" අපට වැසිකිළියක්" විචාරය

" අපට වැසිකිළියක් " කෙටිකතාවෙහි සිද්ධි හා අවස්ථා නිරූපණයේදී කතුවරයා දක්වා ඇති දක්ෂතාව විග්‍රහ කරන්න.

සිංහල සාහිත්‍යය කෙරෙහි විශාල මෙහෙවරක් සිදු කළ කෙටිකතාකරුවකු වශයෙන් හැඳින්විය හැකි " කේ. ජයතිලක " මහතා  විසින් රචනා කරන ලද " නොනිමි සිත්තම හා තවත් කෙටිකතා " යන කෙටිකතා සංග්‍රහයෙන් උපුටා ගන්නා ලද කෙටිකතාවක් වශයෙන් " අපට වැසිකිළියක් " කෙටි කතාව හැඳින්විය හැකිය. 

ග්‍රාමීය පරිසරය හා බැඳුණු ජීවීතවල යථාර්ථය ඉස්මතු කිරීමක් වස්තු විෂය කරගත් මෙම " අපට වැසිකිළියක් " කෙටිකතාවේ අවස්ථාවන් හා සිද්ධි මනා ලෙස නිරූපණය කිරීමට කතුවරයා සමත් වී ඇත. එම දක්ෂතාවය මෙසේ විමසුමකට ලක් කිරීමට හැක. 

" මොන වදයක්ද මන්දා . මේ ගෙදර මම විතරද කුරහන් අඹරන්න ඉන්නේ? මට බෑ.... " 

" ඇයි මල්ලී එහෙම කියන්නේ ? අසනීපෙන් ඉන්න අම්මාට පුළුවන්ද ඕව කරන්න ...... " 

ගම්බද කුටුම්භ ජීවිතය පිළිබඳව රසවත් අවස්ථාවක් නිරූපණය කරමින් කතුවරයා ස්වකීය කතාව ගෙතීමට අවකාශයක් විවර කරගෙන ඇත. බාල සොහොයුරාගේ දඩබ්බරකම් හමුවේ සොහොයුරිය කුරිරු නොවී සත්‍ය වටහා දීමට ගන්නා උත්සාහය තාත්ත්වික වේ. එය " ඇයි මල්ලී එහෙම කියන්නේ .... " යන පාඨයෙන් පැහැදිලි කෙරේ. 

මවගේ වගකීම් සිය කර මතට ගෙන ගෘහයේ රික්තකයන් පිරවීමට උත්සාහ කරන්නාවූ පරාර්ථකාමී වැඩිමල් සොයුරියකගේ චරිත ලක්ෂණ තුළින් කතුවරයා සමාජය ගොඩනංවාලන යහපත් පුරුෂාර්ථ පාඨකයා හමුවේ තබන්නේ ඉතා සරළ යෙදුම් භාවිතයෙන් අවබෝධයට පහසුවන අන්දමටය. එය " අසනීපෙන් ඉන්න අම්මාට පුළුවන්ද ඕව කරන්න .... " යන යෙදුම හරහා තීව්‍ර කර ඇත. 

" ඔව් ! හැමදේම බැහ් ! බැහ් ! කට විතරයි....... කෑම් පීම් සේරම දෙපා මුළට පහළ වෙයි. බලා හිටපිය " ! ...... මා කුරක්කන් වං ගෙඩිය ළඟට වීසි වූයේ ඔහුගේ වචනවල ....... "  

උක්ත උදාහරණ පාඨය මගින් ඉතාමත් සජීවීකරණයෙන් යුතු වූ සිද්ධි නිරූපණයක් පිළිබඳව තොරතුරු මතු කර ඇත. " මා කුරක්කන් වං ගෙඩිය ළඟට වීසි වූයේ ඔහුගේ වචනවල ශබ්දයෙන් විනා... " යන උද්දෘත පාඨය ඔස්සේ පියාගේ මැදිහත් වීම මත ආරක්ෂාකාරීව ජීවිත ගෙවන ගැමි නිවසක තතු මතු කරනු ලබයි. කතුවරයාගේ දක්ෂතාවය වන්නේ මෙහිදී සරළ, මෙන්ම සාමාන්‍ය ජීවිතයේ සුලබ අවස්ථාවක් මගින් පීතෘ මූලික සමාජයක තතු හෙලිදරව් කිරීමයි. 

පියාගේ අවවාදයන් කොතෙකුත් කර්කෂ යැයි හැඟුනද නිතර පාහේ ඔහුගේ වචනවල උපදේශාත්මක ස්වරයක් ගැබ්ව ඇති වග තහවුරු කිරීම පිණිස කේ. ජයතිලක මහතා යොදා ගෙන ඇත්තේ ද සරළ ගැමි යෙදුම් වේ. උදාහරණ වශයෙන් " කෑම් පීම් සේරම දෙපා මුළට පහළ වෙයි ... " යන පාඨය දැක්විය හැකිය. 

" කවුද මේ ගෙදර ගෘහමූලිකයා ? " 

" 'මම ' තාත්තා බයාදු ලෙස පිළිතුරු දිනි ".

