භාරතීය නර්තනය හා බැදි අධ්‍යාපන ආයතන - 12-වසර නර්තනය (සිංහල)

භාරතීය නර්තනය හා බැදි අධ්‍යාපන ආයතන

 

කලා ක්ෂේත්‍රය

දකුණු ඉන්දියාවේ අඩයාර්හි පිහිටි නර්තන අධ්‍යාපන ආයතනයකි. මෙම ආයතනයෙහි ප්‍රදාන විෂය ක්ෂේත්‍රය ලෙස ඇත්තේ භරත නර්තනයයි. භරත නර්තනයට අමතර වශයෙන් නර්තනය හා බැදි අනෙකුත් විෂය ක්ෂේත්‍රයන් ද ඉගෙනුමට අවශ්‍ය කරනු ලබන පහසුකම් අද්‍යතනයේ දී ලබා දී ඇත. මෙම ආයතනයේ නිර්මාතෘවරිය ලෙස සලකන්නේ රුක්මණී දේවි අරුන්ඩේල් නමැති ශේ්‍රෂ්ඨ භරත නාට්‍ය ශිල්පිණියයි. මෙය මුලින් ම හදුන්වා ඇත්තේ “කලාව පිළිබද අන්තර්ජාතික විද්‍යායතනය” වශයෙන් බව රුක්මණී දේවි පසු කලෙක දී පැවැත් වූ සම්මුඛ සකච්ඡාවක දී කියා සිටියේ ය.

කලා ක්ෂේත්‍රය අරම්බයේ දී එයට සිසුන් ඇතුලත් කර ගැනීම පවා දුෂ්කර කාර්යයක් විය. එය ආරම්බ කරන ලද්දේ එක් ශිෂ්‍යාවකගෙනි. පසුව එම සංඛ්‍යාව හතරක් දක්වා වැඩි විය. රුක්මණී දේවිය නර්තන ශිල්පිණියක් ලෙස ජනප්‍රියත්වයට පත් වෙත් ම එයට ඇදී එන ශිෂ්‍ය සංඛ්‍යාව ද ක්‍රමයෙන් වැඩි විය. කලා ක්ෂේත්‍රයෙහි ප්‍රථම ගුරුවරුන් ලෙස කටයුතු කලේ “පණ්ඩ නල්ලූර් මීනාක්ෂි සුන්දරම් පිල්ලෙයි” සහ ඔහුගේ බෑනා වූ “චොක්කලිංගම්  පිල්ලෙයි” යන දෙදෙනා ය.පසුව සාරදා හොප්මන් සහ ක්‍රිෂ්ණාවතී ලක්ෂ්මන් යන ඇගේ ශිෂ්‍යාවන් දෙදෙනා එහි ගුරුවරුන් ලෙස පත් කරන ලදී. කලා ක්ෂේත්‍රය කලා අධ්‍යාපනයෙහි කේන්ද්‍රස්ථානයක් බවට පත් කිරීමට රුක්මණී දේවියගේ
අදහස විය. අද්‍යතනයේ දී එකී අදහස මල් පල ගැන්වී ඇත.


                                                                                                
චෙන්නායි ප්‍රදේශයේ අඩියාර්හි අක්කර 100 ක පමණ ප්‍රදේශයක විසිරී ඇති කලා ක්ෂේත්‍ර භූමියෙහි ඉගෙනුම ලබන දේශීය හා විදේශීය සිසුහු සොබාදහමට සමීපව තම ඉගෙනුම් කටයුතු කරගෙන යති. භාරතීය ශිෂ්‍ය ශිෂ්‍යාවන්ට පමණක් නොව ලෝකයේ ඕනෑම රටක ශිෂ්‍යයකුට හෝ ශිෂ්‍යාවකට භරත නර්තන විෂය සදහා එකී  අධ්‍යාපන ආයතනයේ දොරගුළු විවෘත වී ඇත. ශ්‍රී ලංකාවේ භරත නර්තනය පිළිබද කීර්තියක් උසුලන ප්‍රකට ශිල්පි ශිල්පිනියන්ගෙන් වැඩි දෙනෙක් එකී ආයතනයේ ශිෂ්‍ය ශිෂ්‍යාවන් වෙති.

කේරල කලා මණ්ඩලය

කතකලි නර්තනය අතිශයින් පිරිහී තිබූ වකවානුවක එකී නර්තන කලාවේ ප්‍රවර්ධනය උදෙසා කේරල කලා මණ්ඩලය ආරම්බ කරනු ලැබී ය. එකී ආයතනයෙහි නිර්මාතෘවරයා වන්නේ මහා කවි “වල්ලිතෝල් නාරායන මෙන්න” මහතා ය. මොහු තම හිතවතුන්ගේ සහාය ඇති ව ආරම්බ කල සංවිධානය 1927 දී කේරල කලා මණ්ඩලම් යනුවෙන් කැලිකට් හිදී ලියාපදිංචි කරන ලදී. එහි කටයුතු කරගෙන යාමට මුදල් සදහා අරමුදලක් පිහිටවන ලද අතර විවිධ පුද්ගලයන්ගෙන් ඒ සදහා ආධාර ලබා ගන්නා ලදී.

එකී අරමුදල ප්‍රමාණවත් නොවූ හෙයින් ඉන්දීය රජයේ අනුමැතිය සහිත ව පවත්වන ලද ලොතරැයියක් මගින් එයට මුදල් රැස් කර ගන්නා ලදී. කේරල කලා මණ්ඩලම් ආයතනය නිත්‍ය ලෙස ආරම්බ වන්නේ 1930 වසරේ දී ය. “කැකට් මදෝම්”  නමැති කුන්නාම් කුලම්හි පිහිටි ප්‍රදේශකදී ආරම්බ කරන ලද මෙම ආයතනයට ප්‍රමාණවත් ඉඩ ප්‍රමාණයක් නොවූ හෙයින් වල්ලිතෝල් නාරායන මෙන්නගේ හිතවතෙක් වූ  මුකුන්ද රාජා විසින් පරිත්‍යාග කරන ලද අම්බලපුරම්හි පිහිටි ගොඩනැගිල්ලක් වෙත රැගෙන යන ලදී. නව ප්‍රදේශයෙහි වඩාත් විදිමත් ලෙස සංවිධානය වූ කේරල කලා මණ්ඩලම් ආයතනය “කතකලි නර්තනය” නර්තනය සදහා ආරම්බ කරන ලද්දේ වුව ද එකී ආයතනය එම විෂයට පමණක් සීමා නොකළ යුතු බවට අදහස් කරන ලදී. ඒසේ ම එය කේරලයට පමණක් සිමා නොවිය යුතු යැයි සලකන ලද හෙයින් එකී ඉගෙනුමට දෙස් විදෙස් සිසුන්ට අවස්ථාව සලසා දෙන ලදී.