ජන මාධ්‍යන්හි සිංහල භාෂා භාවිතය
පුවත්පත්, ගුවන්විදුලිය, රූපවාහිනිය හා චිත්‍රපට ජන ජීවිතය කෙරෙහි අතිශයින් බලපාන ජන මාධ්‍ය වේ. ශ්‍රී ලංකාවේ සිංහල, දෙමළ හා ඉංග්‍රීසි යන භාෂා මාධ්‍ය තුන ම ජන මාධ්‍යයන්හි භාවිතා වේ. මෙහි දී ලංකාවේ බහුතරයක් වූ සිංහල ජනතාව වෙනුවෙන් ක්‍රියාත්මක වන ඉහත කී ජන මාධ්‍යයන්හි සිංහල භාෂා භාවිතය කෙබදු ස්වරූපයක් ගෙන ඇත්දැයි සළකා බැලීම වැදගත් වේ. භාෂාව ජාතික අන්‍යතාවයයි.භාෂාව නැති වූ කල ජාතිය ද නැති වන්නේ ය. බොහෝ රටවල ජාතිය හදුන්වනු ලබන්නේ ඔවුන් කතා කරනු ලබන භාෂාව අනුව ය. ලෝකයේ මුල දී පැවති භාෂා රාශියක් මේ වන විට මළ භාෂා බවට පත් ව ඇත. ඉදිරි සියවස තුල දී සිංහල භාෂාව ද මළ භාෂාවක් බවට පත් වනු ඇතැයි විචාරක මතය වේ.
අද ජන මාධ්‍යන්හි භාවිතා වන සිංහලය දෙස බැලූ විට එය සත්‍යයක් බවට පත්වේ යැයි සැකයක් ද උපදී. මීට අඩ සියවසකට පමණ පෙර රාජ්‍ය පාලිත ගුවන් විදුලිය ද පෞද්ගලික අයිතිය යටතේ පැවති පුවත්පත් ද ප්‍රබලත ම ජන මාධ්‍ය විය. එකල එම මාධ්‍ය මගින් භාවිතා කළ සිංහල භාෂාව ඉතා ප්‍රශස්ත මට්ටමක පැවතුණි. ගුවන් විදුලියේ ප්‍රවෘත්ති වැඩ සටහන ප්‍රමුඛත ම අයිතමය වූ අතර එය ඔදවත් තෙදවත් නිවැරදි ලිඛිත භාෂාවෙන් ඉදිරිපත් කරන ලදී. ප්‍රවෘත්ති පත්‍රවල ව්‍යාකරණ දෝෂයක්, පද අපරූප කිරීමක් කිසිසේත් දක්නට නොවී ය. එහෙත් අද වන විට ජන මාධ්‍යන්හි භාවිතා වන සිංහලය භාෂා ප්‍රේමීන්ගේ දැඩි කනස්සල්ල හේතු වී ඇත. අද වන විට පෞද්ගලික ගුවන් විදුලි නාලිකා තිහකට අධික ප්‍රමාණයක් ද ප්‍රධාන රූපවාහිනී නාලිකා දහයකට වැඩි ප්‍රමාණයක් ද සිංහල භාෂාවෙන් ම තම විකාශන කටයුතු කරගෙන යයි. ජාතික මට්ටමේ දිනපතා ප්‍රවෘත්ති පත්‍ර දහයක් පමණ සිංහලයෙන් පල වේ.
මෙම මාධ්‍යන්හි භාවිතා වන ව්‍යවහාර සිංහලය දැඩි සේ පහත් තත්වයකට පත් කර ඇත. භාෂාවේ මූලික වියරණ රීති පිලිබදව වත් දැනුමක් නැති හිරිමල් වියේ තරුණ තරුණියෝ FM ගුවන් විදුලි නාලිකා ඔස්සේ අච්චාරු භාෂාවකින් ශ්‍රාවකයන් ආමන්ත්‍රණය කරති. විද්‍යුත් මාධ්‍ය සදහා සුදුසු ම මධ්‍යම පුරුෂ ආමන්ත්‍රණය “ඔබ” යන්නයි. එහෙත් ඒ වෙනුවෙන් ඔයා, ඔයාලා මෙයා ආදී ආමන්ත්‍රණය පද භාවිතා වේ.සිංහල පුවත්පත් වල ශීර්ෂ පාඨ පවා වියරණ මරමින් ලියා තිබෙනු බහුල ව දක්නට ඇත. “ඇමතිවරුන් තීරණය කරයි” “ඔවුන් ගියහ” වැනි මූලික වියරණ රීතින් බිද ප්‍රවෘත්ති ලිවීම නිතර දැකිය හැකි ය. රූපවාහිනී ප්‍රවෘත්ති විකාශන වල නිරන්තරයෙන් ම අනුක්ත බහු වචන උක්තයට ඒකවචන ආඛ්‍යාතය යෙදූ වාක්‍ය නිතර දෙවේලේ අසන්නට ලැබේ. ප්‍රවෘත්ති විකාශනය වන අතර තුර රූපවාහිනීයේ පහළ තීරුවේ පුවත් පාඨ පළවේ. ඒවායේ වියරණ පමණක් නොව අක්‍ෂර වින්‍යාසය පවා සදොස් ය.
බොහෝ විට ජනතාව මෙම භාෂාව නිවැරදිව හැසිරවීම පිළිබද ව ජන සමාජය තුළ විවිධ ආකාරයේ කතා බහ පැතිර පවතී. එසේ වුව ද මෙම භාෂාව නිවැරදි ව මෙන් ම තැනට උචිත ආකාරයෙන් ද භාවිත කිරීමට භාෂාව භාවිතා කරන්නා වග බලා ගත යුතු ය. සදොස් බසක් වුව ද එක දිගට දිනපතා භාවිතා කරන විට එය නිදොස් රීතියක් යැයි බොහෝ දෙනෙක් විශ්වාස කරති. මේ වැරදි බස් වහර දැන් දැන් පාසල් සිසුන් පවා භාවිතා කරනු පෙනේ. මෙය තරමක් දුරට හෝ නිවැරදි කිරීම සදහා සියලු ම ජන මාධ්‍යවේදීන් සදහා නිවැරදි සිංහල භාවිතය පිළිබද සම්මන්ත්‍රණ පැවැත්විය යුතු ය. සෑම මුද්‍රිත මාධ්‍ය ආයතනයක ම සෝදු පත් බලන්නට විධිමත් පුහුණුවක් ලබාදිය යුතු ය. දිනෙන් දින පරිහානිය කරා යන මාධ්‍ය සිංහලය නිවැරදි මගකට ගැනීමට මේ අනුව හැකියාව ලැබෙනු ඇත.
