13-වසර නර්තනය (සිංහල)

චිත්‍ර කලාවේ සහ නර්තන කලාවේ සහසම්බන්ධතාව

චිත්‍ර කලාව නර්තනයත් සමග සමගාමීව පවත්නා වූ විෂයකි. සාම්ප්‍රදායික ශාන්තිකර්ම හා බැදි සැරසිලි කලාවට අදාළ සියලු ම අංගෝපාංග නියෝජනය කරයි. රංග භූමි අලංකරණය සදහා යොදා ගනු ලබන සියලුම සැරසිලි කලාත්මක නිර්මාණයෝ වෙති. කෙසෙල් පතුරු ලී මැස්ස මත බැදීමේ සිට විවිධ සැරසිලි ආකෘතීන් අනුව කෙසෙල් පතුරු කපා හැඩ කිරීමත්, ගොක් කොළ කැටයමින් හැඩ කිරීමත් චිත්‍රයෙහි අන්තර්ගත කැටයම් කලාවෙහි උපයෝගීතාවයකි. එසේ ම හබරල කොළයෙන් කපන කැටයම් එහි තවත් එක් පැතිකඩකි. එහි ප්‍රධාන ලක්ෂණය වන්නේ “අව සුදු” පැහැයත්, දීප්ත හෝ අදුරු කොළ පැහැයත් එකිනෙක ගළපමින් රටා ගොඩනැගීමයි.

හබරල කොළ කැටයම සුදු පැහැති කෙසෙල් පතුර මත පොල්තෙල් යොදා ඇලවීමෙන් පසුව අදුරු කොළ පැහැය තුලින් විනිවිද පෙනෙන අපූරු සුන්දරත්වයක් එයින් ස්මතු වී පෙනේ. තොරණ, වීදිය, මල් යහන, පත්තිනි මාලිගය, පිදවිලි තටු යනාදී සියලු ම සැරසිලි අංග ශාන්තිකර්ම භූමියෙහි දක්නට ලැබෙන චිත්‍රමය සැරසිලි ලෙස හැදින්විය හැකි ය. රංග භූමි අලංකරණය ද ඒ හා බැදෙන තවත් එක් අංගයකි. පොල්, තැඹිලි, ඉදි, නවසි, බෝදිලි ආදී ගෙඩි වලු ද, පොල්, පුවක් වැනි මල් විශේෂයන් ද, කෙසෙල්, අන්නාසි වැනි පලතුරු වර්ග ද, නා, බෝ, නුග, බුලත්, වැනි දළු වර්ග ද, යොදා ගනිමින් කරනු ලබන සැරසිල්ල චිත්‍රයෙහි හැඩතල එක් කොට නිර්මාණය කරන සැරසිලි මෝස්‌තරයකට නෑකම් කියයි. බලි ශාන්තිකර්මයෙහි එන ඇඹුම් බලිය ද, මහ සොහොන් සමයමෙහි හෝ අනෙකුත් එවැනි ශාන්තිකර්මවල යෙදෙන ඇඹුම් බලි හෝ රෙදි කඩක සිතුවම් කෙරෙන කඩ බලිය ද ගොඩ නැගීම සහ වර්ණ ගැන්වීම යන චිත්‍ර කලා අංග සමග සම්බන්ධ වෙයි. සාම්ප්‍රදායික බලි ඇදුරා අති දක්ෂ චිත්‍ර ශිල්පියෙකි.

                                                                                             

පන්සලෙන් විහාරගෙයි චිත්‍ර කර්මාන්තයෙහි නියුක්ත වූයේ ද පැරණි බලි ඇදුරන් බව නොකිවමනා ය. බලි ඇඹීම, බලි වර්ණ ගැන්වීම, නේත්‍ර ප්‍රතිෂ්ඨාපානය වැනි කටයුතු චිත්‍ර කර්මාන්තයන්ගේ සබදතාවය මනාවට පැහැදිළි කරයි. ශාන්තිකර්ම සැරසිලි වල යෙදෙන විවිධ වර්ණ ගැන්වීම් ද ඉර හඳ සැරසිලි දේවි දේවතා රූප යනාදී සියලු ම අංගෝපාංග චිත්‍ර කලාව හා සමගාමීව පවතී. රංග වස්ත්‍රභරණ නිර්මාණය ද චිත්‍ර ශිල්පයෙහි පැතිකඩකි. රංග වස්ත්‍රභරණ සදහා උචිත වර්ණ රටා හදුනා ගැනීම, වර්ණ ගැළපීම, ප්‍රමාණ හා හැඩ, ආකෘති, පබළු වැනි විවිධ අමු ද්‍රව්‍යය යොදා කරන සැරසිලි යන සියල්ල ම චිත්‍ර කලාවෙනි සහසම්බන්ධතාව විෂද කරවයි. රංග උපකරණ නිර්මාණය ද එයට සාපේක්ෂ වූවකි. ඌරා යක්කමේ දී කෙසෙල් බඩයෙන් සහ ගොක් කොළයෙන් නිර්මාණය කරන ඌරාගේ ආකෘතිය ද, යකුන් භූතයන් මෙල්ල කරන ඊ ගස ද, රීරි යකා අත දරන මරු පොල්ල හෙවත් යම මුගුර ද, කළු යකාගේ කඩුව ද අතිශයින් ම අලංකාර රංග භාණ්ඩ නිර්මාණයන් ය.

එහි කලාත්මක හැඩරුව එහි සුන්දරත්වය  ගැමි කලා කරුවාගේ නිර්මාණ චින්තනය සහ කලා කුසලතාව පිළිබිඹු කරන ප්‍රබල සාධකයන් නොවන්නේ ද? ශාන්තිකර්මයෙහි යෙදෙන වෙස් ගැන්විම ද චිත්‍ර කලාවේ සහසම්බන්ධතාව පැහැදිළි කරන එක් අවස්ථාවකි. වෙස් ගැන්වීම රංග වස්ත්‍රභරණ සහ අංගරචනය යන මූලිකාංගයන්ගේ සම්මිශ්‍රණයෙන් සිදු වන්නකි. එක් එක් චරිතයට ආවේණික ලෙස වෙස් ගැන්වීමේ දී චරිත ස්වාභාවය ආරෝපණය කිරීම සදහා යොදා ගන්නා සියලු උපාය මාර්ග චිත්‍ර කලාව සමග බද්ධ ව ඇත. පරිසරයෙන් සපයා ගන්නා ස්වාභාවික ද්‍රව්‍යයන්ගෙන් නිර්මාණය කල සායම් වර්ග භාවිත කල ද නිර්මාණ කාර්යය එකක් ලෙස ම පවතී. මේ ආකාරයෙන් සළකා බැලීමේ දී අපට පෙනෙන කරුණක් වන්නේ චිත්‍ර කලාව සහ නර්තන කලාව ඉතා සහසම්බන්ධතාවයෙන් පවතින බවයි.  

                                               


ලිපිය නිර්මාණය කලේ,
K
kelum priyadarshana


TOP MEMBER

අදාල තවත් ලිපි,



kelum priyadarshana

13-වසර නර්තනය (සිංහල)

අනෙකුත් ලිපි