නිෂ්පන්න, තත්සම හා තද්භව

 අනුරූප පද සංයෝගය

ලේඛන ව්‍යවහාරයේදී වචන දෙකක් හෝ කීපයක් එකට ගළපා ඒකාබද්ධ වූ අදහසක් හෝ අර්ථයක් ප්‍රකාශ කිරීමේදී, එම වචනවල කිසියම් අනුරූපතාවක් හෝ සමරූපතාවක් තිබිය යුතුය. එලෙස වචනවල පවත්නා සමරූපීබව රැක ගැනීම මගින් ලේඛනයට හා ප්‍රකාශනයට සුන්දරත්වයක් ලැබෙයි. මෙහිදී පාලි තත්සම පද සමග තද්භව පද සංයෝග නොකොට, විශේෂණ විශේෂ්‍ය පද යුගලය ම තත්සමයෙන් හෝ තද්භවයෙන් ම යොදාගැනීම ඉතා යෝග්‍ය වේ.

නිෂ්පන්න

නිෂ්පන්න යන්නෙන් නිපදුණු, ඉපදුණු, දේශයේ පහළ වුණ, නිපන් යන අරුත් ගෙන දෙයි. එනම් වෙනත් භාෂාවක බලපෑමකින් තොරව, සිංහල ව්‍යවහාරයෙන් ම බිහි වූ ශබ්ධ හෝ නාම නිෂ්පන්න නමින් හඳුන්වනු ලබයි.

තත්සම

සිදත් සඟරාවට අනුව තත්සම යන්න අර්ථ දක්වා ඇත්තේ මේ ආකාරයට ය.
"මගද සකු ඈ බණ සම වූ බස තසම නම්"

එනම්, සංස්කෘත / පාලි භාෂාවන්හි යෙදී ඇති නාම හෝ ශබ්ද, වෙනසකින් තොරව සිංහලයේ දී යොදාගත් විට ඒවා තත්සම නමින් හඳුන්වයි.

 තද්භව

තද්භව යනු මූල භාෂාවලින් (මාතෘ භාෂාවලින්) බිඳී ආ වචන යි. එනම් පාලි, සංස්කෘත භාෂාවලින් ගත් ශබ්ධ හෝ නාම සිංහල ක්‍රමයට සකසා ගැනීම හෙවත් බිඳ ගැනීම යි.