බටහිර සංගීතය සිංහලෙන් - පාඩම 3

බටහිර සංගීතය සිංහලෙන්  . .  පාඩම 3

 The Octave (ස්වර අෂ්ටකය)

මුල් ස්වරය සහ අවසන්  ස්වරය අතර semitone 12  ක පරතරයකින් යුත් ස්වර 8ක ස්වර පන්තියක් Octave 1ක් හෙවත් ස්වර අෂ්ටකයක් වේ.  

උදාහරණ සඳහා පහත සටහන බලන්න

 Middle C (මධ්‍ය “ස”)

කම්පන සංඛ්‍යාතය 256Hz [හ(ර්)ට්ස්] ප්‍රමාණයකින් හඬ උපදවන ස්වරය Middle C හෙවත්  “මධ්‍ය ස” ලෙසින් හඳුන්වයි.

Middle Octave

Middle C සහ ඊට octave 1ක් ඉහලින් ඇති C ස්වරය අතර ඇති ස්වර පන්තිය “Middle Octave” ලෙස හඳුන්වයි. (රාගධාරී සංගීතයේදී මෙය “මධ්‍ය සප්තකය” ලෙස හඳුන්වා ඇත)

Upper Octave (Higher Octave)

Middle Octave එකට ඉහලින් ඇති ස්වර අෂ්ටකය හෙවත් octave එක “Upper Octave” ලෙස හඳුන්වයි. (රාගධාරී සංගීතයේදී මෙය “උච්ඡ හෝ තාර  සප්තකය” ලෙස හඳුන්වා ඇත)

Lower Octave

Middle Octave එකට පහලින් ඇති ස්වර අෂ්ටකය හෙවත් octave එක “Lower Octave” ලෙස හඳුන්වයි. (රාගධාරී සංගීතයේදී මෙය “මන්ද්‍ර සප්තකය” ලෙස හඳුන්වා ඇත)

බටහිර සංගීතයේ ස්වර පද්ධතිය පිළිබඳව සාකච්ඡා කිරීම මෙම පාඩමෙන් අවසන් වේ.

අනිත් පාඩමට පෙර, ස්වර දැනුමේ  සහ සංගීත දැනීමේ වැදගත්කම  පිළිබඳව කෙටියෙන්  සාකච්ඡා කරමු.

බටහිර සංගීතයේ සහ උත්තර භාරතීය රාගධාරී සංගීතයේ ස්වර පද්ධතිය සමානත්වයක් දක්වයි.

සංගීත ස්වර යනු ලිඛිත සංගීතයේ මාධ්‍යයි. යම්කිසි ක්‍රමානුකුල ආකාරයකට සංගීත ස්වර ලිවීමෙන්, යම් සංගීත ඛණ්ඩයක හෝ ගීතයක ස්වර ප්‍රස්තාරයක් සකස් කරගත හැක. ස්වර ගැන අවබෝධයක් නොමැතිනම් ස්වර ප්‍රස්තාරයක් කියවීමටද නොහැකි වේ.

කනට ඇසෙන දේ වාදනය කිරීමට හැකියාවක් සහ ස්වර ප්‍රස්තාරයක් කියවා වාදනය කිරීමට ද හැකියාවක් ඇත්නම් ඔහු හෝ ඇයට සංගීත ක්ෂත්‍රයේ ගමනක් යාමට හැකි වේ.

එමෙන්ම බටහිර සංගීතයේ මුලික සිද්ධාන්ත පිළිබඳව දැනුමක් නොමැති නම් , ඔහුට හෝ ඇයට සරල සංගීත ක්ෂේත්‍රය තුල පැවැත්මක් නැත.  

ඇසෙන දේ ගායනය හෝ වාදනය කිරීමේ හැකියාවේ දක්ෂතාවය මත පුද්ගලයින් වර්ග 3 කට බෙදා දැක්විය හැක.

පළමු වර්ගය :

උපතින්ම ඉතා හොඳින් මේ හැකියාව පිහිටපු අය.

