කෘෂි බෝග වගාවේදී ඇතිවන ගැටළු සාකච්ඡාව - 3 වන ලිපිය
කෘෂි බෝග වගාවේදී ඇතිවන ගැටළු සාකච්ඡාව - 3 වන ලිපිය
කාබනික වගාව හැටියට හඳුන්වන වගා ක්‍රමයේ දී වැඩි ආදායමක්‌ බෝගයකින් ලබාගන්නට නම් කවර ආකාරයකට කටයුතු කළ යුතු ද?
කාබනික වගාවක දී බෝගයේ වර්ධනයට අවශ්‍ය කරන පෝෂ්‍ය පදාර්ථ සියල්ල ම ලබාගත යුත්තේ යොදන කාබනික ද්‍රව්‍යවලිනි. එම නිසා යොදන කාබනික පොහොරවල හොඳ පෝෂ්‍ය පදාර්ථ අන්තර්ගත විය යුතු ය. කාබනික පොහොර වගා බිමෙන් ම සොයාගත් දේ යොදා සකස්‌ කර ගත හැකි නම් වඩා සුදුසු ය. කොළ පොහොර ලෙස ගත හැකි ශාක මෙන්ම සත්ත්ව පාලන කටයුතු ද සිදු කළ හැකි නම් එය විශාල වාසියකි. කාබනික වගාවේ දී කොම්පෝස්‌ට්‌ යෙදීම වඩා ප්‍රතිඵලදායක වේ. කොම්පෝස්‌ට්‌ සකස්‌ කරන විට එප්පාවල රොක්‌ පොස්‌පේට්‌ යොදා ගැනීම අප රටේ පස්‌වල තිබෙන පොස්‌පරස්‌ පෝෂ්‍ය පදාර්ථයේ අඩුව හොඳින් පිරිමසා ගැනීමට උපකාරී වේ. එමෙන්ම බෝග සඳහා පහසුවෙන් උරාගත හැකි තත්ත්වයට රොක්‌ පොස්‌පේට්‌වල අඩංගු පොස්‌පරස්‌වල ද්‍රාව්‍යතාව ද වැඩි වේ. යොදාගනු ලබන (කොම්පෝස්‌ට්‌ සකස්‌ කිරීමට) අමුද්‍රව්‍ය කි.ග්‍රෑ. 1000 කට රොක්‌ පොස්‌පේට්‌ කිලෝ ග්‍රෑම්. 50 ක්‌ යෙදීම ප්‍රතිඵලදායක බව කෘෂිකර්ම විශේෂඥයෝ පෙන්වා දෙති. අන්තර්ගත නයිට්‍රජන් ප්‍රමාණය වැඩි කර ගැනීම සඳහා කොම්පෝස්‌ට්‌ සකස්‌ කිරීමේ දී යොදනු ලබන කොළ වර්ගවල වැඩි නයිට්‍රජන් ප්‍රමාණයක්‌ අන්තර්ගත වීම ද බලපායි. වගා බිමේ දී වැඩි ප්‍රමාණයක්‌ නයිට්‍රජන් අඩංගු කොළ වර්ග වගා කර ගැනීම අවශ්‍ය ය. අනෙක්‌ ප්‍රධාන අවශ්‍යතාවක්‌ වන පොටෑසියම් ලබා දීමට පිදුරු හෝ කෙසෙල් කඳන් ආදිය යෙදිය හැකි ය. දර ලිප් භාවිත කරන්නවුන්ට ලිපෙන් ඉවත් කරන අළු පොස්‌පරස්‌ ලබා දෙන ප්‍රභවයක්‌ බව සඳහන් කළ යුතු ය. පොල් ලෙලි මඳක්‌ පුළුස්‌සා යෙදීම ද පොටෑසියම් පෝෂ්‍ය පදාර්ථය පසට ලබා දිය හැකි ක්‍රමයකි.
බෝග සඳහා කාබනික පොහොර භාවිතයේදී, බොහෝ දෙනකු හිතන්නේ මූලිකව යොදන කාබනික පොහොර ප්‍රමාණය බෝගවලට ප්‍රමාණවත් බව ය. එහෙත් වරින් වර බෝගයට කාබනික පොහොර ලබා දිය යුතු ය. රසායනික පොහොර වැඩිපුර යෙදූ විට ශාකවලට අහිතකර වුව ද කාබනික පොහොර යෙදීමේදී බෝග වලට එවැනි අහිතකර තත්ත්වයක්‌ ඇති නො වේ. ශාකය වටේ ඇති වල් පැළෑටි ඉවත් කර, පස මඳක්‌ බුරුල් කර, කාබනික පොහොර යොදා, නැවතත් මුල්ලු කළ හැකි ය. එවිට කාබනික පොහොර පස සමග හොඳින් කලවම් වේ. ස්‌වාභාවිකව සකස්‌ කරගන්නා දියර පොහොර ද වගාවන්ට යෙදීමට පුළුවන. කාබනික පොහොර යෙදූ විට පසෙහි තත්ත්වය දියුණු වන නිසා, බෝග වල මූල මණ්‌ඩලය පහසුවෙන් වර්ධනය වීමේ හැකියාව මත වැඩිදුර ප්‍රමාණයකින් පෝෂ්‍ය පදාර්ථ ලබාගත හැකි වනු ඇත.
කාබනික පොහොර භාවිතා කල වගාවකට භූමිය යොදාගන්නා විට බෝග මාරුවක්‌ කිරීම ද වැඩි ප්‍රතිඵල ලබා දෙයි. මේ මඟින් ලෙඩ රෝග පාලනය ද පළිබෝධ ගහනය අඩු වීම වැනි දේ ද සිදු වේ. ඉතා ඉක්‌මනින් ලෙඩරෝගවලට බඳුන් වන බෝග තෝරා නො ගැනීම ද වඩාත් සුදුසු ය. තනි බෝගයක්‌ සිටුවනවාට වඩා බෝග කිහිපයක්‌ සිටුවීම ද සුදුසු ය. මෙහි දී මිශ්‍ර බෝග වගා කිරීම ද තීරු වශයෙන් බෝග වගා කිරීම ද කළ හැකි ය. කාබනික පොහොර භාවිතා කර කරන වගාවේ දී, කෘමි පාලනය සඳහා දාස්‌පෙතියා, කැප්පෙටියා වැනි ශාක වගා කිරීම මගින් කෘමීන් පාලනය කළ හැකි බවට ගොවීන්ට අත්දැකීම් ඇත. කාබනික පොහොර භාවිතා කර කරන වගාවේ දී කෘමිනාශක නො යෙදීම නිසා, හිතකර කෘමීන් විනාශ නො වීම ද පරිසරයට විශාල යහපතක්‌ සිදු වීමට හේතු වේ.
බොහෝ විට කාබනික පොහොර භාවිතා කල වගාවක්‌ ආරම්භ කළ කන්නයේ ම එය සාර්ථක නො වීමට ඉඩ තිබේ. එයට හේතු වන්නේ පරිසරය හැඩ ගැසී ඇති ආකාරයයි. එහෙත් එයින් අධෛර්යයට පත් නො වී දිගටම ක්‍රියා පිළිවෙත අනුගමනය කළ යුතු ය.