" මේ ගෙදර වැසිකිළියක් තියෙනවා ද ? ''

"තාත්තා යළිත් උඩ බිම බලයි." 

"මේ ගෙදර කක්කුස්සියක් තියෙනවා ද? " 

" නෑ" 

තාත්ත්වික අන්දමින් අවස්ථාවන් හා සිද්ධි නිරූපණය කෙරෙහි කතුවරයා දක්වන ලද දක්ෂතාවය ඉහත උදාහරණ පාඨය මඟින් මනාව පිළිඹිබු වේ. 

නොවියත් ගැමියා ඉදිරියේ නාගරිකයේ හුවමාරු වන්නාවූ වචන භාවිතය තුළ ගැමියා අසරණවන ආකාරයක් ".... තාත්තා යළිත් උඩ බිම බලයි " යන පාඨයෙන් ව්‍යංග්‍යාර්ථවත් කෙරේ. නොවියත් භාවය හේතුකොටගෙනම උගත් නාගරිකයාට යටහත් පහත් ස්වරයෙන් ආමන්ත්‍රණය කිරීමට සිදු වීමද මෙම සමාජ ක්‍රමයේ පවතින දුර්වලතාවයක් බව ප්‍රකාශ කිරීම උදෙසා කතුවරයා මෙය අවස්ථාවක් කොටගෙන ඇත. " තාත්තා බයාදු ලෙස පිළිතුරු දිනි. " යන නිදර්ශනය එය සනාථ කරන යෙදුමක් වශයෙන් සැලකිය හැක. 

" ඇහැටවත් නොපෙනෙන සතුන්ට පුළුව ද මෙච්චර ලොකු මිනිස් ඇඟකට හානි කරන්න ? එහෙම  නම් මැක්කො මකුණො කන තරමට මිනිස්සුයි කියල ජාතියක් ඉතුරු වේවියැ ? "

" එහෙම නම් අපට පෙරේතයො කොහොමටවත් පෙනෙන්නෙ නෑ නොවැ. " 

අතීතයේ පටන් ම ගම්මානය නිර්මාණය වීමේදී බලපා ඇති කරුණු කිහිපයක් ඇත. දෙවියන් , යක්ෂයින් , පෙරේතයින් වැනි බලවේගයන්ගේ බලපෑම විශ්වාස කිරීම සහ පුද පූජා පැවැත්වීම එහි එක් කෝණයකි. අධ්‍යාපනය මගින් එවන් හුදු විශ්වාසයන් බිද දැමීමක් මෙන්ම ලොව පවතින සියල්ලටම හේතූන් සහිත බව තහවුරු කරයි. ඉගෙනුම මත එම විශ්වාසයන් නිෂ්ප්‍රභා කිරීමක් සිදුවේ. එය ගැමියාට සමීප කරවීම කෙරෙහි " මෙච්චර ලොකු, මකුණො , කොහොමටවත් , නෑ නොවැ, වේවියැ " යන ගැමි ව්‍යවහාරයන් භාවිත කිරීම කතුවරයා සතු සැබෑම දක්ෂතාවයක් බව මෙහිදී පැහැදිලි වේ.

" ... නිතර ප්‍රයෝජනයට ගැනීම නිසා වැසිකිළියද ජරා ජීර්ණ වී ඉන් සිහින් දුගඳක් හමා එයි. දැන් අප එය හඳුන්වන්නේ ද වැසිකිළිය කියා නොව කක්කුස්සිය යනුවෙනි. දැන් එය තාත්තාට වුව ද ප්‍රයෝජනයට ගැනීමට අසීරු නොවන ස්ථානයක් වී  ඇත. " 

සමස්ත කෙටිකතාව තුළම කතා බහට ලක්වන චරිතය වනාහී සෞඛ්‍ය පරීක්ෂකවරයාගේ චරිතයයි. ගැමියන් බෙහෙවින් බිය උපදවන නීති, නඩු , උසාවි වැනි යෙදුම් භාවිතයෙන් තම රාජකාරිය අකුරටම ඉටු කළ පුද්ගලයෙක් වශයෙන් මෙහි සිද්ධි ගොඩනැගීමට කතුවරයා ගෙන ඇති උත්සාහය ඇගැයීමට පාත්‍ර වේ.

කෙටිකතාවේ සැබෑම ජයග්‍රාහකයෝ වනාහී ගැමියෝය. මන්දයත් ගමට නුපුරුදු වැසිකිළි සංස්කෘතිය හුරු කර ගැනීම උදෙසා වෙහෙස ගත්තෝ ඔවුහුය. පාඨකයා වෙත එය පසක් කරවන පාඨයක් ලෙස  " ... තාත්තාට වුව ප්‍රයෝජනයට ගැනීමට අසීරු නොවන ස්ථානයක් වී ඇත." යන යෙදුම උපුටා දැක්විය හැකිය. 

සමස්ත කෙටිකතාව තුළම දැක්වෙන අවස්ථාවන් හා සිද්ධි නිරූපණය තාත්ත්වික කරලමින් කතුවරයා දක්වා ඇති දක්ෂතාවය සාර්ථක වී ඇති අන්දම ඉස්මතු වේ.