භාෂාව හැඳින ගැනීම
භාෂාව හැඳින ගැනීම
“ සිංහල භාෂාව “ පිළිබඳව උගැන්මට පෙර, “ භාෂාව” යනු කුමක්ද යන වග සැක හැර නිර්වචනයානුකූලව, නිවැරදි ලෙස ඉගෙන ගැන්මට සිදු වේ. කුමක් නිසාද යත්, සිංහල භාෂාව ද, “ භාෂාවේම තවත් එක් කොටසක්, අංශුවක් පමණක් වන බැවිනි.
භාෂාව- යනුවෙන් අප හඳුන්වනු ලබන්නේ, “ මිනිසා විසින් තවත් පුද්ගලයෙක් හෝ පුද්ගලයින් කිහිපදෙනෙක් සමඟ තමන්ගේ සිතෙහි ඇති වන්නාවූ අදහස්, සිතුවිලි ආදිය හුවමාරු කර ගැනීම සඳහා භාවිත කරනු ලබන මාධ්‍යය” යනුවෙනි.
“ භාෂාව වනාහී, අදහස්, සිතිවිලි උසුලන්නා හෙවත් ප්‍රවාහනය කරන්නා “ “ ඉන්ද්‍රියන් සමූහයක් ක්‍රමානුකූලව චලනය කිරීම මඟින් නිපදවනු ලබන ශබ්දයන් සමූහය “ යනාදී වශයෙන් සමාජ විද්‍යාඥයන් විසින් භාෂාව යනු කුමක්ද යන්න පිළිබඳව අර්ථ විග්‍රහ කර ඇත.
සැබැවින්ම භාෂාව යන වචනයෙන් අදහස් කරනු ලබන්නේ කුමක් ද? භාෂාව තුළින් තෘප්ත වන්නා වූ මිනිස් සමාජමය අවශ්‍යතාවය කුමක්ද ? යනාදී කරුණු පිළිබඳව අදහස් දැක්වීම සහ අදහස් විග්‍රහ කිරීම වැදගත් වේ .
භාෂාව යන්නෙන් අප අදහස් කරනු ලබන්නේ, පුද්ගලයාගේ සිතෙහි හටගන්නා හැඟීම්, අනෙකාට ප්‍රකාශ කිරීමේදී භාවිත කරනු ලබන මාධ්‍ය වේ. සිතන්න ඔබ සිතනා යමක්, සටහන් කරනවා යැයි; එවිට ඔබට එය රචනා කිරීමට පොත් පෑන් පැන්සල් වැනි මාධ්‍ය අවශ්‍ය වේ. එමෙන් ම ඔබගේ සිතිවිල්ල රචනා කිරීමට වචනද අවශ්‍ය වේ. සිතන්න වචන යනුවෙන් යමක් මෙලොව සොයාගෙන නොමැති යැයි; එවිට ඔබට ඔබේ සිතිවිල්ල රචනා කිරීමට හැකියාවක් නොලැබෙනු ඇත. සිතිවිල්ල රචනා කිරීම සඳහා අවශ්‍ය සංකේත එනම් අකුරු සමූහයක් එක් වී හැදෙන වචනයන් රාශියකට අපි භාෂාවක් යයි කියමු.
මේ වන විට අපි ගොඩනගාගත් පැනයන්ගෙන් පළමුවැන්න සඳහා පිළිතුරු සොයාගත්තෙමු. එනම් භාෂාවක් යනු, තමන්ගේ සිතෙහි ඇතිවන අදහසක් තවත් පුද්ගලයෙක් හට ප්‍රකාශ කිරීම සඳහා භාවිත කරන මාධ්‍යයි.
සැබැවින්ම භාෂාවක් අවශ්‍ය වන්නේ කුමක් නිසාවෙන්ද? මිනිස් ශිෂ්ටාචාරයේ ඈත අතීතය පිළිබඳව සොයා බලන විට අපට හමු වන්නේ ප්‍රථමයෙන්ම ගල් යුගයේ ජීවත් වූ මිනිසුන් පිළිබඳව සටහන්ව ඇති තොරතුරු වේ. එනම් සතුන් දඩයම් කිරීම සදහා ආදි මානවයා කණ්ඩායම් වශයෙන් ජීවත් වූ යුගයයි.