ඔවුන්ට සංගීත ඛණ්ඩයක් ඇහුනු සැනින් එය ගායනය හෝ වාදනය කරන්න පුළුවන්.

උදාහරණයක් ලෙස H.R. ජෝතිපාල, මිල්ටන් මල්ලවආරච්චි වැනි ගායකයින්. ඔවුන් ජීවිත කාලය පුරාවට සංගීතය විෂයයක් ලෙස ඉගෙනගෙන නැහැ.

අද නිර්මාණය කල සංගීත භාණ්ඩයක් දුන්නත් පැය දෙක තුනකින් ඉතාමත් දක්ෂ ලෙස එය වාදනය කරන පුද්ගලයින් සිටිනවා.

අපි නොදන්නවාට මේ වගේ අය අප්‍රසිද්ධියේ ඕන තරම් සිටිනවා.

දෙවන වර්ගය :

මේ හැකියාව පිළිබඳව යම් අපැහැදිලි චායාවක් හිතේ තියන අය.

දහ පහළොස් පාරක් සංගීත භාණ්ඩයට එහෙන් මෙහෙන් අතගා මොකක් හරි පොඩි කෑල්ලක් අල්ලගන්න මේ අයට පුළුවන්.

නිරන්තර අභ්‍යාසයෙන් මේ හැකියාව දියුණු කරගැනීමට මේ වගේ උදවියට පුළුවන්.

ඒ අයත් වර්ග 3කට වෙන් කරන්න පුළුවන්

ඒ තමයි

1. ස්වල්ප වශයෙන් මේ හැකියාව දියුණු කර ගැනීමට හැකි අය. මේ අය කොයි තරම් උත්සාහ කලත් එක්තරා ප්‍රමාණයකින් එහාට යන්න බැහැ.
2. සාමාන්‍ය ප්‍රමාණයකට දියුණු කරගත හැකි අය. මේ අයට පළමු වර්ගයට වඩා තව දුරක් ගිහින් එක් මට්ටමකින් එහා යන්න බැහැ. ඒ අයට පුළුවන් “ඔහොම නෙමෙයි මෙහෙමයි” කියල පළමු වර්ගයේ අයට කියල දෙන්න.
3. යම් සැලකිය යුතු මට්ටමක් දක්වා දියුණු කරගත හැකි අය. මේ උදවිය සංගීතය යම් ප්‍රමානයකට ජයග්‍රහණය කරනවා.

තුන්වන වර්ගය :

ජීවිත කාලය පුරාම උපරිමව ප්‍රයත්න දරුවත්, ඒ කියන්නේ මේ හැකියාව ලබා ගන්න පුළුවන් සියලුම ක්‍රම අනුගමනය කලත්, බිඳක් හෝ මෙය ලබා ගත නොහැකි උදවිය.

අපි මේ කතා කරන හැකියාව හෙවත් “කනට ඇහෙන දේ වාදනය හෝ ගායනය කිරීමේ හැකියාව” සංගීතයේ පුරෝගාමීන් හඳුන්වා දී තියෙන්නේ “ජන්ම වාසනා ගුණය” කියලා. පරිපූර්ණ සංගීත ශිල්පියෙක්ට මේ ගුණය පිහිටිය යුතුමයි.

එහෙම නැත්නම් ඔය සංගීතය හදාරන හැමෝම වාදකයින්, ගායකයින් විය යුතුයි.

සංගීතයට කැමැත්තෙන් එය ඉගන ගැනීමට උත්සාහ කරන පුද්ගලයින් තුල  “සොච්චමක්” හෝ මේ හැකියාව තිබේ. එසේ නැත්නම් සංගීතය පිළිබඳව හැගීමක් එන්න විධියක් නැහැ.

එබැවින් ඔබට ගායකයෙක් හෝ වාදකයෙක් වීමට තදබල උනන්දුවක් ඇත්නම් පළපුරුදු ගුරුවරයකුගේ උපදෙස් අනුව අභ්‍යාස කරන්න.

බටහිර සංගීතය සිංහලෙන්  . .  පාඩම 4 න්  නැවත හමුවෙමු 

ඔබ සැමට ජය හා සතුට