ව්‍යවසායකත්වය සහ කළමනාකරණය - උසස්පෙළ ගිණුම්කරණය

ව්‍යවසායකත්වය සහ කළමනාකරණය

ව්‍යවසායකත්වය සහ කළමනාකරණය

 

  රටක් සංවර්ධනය කෙරෙහි  නව නිපැයුම් සහ නව්‍යතා ඇසුරෙන් ජනිත වන ව්‍යාපාර අතිමහත් වූ දායකත්වයක් සපයයි. මෙමගින් රටක ආආර්ථිකය සවිමත් වන අතර, ආර්ථික වශයෙන් කඩා වැටීම්වලට බදුන් වීම වළකී. නව ව්‍යාපාර ඇති වීම රට තුල ධනය ඉපයීම මෙන්ම විදේශ විනිමය ඉපයීම කෙරෙහි ද එක සේ බලපායි. එසේම නව රැකියා උත්පාදනය හේතුවෙන් සාමාජීය සංවර්ධනය කෙරෙහි ද නව නිපැයුම් සහ නව්‍යතා ඔස්සේ ඇති කෙරෙන ව්‍යාපාර සෘජුව බලපායි. භාණ්ඩ සහ සේවා නිෂ්පාදනය හා ආර්ථික සංවර්ධනයේ ප්‍රථිපලයක් ලෙස පාරිභෝගික අවශ්‍යතා හා වුවමනා සංතෘප්තිය ද, නව  භාණ්ඩ හා සේවා වෙළදපොළට එකතු කිරීම හේතුවෙන් වෙළදපොළ පුළුල් වීම ද, වෙළදපොළ පුළුල් වීම හේතුවෙන් සැපයුම ඉහළ නැංවීම හා ස්ථාවර කිරීම නිසා භාණ්ඩ හා සේවා වල මිල ගණන් පහළ මට්ටමක හෝ ස්ථාවර ව පවත්වා ගැනීමට ද සිදු වනු ඇත. එසේම, එක් ව්‍යාපාරයක දියුණුව තවත් ඒ හා බැදුණු ව්‍යාපාර වල දියුණුව සදහා දායක වනු ඇත. මෙය රටක දළ දේශීය නිශ්පාදිතය ඉහල නැංවීමෙහිලා ඉවහල් වනු ඇත.

නව නිපැයුම් හෝ නව්‍යතා සිදු කිරීම ඉංජිනේරු විද්‍යාවෙහි සහ තාක්ෂණවේදයේ ප්‍රථිපලයක් වුවද ඒ සදහා යම් පිරිවැයක් දැරීය යුතු වේ. එනම් මේ සදහා ශ්‍රමය, කාලය සහ මුදල් අවශ්‍ය වේ. නව නිපැයුම් සහ නව්‍යතා සිදු කිරීම එක් පුද්ගලයකු ලෙස හෝ පිරිසක් ලෙස හෝ සම්බන්ධ වී කළ හැකිය. මෙසේ ශ්‍රමයෙන්, කාලයෙන් සහ මුදලින් දායකත්වය ලබා දීමේ දී මේ සදහා යම් ප්‍රතිලාභයක් බලාපොරොත්තු වේ.

එසේම, නව ව්‍යාපාරයක් සාර්ථක වීම සදහා අභියෝග රාශියක් ඇති අතර, ඒනිසා යම් අවදානමක් ද පවතී. එම අවදානම බාර ගැනීමට හැකියාව සහ කැමැත්ත ඇත්තවුන් සමාජයෙන් ම බිහි වන අතර, මෙම පිරිස ව්‍යවසායකයන් ලෙස පොදුවේ හැදින්වේ. රටක ව්‍යවසායකයන් සංඛ්‍යාව වැඩි කිරීම එම රටෙහි සංවර්ධනය සදහා විවිධ පියවර ගෙන ඇති පහසුවෙන් ව්‍යාපාර ඇරඹීම සදහා අවශ්‍ය වන අධ්‍යාපනය හා පුහුණුව ලබා දීම, අඩු පොලී ණය පහසුකම් සංවර්ධනය කෙරෙහි රජයන්ගේ අවධානය යොමු කරනුයේ ඒ නිසා ය.

ව්‍යවසායකු බිහි වීම කෙරෙහි බලපාන්නාවූ විවිධ සාධක ඇත. මෙම සාධක නිවැරදි ව හදුනා ගැනීම සහ ඒවා කළමනාකරණය රටක දියුණුව කෙරෙහි බලපානු ඇත. එබැවින් ව්‍යවසායකයකු වීම සදහා අවශ්‍ය පුද්ගල සාධක  කිසියම් ආර්ථික පරිසරයක් තුළ  ව්‍යාපාරයක් ආරම්භ කර සාර්ථක ලෙස පවත්වා ගෙන යාමට අවශ්‍ය වන කළමනාකරණ මූලධර්ම සහ ඒ සදහා අනුගමනය කළ යුතු ක්‍රියාවිධි මෙහිදී සලකා බලනු ලැබේ.

 ඉංජිනේරු තාක්ෂණවේදය විෂය නිර්දේශය අවසාන ඒකකය වශයෙන් ඉදිරිපත් කර ඇති  අවසාන නිපුණතා  වන්නේ  සාර්ථක ලෙස සුළු පරිමාණ ව්‍යාපාර ආරම්භ කිරීම සදහා සැලසුම් කිරීම, ව්‍යාපාරයක් ඇරඹීමට හා පවත්වා ගෙන යෑම සදහා අවශ්‍ය ව්‍යවසායක කුසලතා ප්‍රදර්ශනය කිරීමයි.

මේ අනූව මෙම විෂය නිර්දේශය සංවර්ධනය කි‍‍‍‍‍‍‍‍‍‍‍‍‍රීම සදහා දායක වූ ප්‍රතිපත්ති සම්පාදකයන්ගේ මූලික අරමුණ වී ඇත්තේ මෙම විෂය ධාරාවෙන් අධ්‍යාපනය හදාරන දරුවන් උසස් අධ්‍යාපනය සදහා යොමු වූවද නොවූවද අවසානයේ දී තම ජීවන වෘත්තිය තෝරා ගැනීමේදි ව්‍යවසායකයකු වීම සදහා ඔවුන්ට අවශ්‍ය දැනුම, කුසලතා හා ආකල්ප සංවර්ධනය කිරීමයි. ඒ අනූව අනාගතයේ රැකියා ඉලුම්කරුවන් වෙනුවට රැකියා සම්පාදකයන් බිහි කිරීම අපේක්ෂා වේ.