මෙම යුගයේ දී උදෑසනින්ම තම ගල් ගුහාවෙන් පිටවීමට පෙර ගුහා බිත්තියේ ඉරක් හෝ රවුමක් හෝ වෙනයම් හැඩයක සලකුණක් ලකුණු කිරීමට ඔවුහු පුරුදු වී සිටියහ. එයට හේතුව වූයේ, උදෑසන දඩයම සමඟ පිටව ගිය සියලු දෙනාම නැවත පැමිණියේදැයි සොයා බැලීමට තිබූ අවශ්‍යතාවයයි. ඔවුන් නැවත පැමිණෙන විට තම ඇඳි සලකුණ මත ඉරක් ඇඳීමක් දක්නට ලැබේ. ඉන් පැහැදිලි වන්නේ ඔවුන් සන්නිවේදන කටයුතු සඳහා යම් ආකාරයේ වූ සංකේත ආදිය භාවිත කිරීමට උත්සාහ ගත් බව ය.
එවැනි අවස්ථාවකදී භාෂාව තුළ ඇති අවශ්‍යතාවය පිළිබඳවත් එම අවශ්‍යතාවයට සරිලන ලෙස ඔවුනට පොදු වූ භාෂාවක් භාවිතයට ගත් බවත් එතැන්. පටන් ශීඝ්‍ර තාක්ෂණික දියුණුව අභියස භාෂාවන්ගේද පැහැදිලි වර්ධනයක් සහ විකාශනයක් පෙන්නුම් කරයි. එවිට සමස්ත මානවයා හටම මෙම භාෂාව කෙතරම් වැදගත් වන්නේදැයි පැහැදිලි වේ. භාෂාව මෙලොව නොමැති නම්, තමන්ගේ අවශ්‍යතාවයන් සහ හැගීම් අනෙකා සමග ප්‍රකාශ කිරීම සදහා වූ හැකියාව අහිමිව යන්නේය.
මිනිසාට පමණක් නොව, මෙලොව ජීවත් වන්නාවූ සෑම ප්‍රාණියෙක් හටම ඔවුනොවුන්ට සුවිශේෂී වූ භාෂාමය ශශක්‍යතාවයන් ඇත. උදාහරණ ලෙස පක්ෂී සමූහයකගේ හෝ වඳුරු රංචුවක හෝ කුහුඹු රංචුවක හැසිරීම නිරීක්ෂණය මඟින් ඔවුනොවුන් එකිනෙකා ආමන්ත්‍රණය කරන්නාවූ අයුරු සේම එකිනෙකා හැඳින ගන්නා අයුරු දැකගත හැක.
තමා ජීවත්වන වටාපිටාවට අනුගතව තම භාෂාව හැසිරවීමට මිනිසාට සිදු වේ. මිනිස් ප්‍රජාවගේ දියුණුවට පවා ඉවහල් වූ මෙම අනන්‍යතා ලක්ෂණය සිංහල, ඉංග්‍රීසි, ජපන් උර්දු, අරාබි, කොරියානු යනාදී වශයෙන් විවිධ ප්‍රභේදයන්ට අනුගතව නිරන්තරයෙන් භාවිත වේ.
එවිට පැහැදිලි වන්නේ, භාෂාව ලොකවාසී සියලුම ප්‍රාණීන්ට පප්‍රගුණ කළ යුතුව පවත්නා ශක්‍යතාමය අවශ්‍යතාවයක් වශයෙනි.
අභ්‍යාස >
- භාෂාව පිළිබඳව දක්වා ඇති නිර්වචන 3ක් උපුටා දක්වන්න.
- භාෂාව මිනිසාට අවශ්‍ය වන්නේ කුමන කරුණක් නිසාවෙන්ද?
- මිනිසා පමණක් නොව සතුන්ද සන්නිවේදන ක්‍රියාවලියේ යෙදෙන බවට ඔබේ අත්දැකීම් ඇසුරෙන් උදාහරණ 5ක් සපයන්න.
- භාෂාව තුළ පවත්නා විශේෂත්වය ඔබේ වචනයෙන් පැහැදිලි කරන්න.
- රකාරාංශය, යංශය, කොම්බුව සහිත ඇලපිල්ල සහ හල් කිරීම යන පිල්ලම් උදෙසා උදාහරණ වචන 4 බැඟින් ලියන්න.
- සමාන පද ලියන්න.
- සැබැවින්
- ශක්‍යතාව
- ශක්‍යතාවය
- ශීඝ්‍ර
- ප්‍රභේද
