ඉපැරෙණි සබරගමු වන්නම් පෙලක් අපට මුල්වරට හමුවන්නේ කලවානේ කර්මාලංකාර අතපත්තු මුදලි විසින් 1864 දී සංස්කරණය කරන ලද පුස්කොල පොතක් ඇසුරෙනි. එහි අන්තර්ගත කරුණු අතරින් සබරගමු වන්නම් පහක් ගැන සඳහන් වේ. තවද ඒවා ප්‍රථමයෙන් සමන් දේවාලයේ පෙරහැරේ ගායනා කල බවද සඳහන් වේ. එය පසුකාලීනව වන්නම් 36ක් දක්වා සංස්කරණය කොට ඇත. පැරණි වන්නම් 18ක් සහිතව වන්නම් 36ක් සංස්කරණය කරන ලද පුස්කොළ පොතේ සඳහන් වේ.
ජාතික අධ්‍යාපන ආයතනය විසින් නිකුත් කර ඇති ප්‍රකාශන මගින් මෙතෙක් කර ඇති යම් යම් අධ්‍යනයන් සැළකිල්ලට ගෙන සබරගමු වන්නම් සංඛ්‍යාව 24ක් ලෙස පිළිගෙන ඇත. සබරගමු වන්නම් ප්‍රභවය වී ඇත්තේ සබරගමු මහ සමන් දේවාලය ආශ්‍රිතවය. සබරගමු දේවාලය කලිකාල සාහිත්‍ය සර්වඥ පණ්ඩිත මහා පරාක්‍රමබාහු රජුගේ අමාත්‍යවරයෙකු වන ආර්‍යකාට දේවයන්ගේ අනුග්‍රහයෙන් කරන ලද්දක් බව ඓතිහාසික සාධක අනුව කියැවේ. ඒ අනුව කාල තීරණය කරන්නේ නම් සබරගමු වන්නම් ඉතිහාසය දඹදෙණි යුගය දක්වා ඈතට දිව යයි.
සබරගමු වන්නම් විමර්ශනයේ දී එහ නිශ්චිත සංඛ්‍යාව ගැන ප්‍රශ්නයක් පැන නඟී. ඇතැම් පාරම්පරික ඇදුරන් සබරගමු වන්නම් සංඛ්‍යාව 18ක්, 31ක්, 36ක්, ලෙස හැඳින්වුව ද ඇතැම් විද්වතුන් මෙම වන්නම් ගණන 24 ක් බව සඳහන් කරති.
උක්ත සඳහන් වන්නම් පිළිබඳව ඇති ඓතිහාසික තොරතුරු පාරම්පරික ඇදුරන් සතු පුස්කොළ පොත්, අත් පිටපත්, හා ඔවුන් අතර භාවිතා වන වන්නම්ය. මේ ගැන නිරික්ෂණය කොට සබරගමුවට ආවේණික වන්නම් සංඛ්‍යාව නිශ්චිතව සඳහන් කිරීම කාලීන වශයෙන් අත්‍යවශ්‍ය කාරණයකි. ඒ මක් නිසා ද යත් වත්මනයෙහි ඒ පිළීබඳව පවත්නා අවුල් සහගත තත්වය විෂය සංරක්ෂණය සම්භන්ධයෙන් එතරම් හිතකර නොවන බැවිණි. එහෙත් වූ කලී අතිශය ප්‍රවේසමෙන් කළ යුතු පර්‍යෂණාත්මක අධ්‍යනයක් බව නම් නොඅනුමානය.
සබරගමු වන්නම් සඳහා නාමයන් යොදා ගැනීමේ දී බහුල වශයෙන් සත්ව නාම තෝරාගෙන ඇත. නමුත් මෙම වන්නම් සඳහා සත්ව නාම භාවිතා කරතත් වන්නමේ තේමාවෙන් බොහෝ විට කියැවෙන්නේ වෙනත් විස්තර කථනයකි. වන්නම් වැඩි සංඛ්‍යාවක වන්නමේ අඟට පමණක් සත්ව නාම යොදාගෙන ඇති බව පෙනේ.
සබරගමු වන්නම් නර්තනයේ දී ප්‍රථමයෙන් ම දවුල් පද වැයෙන අතර ඉන් අනතුරුව තානමට අනුව මුල් පදය නටනු ලැබේ. නැවතත් තානමට අනුව අලංකාර පද නටනු ලැබේ. තෙවනුව නැවත පෙර මෙන් කවියට මුල් පදය නටනු ලැබේ. නැවත තානමට අලංකාර පද නටා කළාසම් අඩව්ව නැටීම සාම්ප්‍රදායික සිරිතයි.
